KALPHUNG HRIAT

– Amah Zira Chawngthu

“Engkim hian kalphung a nei,” han ti phawt mai teh ang. Chutihrual chuan, kalphung pel (kalphung lo deuh) a kan tih avanga kan awlsam phah zawkna leh, kan harsat phah a, kan buai vek tum pawh a awm àwm e. ‘A àwm chin’ leh, ‘a tur ve reng’ te hi kan thliar thiam a pawimawh hle bawk mai. Khawtlang/Kohhran/Pawl hmasawnna kawng kan zawhna tur atana hmalâkna leh, hnathawhnaah pawh ‘kalphung’ kan hriat chuan, thil reng reng hian ‘a nih dan tur’ hi a ni hma bik a, chumi baka kawng awlsam zawk kan la hria a nih ngat phei chuan, kawng awlsam zawk na na na chu kan awlsampui fo ang tih a rin theih awm e. Eng hna mai pawh hian ‘kalphung’ a nei tih kan hre thûm awm asin. A ni lah taka, hlo thlawha, hnuhchheh dan thleng mai hian kalphung a nei ve reuh a, Japanhlo hrui han vawm darh chuai(h) mai te hi ‘a nikhua loh thlak’ ngawt mai. A ni e, Chemkawm elh leh, Vawkte til lâk atanga Nuclear Bomb siam dan thleng mai hian kalphung a nei miau mai si a, chuvangin, kawng engkimah hian ‘kalphung hriat’ hi kan tùm a, chumi chu kan záwm a, chu kalphung ang chuan kan kal ngam a, chumi dan ang a hun kan hman hram hram a tha ngawt mai.

Chutiang zelin, pawl hrang hrang awmin, tihdan hrang hrang nei mah ila, Committee erawh chuan kalphung bik a neiin, ngaihdan saw turte’n, “Pi/Pu Chairman..,” tia chairman address thlap zel hi eng pawl committee-naah pawh ‘a committee kalphung’ viau mai. Agenda pakhatah tum hnih tum thum kan ding dawn a nih ngat phei chuan, “Rem i tih chuan, Pi/Pu chairman…,” tia bul kan tan fo hi a kalphung hle bawk.

Chutihlaiin, Adviser-te hi committee member an nih ve miau loh avang leh, thu keuh tlûkna harsa deuh a awm châng leh, committee chairman-in thutlukna siamah ‘mawh’ a lak ngam meuh lohna ang chi-ah te, ‘tihngaihna’ a hriat bik loh thilah te, thu inchuh a awm chânga thutlukna mumal an neih theihna tur atâna ‘thurawn petu (adviser) tur’ an nih avangin, committee tan veleh atanga ngaihdan sawi ve tura chairman tan pawha sawm ngawt chi an ni lo tih hriat te hi a tha awm e. Tin, chairman-in, thu a ngah lutukte, agenda tih tluk duhna bik a neihah din zut mai te hi ‘a committee kalphung lo hle’ tih hriat tel pawh a tha in, committee a tihawlsam leh awlsam loh a innghat thui hle bawk tih hriat a tha fo. Chutiang bawkin, committee member ni ve ang ziazânga committee member kâra adviser an din ve zút te hian, ‘adviser nei lo va committee’ a ti ang zo va, awlsamna thlen a hnehin thil a tikhirh zo vek thei bawk tih hriat hi a tha ngawt mai. Chutiang ang bawkin, kawng engkimah ‘kalphung’ kan hriat chuan, awlsamna leh hahdamna, lungawina leh lungrualna, thawhhona tha leh hmasawnna a thlen thei tih hria a.

‘Dan hriat lohna’ leh, ‘kalphung hriat lohna’ hi chhuanlam a tling lo va, a tuartu chu keimahni bawk kan ni tih kan hriat a tha a. Ka’n tarlan tak zingah khian dik lo a awm a nih chuan ‘kalphung ka hriat loh vang’ tho a nih dawn avangin, sawisel tâwk tur pawh keimah tho ka ni ang bawkin, keini a kâra chawmpang kâr a mi thu hla lo ngai hawtu anlo awm a nih ngat chuan ‘a kalphung hriat loh thlak’ hle bawk ta ve ang.

Leave a Reply