INREMNA ZIAHFEL A NI TA

Tahrik ni 23.6.2011(Nilaini) khan Middle School rama hall sak phalna tura inremna thuthlung (MoU) chu School Education Directorate Office-ah Sign fel a ni. Education Deptt aiawhin Pi Esther Lalruatkimi, Director leh Pu Lalchhuanliana, Joint Director, ten an Sign a; Nursery Veng aiawhin Pu C.Darthankima, Chairman, Hall Committee leh Pu Zokunga (JK-a), Secretary ten an sign thung.

Veng mipuiten Hall tha tak kan neih theihna turin Hall Committee chuan nasa takin hma a la a, tunah hian Engineer (Architect) ruaiin a hmun hma te enfel tawh a ni a, building structure pawh tihfel tawh niin fund pawh dila bawhzui zel a ni.

M/S ram, Pu R.Rallianzuala in sirah hall hi sak tura ruahman a ni a, a sakna hmun tur thlang turin Hall Committee-in veng mipui a ngen hnuah SMS hmanga vote lak niin tuna sakna tura tihna hmun duh an tam zawk vangin helai hmun hi ruahman a ni nghe nghe.

Chhuak hmasa lama tarlan tawh angin sikul hotute leh Hall Committee hruaituten Pu Lalsawta, Minister, School Edn. Dept. an hmu a, a thurawn anga hall sakna tur hmunhma thlalak leh tuldang te a hnenah thehluh leh a nih hnuah tahrik ni 20.5.2011 khan School Edn. Dept. Jt, Director Pu Lalchhuanliana’n a rawn enfiah leh hnuah heti hian inremna thuthlung ziahfel alo ni ta a ni.

Hall sak bul tanna tur sum hi tlem azawng chu neih a ni tawh a, sawi tawh angin dept. lamah fund dil belh mek a ni bawk. Dept. nena inremna angin hall sak puitlin a nih hnuah pawh a hmun hi sikul ram ala ni chhunzawm zel ang a, sikulin an duh leh mamawh hunah an hmang bawk ang.

Ruahman lawk ang chuan hall tur hi multi complex a ni ang a, chhawng chungah batminton court a awm ang a, chhawng hnuai lamah mipui pun khawm theihna hall zau nuam tawk tak a awm bawk ang. Tin, Pu R.Rallianzuala in bul, kawngsira hand railling sirah hian a pan thlakna tur motor kal theihna kawng siam a ni bawk dawn Edn. Director-in a sign lai Hall Commt Chairman-in a sign lai a ni.

Vengthlang lamah YMA-in hall kan neih sa hi kan hmang tangkai hle a, veng hmun laili pawl taka hetia hall puitling zawk tur kan nei leh thei tur hi veng tan thil chhinchhiah tlak leh mellung pawimawh tak a ni dawn a, kan tangkaipui hle ang.

Leave a Reply