KAN HLIAM A DAM LO

– Zomuani Pa

Kan tunlai boruak leh a chheh vel hi i han sakhi chul ram fan puat puat teh ang. Lehkhabu erawh kan keu hman tawh loh avangin a kum, ni leh thla (facts and figures) erawh kan pehhel deuh zel ang.

Mizoram luah hmasatu nia hriat Reng leh Mirawng ho khan thlang an tlak zel avangin tuna a luahtu Mizote hi a ram neitu dik tak nihna neitute kan ni a. Kan chheh vela European hovin sumdawnna ropui tak tak an kalpui mup mup lai pawhin he ramah hian zalen takin kan khawsa a ni. Mizoram hi a ram a chheng chhiat avangin British India ho khan luhna tlakah an ngai lo nge, an Regulation Act pass thar te avanga ram an lak belh tak loh vang zawk, hun rei tak tlawh pawh lohvin kan awm a. Chuvang tak chuan changkanna kan hre har a, British India vanglaia khawvel thang chhuak khawpa Calcutta Dalhousie Square leh a chheh vela sap nula nalh pui puiteā€™n nuam an tawl tawh hnuah pawh chapona puan sinin milu kan la lam hep hep ve chauh a ni. Ram tha zawk leh sumdawnna hmun inchuhin Hooghly luipui kam velah English leh French ho an indo a, Plassey phai ruamah te 32 pounder laipui vela an insai dawp dawp tawh laiin keini chuan silai tha pawh kan la nei mumal lo. Chutianga hun kal zelah he Lushai Hills hi awp beh (suppress) a lo tul ta a, kum 1871 velah vai lo lianin sap hmel kan hmu ve ta hram a ni. British ho khan an chheh vela hnam tlem zawkte kha humhalh nachang an lo hre khawp mai a, keini pawh Bengal Frontier Regulation Act 1872 in hnam a humhalhte zingah kan awm ve a ni.

Vawiina kan buaina Chakma te hi Chitagong Hill Tract leh Arakan velah an awm thu hmuh tur a awm thin a, vailian sap ho khan puak phurah an rawn hmanga sawi a awm. Eng pawh nise he ramah hian mikhual takin an rawn lut a, anmahni lo hrechiang hmasatu British ho khan a huhova khua an din phal lovin Mizo khaw hrang hrangah tlem te tea sem darh an ni thin. Hun kal zelah hnam fing hmasa Sap hovin min vil thei ta lova, chutiang karah chuan phingphihlip puang ang maiin Mizoram leh Bangladesh inrina velah khuan an puang ta hluai mai niin a lang. Kan rama chanvo tha tak an lo neih tak dan erawh sawi hun a ni lo.

India ramah hian dan hi a tam em em a, misual ber pawh hrem hleih theih loh khawpa danin a chhan chang a awm. Kan Indian pui vai ho hian dan hi an palzam thiam khawp a, anmahni thatna tur zawng pawhin an her rem thiam. Khawpui lian fe fea University tha tak takah te pawh hian DC office vela harsa fea kan va lak ve Tribal certificate te hi awmzia a awm miah loh chang a awm.

Mizoramah hian dan hi kan zah em em a, kan sakhua avangte pawh a ni ang a langa mawite hi kan zawng nasa. Chhungril verther hle si hian kan intuam mawi nasa khawp mai. Chu lan mawi kan tumna chuan tunah pawh nasa takin hnam pawi a sawi mek a ni. Dan hrulah hian ram leh hnam tan thahnemngai taka chet dan hi a awm thin a, dan tha tak tak a inthuahthip khep khupna khawpui liana an University ah te pawh zirlai pawl ho duhdan bawk hi a ni an zawm leh fo thin chu.

Tuna kan tawn buaina ang a thlen chang hian tam tak chuan Mizote hian kan tan lehzual a ngai a ni mai tiin kut an kuangkuah thin, a dik. Chu aia la dik zawk chu kan buaina chhan a zung nena kar phawnga siam tha tura hmalak zawk hi a ni. Mizo harh ang u.

Leave a Reply