“Kei ka kal e….”

– Lalrinzuala Chawngthu

Kan pi leh pute hunlai chuan Vâl Upaten tlangvâlte hnênah, “Chumi khamiah chuan kal a ngai e,” an tih tawh chuan, “Kei ka kal e,” tlangvâl tlâwmngai pakhatin emaw rang takin a ti thuai a, “Kei ka zui e,” midangin an lo ti a, khawmuang loin an che chhuak nghâl thin niin Vairêngte khaw pa pakhat chuan a sawi.

“Hmânlai Mizote ai khân thangthate hi kan tlâwmngai lo zâwk” tih sawi a awm fo thin a, a chunga pa pakhat thusawi khi a dik ngei a nih chuan a dik ka ti a. Min thlahtute tlâwmngaihna kha kan theih ang tâwka chhawmnung leh chhunzawm nia kan insawi fo lai hian tlêm tlêm chuan a dal hret hret a ni tih kei chuan ka pha ngam hauh lo. YMA thil tul a awm châng leh chhiat that kan tawh nikhua apiang hian nulâ tlangvâl thenkhat chu tirh nih hlau hmel tak kan awm ziah niin ka hria. Mahni thua thil tul tih nachâng hre lo; kawng kawhhmuha tih tum chuang miah lo te pawh kan awm nawkin ka hre bawk thin.

Mitthi an awmin bungraw hman tur hrang hrang lâk khâwm a ngai ziah a. Sawi leh inhrilh ngai miah loin nulâ tlangvâl thenkhatten bungraw mamawh mahni thua lâk nachâng an hria a, phûr vang ni miah si lo; a tul vang leh mahni mawhphurhna hriat vanga che vat vat hmuh tur an awm hian nu leh pa te tân hmuh kan nuam a, an thlâ kan timuang fo thin. Chutihlai chuan hrilh chawp tlâwmngaihna erawh a tlo lo hle thung a, mi hmuh/ awm lai leh hmun langsârah chauh an tlâwmngaih thin avangin fianrial leh mal tlatna hmunah an chhunzawm peih thin lo fo.

Tribal society ni thin kha khawvel hmun danga chêngte chezia leh nunphung kan dan theih bîk lohin min kaihhruai ve miau avangin market society-ah kan lût ve tawh a. Hmânlaia chawhmeh ilo insuah leh inthartem mai thin kha tunah chuan lei leh hralh loh chuan engmah a thlâwna inpêk a awm tawh meuh lo. Kan ngaihtuahna pawh changkân châknain min hruai a, chu chuan materialism khawvêlah min hlâng ve ta a, tunhmaa mi tlâwmngai, zaidam, huaisen, mahni thawh chhuaha mi hlawhtling te kan ngaihsân thin kha lo danglamin lirthei/in leh lo/thuamhnaw/ bungrua nei tha tha kan ngaisâng a, an sum lâk luh nêna inmil hauh lo neinung hlea kan hriatte chu kan zah ru tlat bawk. He kan ngaihhlut leh ngaihsân zâwng lo danglam ta hian kan tlâwmngaihna pawh thûk takin a nghawng a, mahni inphata midang tanpui aiin mahni tanghma hai leh dam khawchhuah ve nâna theih ang tâwka beih ve kan tum a, chu vang chuan kan tlâwmngai hman ta lo niin a lang.

Hêng changkânna hrang hrang kan ûm mêkte ûm zêl chung hian kan Mizo tlâwmngaihna thlauhthla miah si loin a kal theihin ka hria a. Khawvêl a têt tial tial avangin hnam/ram dangte nên kan nungho nasa telh telh dawn a, an hnênah tunhma ni lo vawiina Mizo hnam nunphung hi engtin nge kan la sawifiah ang? Hnam tin hian pi leh pu atanga chhawmnun zêl eng nunphung danglam bîk emaw tak kan neih vek a, kan hnam nunphung tha lai hrang hrangte hi hnam dang chhinchhiah tlâka chhawmnun hi kan hnam damkhaw chhuahna tur, Mizo Nationalism lungphûm a ni.

Leave a Reply