KAN VENGAH AUTOMATED TELLER MACHINE (ATM)

– Romalsawma (Y-Section)

Bank a kal kher lova bank account atanga pawisa lakchhuahna khawl, Automated Teller Machine (ATM) kan tih hi kan bengah a mikhual lo viau tawhin a rinawm. Kan vengah ngei pawh kan khawtlang hruaitute thahnmengaihna avangin State Bank of India (SBI) chuan ATM an rawn hung ve dawn ta a, a lawmawm hle a ni. Tunah hian peihfel tep a ni tawh a, November thla chhung ngeia hawn hman ngei tur beisei a ni. Nikum tun ang hunah khan hawn hman tura beisei kha a nia, amaherawhchu pawisa note thihna (demonetisation) avang khan bank lamah hna duh angin a chak thei lo a, kum khat dawnin a khaw tlai phah ta a ni.

SBI chung chang bik hi han sawi ta ila. ATM Card atangin han sawi tan ta ila – SBI hian tun hma chuan ATM Card thar emaw a thlakna tur kan dil emaw chuan account kan hawn laia kan address ah khan ATM Card thar an rawn thawn thin a, ATM Security PIN erawh hi chu bank ah lam a ngai thung thin. A ruala kan dawn loh thinna chhan chu Security thil vang a ni. I ATM card leh PIN kha a rualin rawn thawn ta se, midang daihin lo dawng palh ta se, I pawisa zawng zawng lakchhuah theihna hun a nei thei tlat a, chuvangin a rualin an rawn thawn ngai lo a ni.

ATM card I tibo emaw I tichhia emaw a nih chuan i card chu i block ngei dawn nia, i block lo a nih chuan ATM Card fee kum tina chawi thin kha i neih tawh loh card hmang khan i chawi reng thei a ni. Bank account pakhatah ATM pakhat aia tam a siam theih a, amaherawhchu ATM card fee hi kum tin chawi a awm thin tih hriat erawh a tha.

Tunah chuan lehkhapuan renchemna leh security a that zawkna avangin ATM PIN hi mahnia siam chawp turin an rawn ti leh ta a. Hetianga mahnia PIN siam tur hian kan account hawn laia kan mobile phone number kha kan hman ngei a ngai. Mahnia ATM PIN insiam dan hi chi hrang hrang a awm a, ATM khawl atangte, SMS hmangte, phone call hmangte leh Internet banking hmangtein a siam theih a ni. Account kan hawn laia kan mobile number dah hi thlak mai mai tur a nilo a, kha number kha kan hmang tawhlo anih chuan mahni account neihna branch ah kalin kan thlaktir thin tur a ni.

Hetianga mahnia PIN kan siam hian kan ATM PIN lailawk (temporary ATM PIN) chu kan phone ah SMS hmangin kan dawng ang. Eg: Kan temporary ATM PIN chu 4567 ni ta se, SMS in Four Five Six Seven tiin SMS kan dawng ang. He temporary ATM PIN hi ATM khawlah chuan pawisa lakchhuah nan leh thil dangah pawh kan hmang thei vek tho a, mahse darkar 48 chhunga thlak ngei ngei a ngai a, kan thlaklo anih chuan a bul atanga PIN kan siam leh a ngai ang. Hei pawh hi security thil vang bawk a ni.

ATM pin kan thlak dawn a nih chuan ATM khawlah kher thlak a ngai thung. ATM PIN hi number pali kan hriat awlsam theih tur hi hman theih ngei a tha, lehkhaah emaw ATM card ah emaw a bawmah emaw ziah loh tur a ni. ATM PIN mahnia siam dawn hian SMS dawn theih miahloh chang hi a awm ve a, hetiangah hi chuan mahni account neihna branch ah kal tur a ni a, a PIN chu paper in an lo pe ang che. Hei pawh hi duhthusamah chuan ATM khawl atanga thlak nghal nise, bank in an lehkha min pek chu pawhchhiat nghal nise a him ber. ATM PIN lehkhaa inziak kan dawn emaw, kan ziah chawp pawh nise midang hmuh miah loh tura kan dah reng thei a nih dawn loh chuan ziah loh a tha. Mahni number hriat theih zawnga ATM PIN siam mai hi a him ber a ni.

ATM khawl lam chianloh vang emawa I pawisa lakchhuah tur a buai a nih chuan, hun reilote han nghak leh hlek la, a lo lut leh tlangpui a, ni 7 chhung pawha I account ah a lo lut lo a nih chuan I account neihna branch ah I kal dawn nia. I hriatloha miin I pawisa an lolak chhuahsak che a nih chuan Police ah FIR I thehlut anga, I FIR thehluh copy nen chuan I account neihna branch ah I kal dawn nia. Kan ATM card neihna Bank ATM hman hram hram hi a tha ber a, engemaw buai a awm a nih pawhin chinfel a awlsam bik thin.

ATM ah hian kan card azirin ni khata pawisa lakchhuah theih zat hi a hrang hrang a awm a. A tlangpuiin ni khatah Rs. 40,000/- kan lachhuak thei. Kan pawisa lakchhuah theih zat a nih avang hian vawikhatah Rs. 40,000/- lak nghal tum te kan awm thin a, hei hian buaina tam tak a siam thin. ATM room ah hian ‘Vawi khatah Rs. 10,000/- aia tam lakloh tur’ tih a intar thin a, hei hi zawm hram tur a ni. Hei hi a chhan chu, Rs. 10,000/- aia tam lak tum hi chuan a rawnchhuahna kuaah hian a lenglo thin a, hei hian a khawl a tibuai a, a siamtu an kal hma loh chuan kha ATM atang khan a lak chhuah theih tawh thinlo a, hei hian midang tan buaina tam tak a siam phah thin.

Tun laiah chuan internet ah kan bazar a, ATM card hmangin kan thil leina man kan pe fo. Hetah hian tam tak kan fimkhur tawk loh avangin misualin min bum thin. Internet bazar rintlak loh leh mi hriat hlawh vaklo hote hi a him duhlo fo. Misual thenkhatin eng tin emaw i ATM card number an lo nei thei a, i phone number thlengin khawi atangin emaw an lo nei thei a, chumi hmang chuan internet a thil lei emaw, digital wallet ah te pawisa dah an lo tum thin. Bank lam hian eng lai mahin secret PIN leh account number te zawtin an customer te phone in an be ngai lo tih hriat tur a ni.

ATM Booth/room hi felfai leh zahawm taka vawn tur a ni a, a chhungah hian security camera kil hrang hrangah dah vek a ni a, hei hian card inruksak vanga thubuai awmah leh card bo chung changah nasa takin hnu chhui a tiawlsam thin. Kan vengah pawh ATM a hman theih hunah chuan, a enkawl leh venhim kawngah veng mipuiten mawh kan phur sang dawn hle. Lehkha rawn chhuak paih hnawk nuaih maite hi a mawi lo hle mai a.

Kan venga ATM hi mimal ina dah a ni dawnlo bawk a, veng mipuiiin kan intawm, VC Hall ah dah a ni dawn a, hei vang hian a enkawl pawh veng mipui te’n kan mawhphurhna ah kan dah theuh dawn nia. Veng dang mi pawhin an rawn hmang ngei dawn a, anni chuan an paih darh nuaih pawh a ni thei, vengchhung mite chuan bawlhhlawh bawmah kan paih mai piah lamah, midangin an paih a nih pawhin, kan chhar ang a, a bawmah kan paih mai thin dawn nia. ATM hi khawl thil a nih avangin enkawl danin a zir loh chuan chhe mai thei a ni. Uluk leh dimdawih takin kan enkawl ang a, keimahni vengah ngei kan mamawh ang zelin kan bank account atangin pawisa kan la reng thei mai dawn a ni.

Leave a Reply