KAN HRIATTLAN A TAN

– C. Darthankima
Chairman, Local Council

Pathian kaih hruaina leh venna a zarah hei kum chanve kan lo chuang kai leh dawn ta reng mai, hun tha leh hlu min pe tu Lalpa chu fakin awm rawh se.

Veng mi thahnemngai te avangin Veng in hma kan sawn zel a, chu lam zawnga tan la sauh sauh turin kan insawm hmasa duh a ni.

Kan JAC leh Local Council te hma lakna in veng lun lai ah CCTV dah tum a hma lak mek a ni a, hetihlai hian tlem a nei deuh ten kan in ah CCTV dah intihhmuh ila ava tha in a van tangkai dawn em!! Tun a lo vuah chhun te a zarah pawh misual tu te emaw chu man chhuah an ni tawh a, a lawmawm khawp a ni.

Garage chungchangah mi thenkhatin dan kan zawm that em em laiin, thenkhat dan la zawm tha duhlo kan la awm fo mai a, a pawi kan ti hle mai. Traffic Police atangin Wheel Clamp Local Council ten tunah hian panga (5) kan kawl a, thu awihlo te chu (Dan zawm lo te) kan chep hmiah hmiah mai dawn a ni. I motor kan lo chep a nih pawh in i thinlung lo ti na lo turin kan in hrilh nawn leh a ni e.

Bawlhhlawh chungchangah Local Council ten hmun lun laiah Dust-Bin an dah a, hei hi kawng kal ten bawlhhlawh an paih khawmna tur a ni a. |henkhat in an Family bawlhhlawh bawm emaw ti a lova hnawhkhat leh tlat kan la awm fo mai a, hei hi ching tawh lo hram teh ang u.

Bawlhhlawh phur motor hi chawlhkar khatah vawi 5 tlan tura tih kan ni a, vengchhak lamah – Monday, Wednesday, Friday in a tlan thin anga, Vengthlang lam (YMA Road thlang lam chin) ah Tuesday, Saturday ah a tlan thin ang. Bawlhhlawh phur te hian dar thinrik aiah hamrik an ham thin zawng ang. Bawlhhlawh phur motor ah hian leivung leh insakna tawp hnawk paih tel phal a ni lo.

Ranvulh chungchangah- a biktakin ui vulh tu te kan la in thlahdah deuh a, a pawi khawp mai. Tun aiin i fimkhur deuh teh ang u. Vengti tawptu nih loh i tum teh ang u.

Vengin hma kan sawn zel a, in sa thar te pawh kan awm deuh reng tawh a, kan in sakna bungrua te midang tana hnawk lo thei ang ber zela dah kan tum tlan a pawimawh khawp mai.

A tawp nana kan sawi duh chu chhungtin ten kan in leh a vel phiahfai/vawnfai in tihhmuh teh ang u. Lui kawrah bawlhhlawh paih lovin, a paih tu te i hau ngam theuh bawk ang u. Kan ek in te midang tana rimchhe lo turin i ti hram hram bawk ang u.

Ka lawm e.

Leave a Reply