KA FAPA NUPUI I ZAWN HUNAH CHUAN

Hripui leh Lirnghing in min chim buai reng mai hi zawng, ngaihtuahna fim put a har zawng a nih hi, tun tum chu heti zawng hian ngaihtuahna han seng tlang daih teh ang.

Nupui tur i zawn hian an eng lai hi nge i en thin? An eng hi nge i duh chhan ni? Ka fapa nupui tur i zawnin an awm bawr leh mawng bawr vel enin em ni, thutlukna i siam dawn? Chutiang thlira nupui i zawn chuan i tifuh lo hle thei a nia.

Lang theia hmel mawina thlira nupui i neih chuan, i neih atanga kum 5, kum 10 a vei hnuah meuh chuan a that ngaiin a tha reng dawn lo va, a chuaiin a danglam tawh dawn a ni, tih hria ang che.

A rilru put hmang leh a thluak a tha em, tih thlirin i zawng dawn nia. Tu mah hian hma lam hun kan sawi thei lo va, a chhe ber i tawh hunah pawh dawh thei taka hmangaih theitu tur che a pawimawh a ni. A thawk thei lo zawka i lo tang ta palh a nih pawha ei leh bar zawng thei tur hi an pawimawh a nia.

I nu hi han en la, hmanah chuan awm bawr leh mawng bawr khal tha ve tak a ni asin. Tunah erawh chuan i hmuh ang hian a dep zo ta. Hmel mawina chu chuai thei a ni e. Hmuh theih loh a rilru, a thinlung a that avangin heti ka ni chung pawh hian mi phatsan lo va. A thluak a that avangin hna thawk thei lova ka awm hnu pawhin kan chhungkaw ei bar tur a zawng thei asin.

Ka fapa, hmeichhe sum ngaina thin lakah fimkhur ang che. Chutiang hmeichhia chuan an sam siam danglam an duh reng a, thawmhnaw thar an duh reng a, pheikhawk manto bun
an duh a, hmai hnawih tur chi hrang hrang an duh thin. Chutiang mamawh kher lo, chhungkaw dinpui tur hmeichhia chu an pawimawh a nia. Ro sum um thin hmeichhia nen chuan chhungkaw nuam a din theih loh a nia aw.

I nu nena kan inneih lai hian ro sum ka nei lo. In leh lo ka nei lo. Lehkha thiam tak ka ni hek lo. Mahse, hma thlir erawh ka nei ve thin. I nu hian chu ka hma thlir neih ve chu hlawhtling turin min tanpui thin a ni. Thawk thei tur pawhin hma min lakpui thin a ni. Chu vang chauhva tun dinhmun hi ding thei kan ni asin.

Ka fapa, chhungkaw nuam din tura pawimawh ber chu inhmangaih tawnna a ni. Chutiang tura chhungkaw dinpui turah chuan, i hma thlir leh i duhna hlawhtling tura hma i lakna kawnga hre thiamtu tur leh tanpui theitu tur che i mamawh ve dawn a ni. Hun khirh leh harsatna hmuna i din huna hre thiamtu tur che hmeichhia chu i tana pawimawh ber a ni. Nupui tur i zawn hunah chuan lang thei hmel mawina mai thlir lovin hun harsa leh hmun hreawma i din lai pawha hre thiamtu tur che, hmeichhia chu nupui atan i zawng dawn nia aw.

Leave a Reply