JAC CHANG-REL A SUAL NGAI LO

– Zokunga (President, NYMA)

Pawl (NGO) hrang hranga hruaitu dinhmun a din hi hna hautak a nih fo thin dan chu a Pawl a tel mek, hruaitu ni mek leh lo ni tawh thinte hian an hrechiang ber awm e. Tlang taka sawi chuan chutianga pawl hruaitu te chuan thil tih that an neih nikhuaah thil thleng tur rengah mipuiin kan ngai a, kan duh ang a thil an tih loh erawh chuan ar chuk tui lo khawpin kan sawisel leh luai luai thung thin. Heng pawl (NGO) a hruaitu te hian khawtlang tana thahnem an ngaih avang liau liauin tlinglo inti tak chungin pawl hruai hna an thawk tih ngaihtuah pui hi chu kan tam hmel loh khawp mai.

A bik takin NGO zingah pawh VDP/JAC hruaitu nih hi chu tuman kan duh loh, mahse khawtlang in a mamawh miau si avanga tlawmngaih chhuah tak meuh a kan thawh ngai si a ni fo thin. VDP/JAC-in hma a lakna reng rengah a kal dul deuhin khawtlangin kan dem fo a, a kal khawng deuh lahin sawiseltu kan lo awm leh nawk bawk thin hian VDP/JAC hruaitu te tan kal dan thiam a ti harsa hle thin fo a ni.

Tun hma kum 3/4 kal ta kha chuan kan vengah VDP din thin a ni a, thil tha zawk beiseina avanginLocal Council -in vantlang inkhawm a koh a thutlukna siam angin tunah chuan JAC anga kal mek a ni a. Kan JAC hruaitute pawh an phak ang tawkah thahnemngai taka hma lain kan khawtlang pawhin kan thlamuan phah hle te hi a ropuiin an hmalak naah veng mipuite pawhin lawm nachang kan hriat a pawimawh hle a ni.

Chutih laiin, mi tlemte in JAC hmalakna sawiselin boruak thalo thleng lek lek thawmte pawh hriat tur a awm thin a, hemi kawngah hian veng mipuite kan tan rual a pheikhai rual taka hma kan lak thin a pawimawh khawp mai. JAC hmalakna zawng zawngah kan tel vek thei lo a nih pawhin pawn lam atanga JAC hmalakna kan lo thlawp thiamte hi khawtlang tana kan rawngbawlna pawimawh tak a ni tih kan hriat nawn leh a pawimawh hle a ni.

Local Council kaihhruai a LC leh NGO hrang hrang hruaitute Joint meeting chuan kumin (2016) chhunga JAC hruaitu thlanna Ni 2.2.2016 (Thawhleh) zanah neih nise tiin a rel a. Hemi hunah hian vengchhung in tin atangin mi pakhat tal kal tur a beisei kan ni. Inthlannaah hian mi kal kan awm mumal lo anih chuan inthlan thulh mai pawh thil awm thei a ni tih kan hriat a tha awm e. Chutiang thil duhawmlo a lo thleng palh a kan khawtlang boruakin a tuar palh anih chuan tumah in puhmawh tur kan awm dawn lova. Mipuiin JAC hruaitu thlan kan ngaih pawimawh miau loh chuan JAC ngei pawh chu din thei lovin kan kal nawk nawk ang a, ruk ruk, intihbuai, etc. khawtlangin kan tawng fo ang a, kan za vaiin hrehawm ti tak chungin kan tuar leh tlawk tlawk dawn tihna a ni ngei ang.

Hetiang boruakte hre reng chung hian JAC hruaitu thlannaah hian thahnemngai taka kal vek turin vengchhung mite kan in sawm tak meuh a, inthlannaah pawh thinlung leh tih tak zet rilru pu chung a hruaitu thlang chhuak turin mitin kan in sawm tak meuh a ni. Sawiselna tamtak karah JAC hruaitu te hian khawtlang tan an theih ang tawkin hna an thawk a, an hmalaknaah tihsual palh chang an lo nei anih pawhin khawtlang tana thahnem an ngaih vang a ni tih hre chunga kan theihna zawn apianga an hmalakna lo tawiawm hi kan zavaia mawhphurhna a ni tih i hre thar zel ang u.

JAC hmalakna hi za a za in a dik vek kan ti lo, mahse, veng tana thahnem ngaih vang a mahni in leh lo, hna pawimawh tam tak kalsan chung a JAC hruaitu te hian hma la an nih miau avangin JAC changrel hi a sual ngai loving tih i pawm ngam i la. LC leh NGO hruaitu ten ruahmanna an lo siam ang ngei hian JAC hruaitu mi tha thlang chhuak thei ngei turin Ni 2.2.2016 (Thawhleh) zanah vengchhung in tin atangin mi pakhat na na chu I thawk chhuak hram ang u.

Leave a Reply