KAN MAWHPHURHNA

– C. Lalrammuana, Fin. Secretary
NYMA

Nursery vengah hian mi chi hrang hrang, ngaihtuah zawng pawh inchenlo fe fe, khawsak phung pawh in anglo tak tak te pawh kan chenghoin kan khawsa tlang a, kan khawtlang chhiat that ah mawh kan phur tlang vek ani. Chutiang awmkhawm kan nih avang chuan kan hmasawn duh dan kawngah pawh kan rilru inhmuh tawk loh na a awm fo ang, in ep mai lo a thawhho, tanrual dan kawng kan ngaihtuah chhoh zel hi kan veng tana pawimawh lian tak ani. Hmasawn chho zel tur kan nih vang chuan a mi cheng te pawn kan rilru kan siamthar a,khawtlang tan enge ka tih ve theih ti rilru pu chunga kumthar kan hman chhoh zel hi a pawimawh hle awm e. Faina thianghlimna kawngah pawh tunai a tan kan lak thar a,kan inbul side drain te pawh YMA Section hnatlang a tihfai mai tur a dah mai lovin, kan ko ah kan dah thiam chhoh zel hi a pawimawh chho zel dawn ani. Tin, kan bul kawngko samfai te pawh hi YMA hnatlang a thawh mai tura dah lo in kan kutah dah ila, a khat tawka tihfai fo te hi tum thin ila, kan veng chu veng fai, thianghlim reilote ah kan ni chho mai dawn ani.

Thingtlang hmun tam tak ah faina lam ah tan an la nasa em em hlawm a, khawfai lawmman te an dawng pha hial a, an hmalakna han hriat hian tih takzet in tan an la tih a hriat a, an khawtlang thawhhona a tha tih ahriat em em thin. Chutiang in kan veng pawhin tan kan lak ve tak tak chuan Aizawl a veng fai ber ,veng dang pawh in a an rawn entawn ve theih hial khawp in kan siam ve thei a, hmalakna tur erawh tam tak kan nei a, chutiang ang rilru pu tur chuan chhungtin te kan harh thar tan kan lak thar a pawimawh hle ani. Kan in bul lungrem te, step te pangpar ni lem lo hnim in an bawh chuk mai hmuh hi chuan faina kawngah hian tan kan lak thar ala ngai hle mai tih hi alang a, section tin te faina kawngah hian tan la thar leh ila, Section te pawh faina kawngah hian rilru thianghlim tak pu in in el bawk ila, tun ai hian hma kan sawn ngei ang. Mimal thahnemngaite hi han awm nuk ila,kan veng lungrem te hi rawng te han hnawih thar vek mai bawk ila, kan veng chu ati chei khawp ang. Chutiang ni tur chuan veng inlungrual, veng tangrual ni a, hmasawnna lam kawng chu kan pan theuh theih beisei ila, beiseina nen tan la in vengchhung nu leh pa, thalaiten mawhphurhna kan nei theuh tih hre thar in, veng fai, veng entawn tlak ni turin tan i la thar leh theuh ang u.

Leave a Reply