KHA MI NI TAK KHA CHU AW

– F. Vanlalhriatrenga (Y-Section)

Thlasik rim la nam chiahlo mahse thlasik mau puah leh ta phawng ila eng tak ang ruai i maw! Fur khaw thiang mawi zia hahipin kan sawi fo a, fur ruahtui (Pathian malsawm ruah) a rawn tla a, veng tin, khaw tin, lei min leh kawng chhia vanga Zoram khawvel kan buai luai luai laiin ‘Siamtu Remruat’ tih hla phuahtu – amah C Lalkhawliana thu leh zai rimawi ka ngaihthlak meuh chuan, hringnunah hian ka buaiin ka lo va VUI nasa thin tak em tiin ka ngaihtuah hial thin. ‘A remruata innghat ringtute nun zawngah hian Vuina tur reng hi a lo awm lo e’ tih hla phuahtu Pu R Vanlalzauva nun hi tawmpui ka chak leh zual thin.

Zing dar 6:00 a lo ri a, kan ritleng darzam chuan min kaitho a, lak loh mai ka va nap em! Mut chhuak khan min kiansan bawk silo atin ni. Mahse chhuah vat ka ngai tih ka hre ran mai si a, kan nu in tooth brush leh ha siai min rawn pek laia ka hmai phih, mittui tla pur a sahbawn phuan in min velh takte kha aw! Sana ka en vat a, Vanapa Hall lam ka pan phei ta a, motor pakhat ka la chuan ngai reng reng lohna chuan min lo nghak ran tawh chu niin.. ka chuang lut chiah tih chuan ka hma a thu chuan MZP hruaitu a nih thu leh, kawngkhar bula ding chu YMA hruaitu a nih thu min hrilh nghal var a, tichuan kan tum ram pan chuan motor dang nen chuan kan chhuak ta a nih kha. Motor rui thin tih takah huphurh leh inring tak chung chuan ka’n in sawi ve ta a leh..kawng sira thlai zuar lo in phote chu ka zahin ka fak thin tehreng nen, kawchhung atanga lo chhuah chak, kei mimawl dan theih si loh ka atang chuan luak khum a tul ta tlat si a, tuma mawhphurhnaah ka ngailo lui ta a nih kha.

Tichuan le, Vairengte chu kan zuk thleng ta a, kan tum ram chu pan mai lovin kan hruaitute chuan ro fel tak relin ‘innghahkhawmna’ hmun chu kan thleng ta, kan thlengkim thawkhata an hriat hnu chuan MZP in ZO RUN an sak ngei chu kan pan thla ta a, a hmun thlen hmain hruaitute’n boruak sa deuh awmlo turin min ngen a, a hmun kan thleng tep tihin ‘ZO RUN chu an thiat tawh’ tih thawm kan hria chuan rilru a khawih hle mai. Vai huat vang nilova Zoram hmangaih vang zawka ka hnung zang a lung vawm ka tuar ve ta kha ka lawm letling zawk.

Tih theih ang zawng zawng tihfel thawkhat a nih hnu chuan rilru nuam fahran lo leh dam zan lo chung chuan Zoram chu ka hmangaih thar ta thut mai le.. ‘Ka bahhnukte khua leh tui ka chan ni chuan, hlan mai na’nge ka sakruang hi Mizoram tan’ tih chu ka rilru ah a cham ta vawng vawng mai si a. Hun leh ni, thla thlengin a her liam ve zel bawk a, kum rei pawh a la ni lo e.

September ni 15, 2014, zan dar 10:00 ah chuan, ‘KA BAHHNUKTE, KHUA LEH TUI KA CHAN AI CHUAN, HLAN MAI NA’NGE KA SAKRUANG HI MIZORAM TAN’ tih hla phuah chung leh mittui hnam zawih zawih chung chuan Zoram leh Zofa hmangaihna thinlung nen, ka tana zan khawharthlak tak mai kha ka tlaivar pui ta a.

Leave a Reply