JALLIANWALA BAGH MASSACRE

(India Independence Day vawi 75-na kan lo thleng ta. India ramin independence kan sual lai khan chanchin ngaihnawm tak tak hriat tur a awm a, pakhat chiah lo tarlang ila.)

Kum 1919 February thla khan British India Sorkar chuan India mipuite duh loh zet mai, ‘Rowlatt Act’ an tih chu India mipuiin duh lo eng ang mahse an pass lui ta rup mai a. Mohammed Ali Jinah te pawhin Council member nihna an bansan phah nghe nghe a. Chu Act chuan British ho do zawnga chetna reng reng a khap a. Chuti ang ti reng reng chu man leh thawn bo phalna a pe bawk. Thu leh hlaa British ho dona ziak leh pu darh chu hrem theih an ni bawk.

Press chu khirh taka thunun tur a ni a, police te chu an rinhleh apiang in leh lo dap theihna a pe nghal bawk. Chu dan thar chu India hruaitu lawk zawng zawngin an duh lo va, chung zinga a langsar ber pawh Mahatma Gandhi a ni a, a duh lohna lantir nan hna thawk zawng zawng chawlh thup, chaw nghei leh tharum thawh tel lova lantirna ‘Rowlatt Satyagraha’ (hartal) chu a bei chho ta nghal a ni. British ho chuan tharum thawh lova chuti ngawt dodalna chu fanghmir seh tlukah pawh an ngai si lo.

Dodalna chu a nasa ta tial tial a, Punjab leh Lahore te chu a langsar zual an ni a, Railway service leh Telegraph lam office a kal thei ta lo. Chutah Dr. Satya Pal leh Dr. Saifuddin Kitchlew te chu police custody-ah dah an nih hnuah chin hriat loha phurh bo an ni ta mai a. Chung mi pahnihte man leh phurh bo duh lova pungkhawm te chu police te chuan tim map lovin an kap ta hmiah hmiah mai a ni. Hetah hian British mi pariat leh India mi 20 vel an thi a ni. Gandhi-a huaihawt ‘hartal’ buaipuia hruaitu lawkte chu 1919, April ni 12-ah an inhmukhawm a, anni chuan a tuka dodal tura Jallianwala Bagh-ah punkhawm tur tih an rel ta a ni.

He punkhawm an ruat, April ni 13, 1919 hi Sikh sakhaw betute ‘Baisakhi’ kutpui ni a ni nghe nghe a. Hetih laia Saipai commander Colonel Reginald Dyer chuan lungawi lohna a punlun loh nan mipui chevel awmdan tur dan siam chawp a lo lek ve sek bawk a. Rowlatt Act dodaltu mi tam tak leh Baisakhi kutpui hmanga Golden Temple a kal mipui tamtak Jallianwala Bagh hmunah hian an awmkhawm a ni. Colonel Dyer hian mipui hnawt darh emaw, khap turin engmah pawh a ti lo.

Tlai dar 5:30 a lo ni a, ni pawh khawthlang lama tla turin a hniam ruai ruai tawh a. Colonel Dyer chu a sipai rualte nen Jallianwala Bagh chu an rawn thleng ta rup mai a, mipui luhna kawngka pui ber chu an dang chat a, mipui pungkhawm chu minute 10 chhung zet mai an kap ta chiam mai a, mipui hlau tlanchhe turte pawh chu an kap zui ta zel bawk a ni.

Silai vawi 1600 chuang a puak a, mi 1000 chuan zet silai kah leh tlanchhiat tumna lama inchil hlum an awm a. British ho thu chhuahah erawh chuan mi 379 thi angin official-in an record duh lek a ni.

He thil rapthlak tak avang hian Mahatma Gandhi a hmulthi a ding sung sung thei a, British ho a rinna chu a kiang nghal duak a ni. Tichuan Non-Cooperation Movement a tan ta nghal a. India mipuite hnena a thutiam chu India ram tana mahni ro inrelna famkim(swaraj-complete independence) niin chutiang tur chuan hma an la chho ta a. India mipui zawng zawngin office leh thilsiamna boycot, British ho enkawl school chhuahsan vek, British bungraw hnawl vek leh kawng hrang hrangin an bei chho ta a ni.

Leave a Reply