KAN THEN TAK PU MALSAWMTLUANGA CHANCHIN

Malsawmtluanga
Pu Malsawmtluanga

Pu Malsawmtluanga hi kum 1957 15/3 khan Baktawng khuaah a lo piang a, a pa hi Rothangpuia a ni a, a nu hi Lalduhawmi a ni. An unau hi 5, Mipa 2 leh Hmeichhia 3 an ni. Kum 1988 January ni 13 khan Zosangpuii d/o Sangliana, Champhai nen inneiin fa pathum (3) an nei a, tu pakhat an nei tawh bawk.

Primary leh Middle School hi Baktawngah kalin a pa hi zirtirtu a ni a. Kum 1975 ah DIET Practising School Aizawlah transfer a ni a. Chuvang chuan an chhungkuain Aizawlah an rawn pem a. High School chu JL High School ah kalin HSLC tha takin a zo a ni. Pachhunga Govt College ah a zir laiin eizawnna lam buaipuiin contract hna a thawk ta a, BA hi a zo hman ta lo a ni.

Bungkawn ME School ah hun rei vak lo a thawk a, amah hi mi taima leh sumdawnna lama tui tak a nih avangin a hna bansanin Jeep reconditioned te leiin thingtlang lamah Supply buhfai a thiar thin a. Chumi hnuah Aizawlah Taxi a rawn awm tan a, Taxi te lei vein a enkawl bawk. Motor lam hi a tuina zawng tak a nih avangin Truck (TMB) te leiin tluang takin hun rei fe chu a enkawl bawk a ni. Truck a enkawl hnu hian Bus hmanga eizawnna lam a bei leh a, tun thlengin Bus pakhat service lai an la nei. Lirthei hmanga eizawnna bakah tunah hian Steel Fabrication dawr enkawl lai a nei bawk.

Mizorama motora eizawng ten harsatna kan tawhte sukiang turin Commercial Vehicle Joint Action Committee hi kum 2013 khan din a ni a, hetah hian Pu Malsawmtluanga hi Chairman atan ruat a ni. Ani ho hian hmalakna hrang hrang neih niin a khaipa berah tangin member-ten innghahna’n taka kan hman a ni. He pawl hi huam zau zawka hma lak niin kum 2017 ah Mizoram Commercial Vehicle Union tiin a hming thlak a ni a. Pu Malsawmtluanga hi vawiin ni thleng hian chairman a la ni bawk.

Pu Malsawmtluanga hi Aizawl City Bus Owners Association (ACBOA) ah hian kum 2000 khan Executive member ah lakluh niin kum 2001 ah Secretary ah ruat a ni leh a. Kum 2004 – 2006 chhung khan Gen Secy ah ruat a ni leh a, kum 2010 – 2018 chhung khan President atan thlan tlin niin kum 2021 April ni 7 atanga vawiin thleng hian President nihna a chelh mek bawk. Pu Malsawmtluanga hi mi inpe, pawl tana theihna zawng zawng hmang ral thak khawpa mi inpe, City Bus member ten harsatna an tawh changa an han phone hian dar zatin a tibuai ve lova. Zing dar 2 ah pawh ni se a mu lai hi a tho nawlh a, pa chan chang takin member harsatna tawkte tanpui turin a tlanchhuak nghal mai thin mi a ni.

Pathian leh kohhran rawngbawlna lamah hian a pu Pu Chalchhunkunga hi Baktawng khuaa Salvation Army dintute zing a mi a ni a. Aizawla an rawn pem hnuah a pa Rothangpuia te hian Gilgal Corps hi a bul an tan ve leh a. Hetah hian a tleirawl lai atanga inhmang ve in SAY rawngbawlna lamah pawh theihtawpin a lo inhmang ve thin.

Khawtlang lam thatna tur hian a phak ang tawkin thahnemngai takin a thawk ve thin a. Bungkawn Veng atanga Nursery Veng indanna tur khan a sulsutute zingah tang ve in kum 1997 khan Nursery Veng Village Council hmasaberah member ah thlan tlin a ni a, Kum 1999 ah thlan nawn leh a ni. Village Council ah hian Vice Chairman nihnate pawh a chelh ve thin. JAC ah hian hun engemaw chen hruaitu a lo ni ve thin a, Nursery Veng Consumer Union ah hian hruaitu a ni ve thin bawk.

July ni 31, 2021 khan Covid 19 a kai tih hmuhchhuah a ni a, home isolation in ni 2 a awm hman a. August ni 3 ah a Oxygen level a hniam deuh avangin ZMC lamah enkawl tura lak phei a ni. August ni 4-ah Oxygen level a san theih loh avangin ICU extension ah dahin Ventilator a thawktir a ni. Zual lam a pan zel avangin August ni 8 ah ICU ah dah luh a ni. ZMC thawktuten vil rengin that lam a pan thei ta lova, August ni 14 tlai lam atanga hniam lam panin August ni 16 hian ropuina ramah min lo kalsan ta a ni.

Leave a Reply