JAC LEH RUIHHLO DO

“Zoram har rawh khua atlai dawn e”. Ruihhlo avangin kan thalaite an liam zung zung a, a ti mek leh a dam awmchhun te lah chu chhawr tlak loh, mahni in veng tur atan pawh a tlak loh, an mahni vengtu awmloh chuan innghaktu hran siam ngai an ni fo a, ruk ruk hmang nilo mahse an tan ruk ruk a ngai tlat, No 4 zuar nilo mahse a zawrh hun a thleng tho tho. An unaute an nu leh pate an hmangaih em em, mahse he tur hlauhawm tak hian a dawi at tak tak hunah chuan mahni bak an inhmangaih thei lo. Chhungkaw thenkhat chu tapin an rum mek a, tanpuitu zawngin an rilruin an Tawngtai mawlh mawlh a ni.

In thenawm khawvenna thlengin an in la hrang a, Kohhran leh Khawtlangah an inkiltawih nasa hle bawk. Ruihhlo ngawlvei-te hian anmahni chauhin nuam an tawl a, an chhungte erawh an thlauh thla chiang hle mai. Sim turin chakna an nei tlem em em a ni. A nghei theilo te’n nitin an duhzat, an mamawh zat a sang tial tial a, a tawpah an duhloh kawng khirh tak an zawh thin. Hei vang hian Khawtin/veng tin in kartin mai hian thilruk/thil bo avangin harsatna kan tawk mek a . Addict te chuan khaweng zahpah miah lo niawm tak leh an bulhnai a awmve te ngaihtuah lek loin Ruihhlo ‘Damdawi’ buaipuiin an hmanhlelh em em bawk. Engtiklai pawhin an vak chhuak renga an awm hle hle thei lo a ni ber mai.

Heti ang hrep mai a, Zoram khawvela Nu leh pa, thalaite khawvel ti danglam tu Zu leh Ruihhlo zuartu te leh kan rama rawn la lut tute hi kan haw hle tur a ni lawm ni?!!! Vengchhungah thilbo, ruihhlo zuar leh intihbuaina alo thlen a’Khawnge kan JAC te hi’ kan tih chhung chuan Ruihhlo hi kan ti rem tak tak lo ang.!!

“Zoram harh rawh, i tih tur tam tak a awm e. I ram chhan turin mi tumah phut suh nangmah hi i chetchhuah a ngai a ni.” Ngaihtuah teh, kan ramah hian ..Ruihhlo avanga nu neilo, pa neilo engzatnge awm tawh a, Ruihhlo avanga that vanglai hun taka thalai kalliam ta hi engzatnge?, Ruihhlo avanga chhungkaw darh ta te hi engzatnge ni? Ruihhlo avanga ramtuileilo a awm engzatnge? Ruihhlo avanga Chhungkaw pawisa sen ral tam zia tawh te, Ruihhlo avanga Kohhran leh Khawtlangin tha leh sum a sen zat te hi engzat chiah nge ni tawh ang. Chutiang ang bawkin Sorkar hian engzatchiah nge a sen ral tawh ang le.

Loh theih loh a, Zoramin Ruihhlo avanga kan tawrhna, tha sen zat leh sum kan hlohna zawng zawng hi Ram hmasawnna ti chhe tu pakhat chu a ni ngei mai. Chu’ng kan ruihhlo sim theihlohte hi tute nge lo hlawk pui ta ang le. Lehkhathiam tamna ram, rawngbawltu tam na ramah hian Ruihhlo avangin kan tlawm ta em ni le? NGO tam berna ramah hian Ruihhlo zuartute umbo vek tawh tur kan niin a lang.

Engvangnge, hmasawnna aia beidawnna in min hmuah tlat le?. A pawimawh ber chu Ram kan hmangaih a nih chuan Mizo te hi kan inhmangaih tawn vek tihna a ni a, anih si chuan engvangin nge Ram hmelma Ruihhlo hi kan hnawl theih tlat loh le. Tih tak takna nun kan neih loh vang a ni. Ruihhlo kan duhlo tiin khawtin kan au vek tawh. Engnga tinge Ruihhlo ti an pun tual tual si?. A tawp berah chuan, Kohhran, NGO , Political Party.,etc leh , Mizo tawh phawt chuan Ruihhlo Do / Ruihhlo umbo hna kan thawh vek angai tawh tihna a ni.

Leave a Reply