KAN LA HIMLO

Kan khawvelah hri hlauhawm a leng a, chumi avang chuan March thla chawhnu lam atangin Lockdown hman tan a ni, nun phung pangai a hun kan hman lohna chen pawh thla hnih a liam dawn ta reng mai. Covid-19 kan hriat tirh kha chuan mi zawng zawng kan phawklek a, kan rilru a buai a ni. A theih ang angin mitin ei leh bar lam kan inla khawm a nih kha, Mizoram ah kai kan han hriat phei kha chuan kan hlauthawng in, a theih chin chin ah kan fimkhur tlang a nih kha.

Sawrkar thupek kan awih avang te leh Pathian venna kan chan avanga kan ram ah kai thar tun thlengin kanla awm leh lo erawh a lawmawm viau mai, chumi avang chuan kan rilru put hmang leh kan ngaihdan leh awm dan te pawh a lo danglam in, nunphung pangai in hun kan hmang leh tan ta, a lawmawm angin lang mahse he Covid-19 hi ram dangah chuan kian zai ala rel lo tih erawh kan hriat ava pawimawh em. Nitin kai thar anla pung thur thur si.

Sawrkar thu chhuak angin mahni ram theuh ah haw khawm zai kan rel mek a, State danga kai thar kan hriat te chu hmun dang atanga haw thar an ni deuh tlangpui, keini ramah ngei pawh kan unau te mi engemaw zat an rawn haw mek in, an rawn thleng nual tawh bawk a nih hi. Hetiang a nih avang hian kan dinhmun tur hi huai taka sawi ala har khawp mai, kan thla hi a muang sual ang tih a hlauhawm hle a ni.

Rawn haw thar te hian an rawn vei haw ngei ang tihna lam ni lovin, he natna hi lang chhuak mai lo, Quarantine hun zawh hnu a lang chhuak chauh te pawh an awm tih kan hriat tawh kha, thu neitu ten invenna an sawi hi kan ngaih pawimawh deuh deuh a hun zawk a ni.

Lockdown thawh li-na kan hman mek ah hian in khuahkhirhna tlem in thlahdul deuh mahse mitin te kan fimkhur zual a ngaih hun lai tak a ni. Kan him theihna pawn a chhuah tam loh tih te, kut silfai ngun te, hmai tuamna hman that te leh midang hnaih taka awm loh hram hram te hi kan zawm hram hram ava pawimawh em.

He hripui Corona Virus (Covid-19) lakah hian kan la himlo a ni tih hi kan hriat a, kan pawm ala ngai, thahnemngai taka kan la do hram hram a ngai a ni.

Thupek ngai pawimawh lo tu, Covid-19 pu darhlo tu nih kan tum hram hram a ngai a ni. Lo theih loh avangin kan eizawnna avang te pawhin kan chhuah ngei ngei a ngai a ni mai thei, kan thenawm lawk ah nitin kai thar a ni telin anla pung tih hi i hre thar leh ang u.

Kan la himlo tih hi inhrilh nawn leh theuh ila, kan awmna theuh ah fimkhur takin hun i hmang theuh ang u.

Leave a Reply