IT’S MY LIFE

– Remrema Pa

Jon Bon Jovi, Max Martin leh Richard S Sambora te chuan hla mawi leh nalh tak mai an phuah a, a satu, Jon Bon Jovi – an a thiam bawk a, a mawia a lar hle. A phuahtute rilru ni awm leh kan hman zui dan erawhin ngaihtuahna a ti thui hle.A nih ang diak diak leh a phuahtute rilru phawk chhuak zo dawn lo mah se thiam ang tawkin (thiam zawkte cho chhuaktuah pawh tang se..) kan hriatthiam zawng Duhlian tawng ngeiin dah ve chhin teh ang.


This ain’t a song for the brokenhearted
No silent prayer for the faith departed
And I ain’t gonna be just a face in the crowd
You’re gonna hear my voice when I shout it loud

Tum ren rawn nei lo mi beidawng leh indawmkun mekte hla a ni lo. Ding chhuak leh thei ani tih inhre thei lo khawpa mahni inrin tawknain a thihsan tawh thinlung beidawng dilna satliah lah a ni hek lo. Mipui zinga mi satliah nih tum ngai lo; engtik niah emaw chuan Tunge ka nih a, Eng mi nge ka nih min la hria ang ti a rawn intarlan tum ran ka nih hi.

It’s my life
It’s now or never
I ain’t gonna live forever
I just wanna live while I’m alive

Ka nunna hi (ka nun mawlh mai hi) ka ta (ka siam anga awm a ni). Tunah ka chher loh chuan engtikah mah a tha lovang. Kumkhuain ka dam dawn lo, ka dam hun chhung tawiteah hian hlawhtlinna leh hlimna chang tura chhera chen mai tur ka ni.

(It’s my life)
My heart is like an open highway
Like Frankie said,”I did it my way”
I just wanna live while I’m alive ‘Cause it’s my life

Ka nun chu ka ta a ni, sang tak thleng thei tur khawpin zawh tur lamtluang zau a nei. Frankie-a’n ‘Ka tana tha turah chuan ka duh angin ka ti mai’ a lo tih angin ka dam hun chhung tawiteah hian hlawhtlinna leh hlimna chang tura chhera chen mai tur ka ni, a chhan chu ka nun a ni miau va.

This is for the ones who stood their ground
For Tommy and Gina who never backed down
Tommorrow’s getting harder, make no mistake
Luck ain’t even lucky, gotta make your own breaks

Tommy leh Gina, hnung tawlh ve ngai lote ianga tumruhna nena ding nghet te tan chauh a ni. Naktukah chuan harsatna lian zawk a lo thleng dawn ani tih hi a chiang, Vanneihna pawh a vannei tawh bik dawn lo, chuvangin vannei tura mahni inbuatsaih zawk mai hi i tih makmawh a ni e.

You better stand tall
When they’re calling you out
Don’t bend, don’t break
Baby, dont back down.

Mahni inrintawkna nen nghet takin ding la, engemawah koh chhuah i nih pawhin zakin kimki cheih cheih suh. Mahni inhloh lo la nangmah ngei ila ni tih inhriain duhthusama thain hlenchhuak zawk ang che……..tih vel hi a hla siamtute rilru anih duh hmel hle. Keini Mizo, a bikin Thalai te’n It’s my life kan han ti ve ngawt nen chuan a inthlauh hmel hle mai, i ngaihtuah chiang teh ang u.

Kan nun a nia, kan chher ang anga awm mai tur a ni reng a ni. Ruihtheih thiltih nan a kan hman chuan Ruihhlo ngai ah kan chan a, ruihhlo zuara kan hman chuan Ruihhlo zuara midang nun tichhe tuah kan siam a ni bawk ang. Chutiang in mahni inrintawkna neia, rinawmna leh chhelna, taimakna leh tumruhna nen a kan chher erawh chuan mihlawhtling, mahni inchawmzo, nu leh pa leh chhungkaw tan pawh a chhenfakawmah kan nun kha kan chher a ni thung ang.

Pathianin achhia leh atha thliarhrang theitur khawpin keimahah Finna a dah a, achhia leh thalo zawk thlang duh khawpa kan Rilru sualin ahneh anih hlauh chuan khawvel a mi vanduaiber ah kan inchherchhuak a ni tih i hria ang u. Tunhi insiamthatna hun remchang a ni, kan hla sawimekin a tih angin Tuna kan chetnghalloh chuan engtikah mah amahin ache chhuak lovang, chuvangin tunah hian “Kan nunna, kan chher anga awm hi a tha zawnga chher tan turin hma la ila, mahni inrintawkna nen mi danga innghat lo thei turin i inchher sauh sauh teh ang u.”

Nu leh Pa te pawhin kan chhungkaw inkhuahkhirhna kan lek kawh dan in en let ila, kan chhungkaw membertin Nunna theuh a tha zawnga chher turin hma lak tan dan tur bengsikin i ngaihtuah ang u. Kan tu leh fa-te hi rintlak leh rin ngam anni tih hriain an kutah innghat ngam ila. An tih tur tha leh tha lote sawipui thin ang u. Hetih rual chiah hian hei erawh kan hriat a tul khawp mai ‘kan duh dan leh ngaihdan ringawta kalpui tum lun lo ila, naupang zawkte duh dan leh ngaihdan te pawh la thiamin i pawmsak phal ang u.’

Thalai zawkte pawhin Kan nunna kan thua awm nia kan hriat chuan rui tur ringawt emaw, nu leh pa dodala elsen ringawt tur emawin i buatsaih lovang u. Kan dam chhung hun tawiteah hian mi puitling leh hlawhtling, mahni inchawm zo, mahni kuta ding zo nih i tum ang u. Sap-in, “It’s my life” an tih hian anni chu nu leh pa leh chhungte atanga inla hrangin an nun an sual chhuak thin. Chutiang ni lova nu leh pa thawhchhuah ring chunga Ruihhlo tih kan duh luat vanga, rui chher chhur chunga ‘It’s my life’ kan han ti ve ringawt mai te hi chu mahni inbum lek kan ni tih i hrethiam ang u.

Tha leh dik nia kan hriatte chu Nu leh Pa te hnenah rawtin sawi thin ila, tha zawk tur zawn nan han inhnial leh a that zawk dan tur sawia han inbah deuh changte zawng a awm ngei ang, mahse titau mai lovin kan duh dan leh ngaihdan lo deuh kha alo tha zawk anih chuan in-run- luih mai lovin a hlawhtlin theih nan taima leh chhel takin i hlen zawk ang u.

A tawp nan chuan kan Nunna hi Pathian siam leh min pek tih hre reng ila, a chher that leh chhiat erawh kan mawh a ni thung tih hi i theihnghilh lo ang u.

Leave a Reply