KHANPUI KHUA AN RAWN LUANGCHHUAK

Y-SECTION CHHUNGA SEMTUTE (Y-SECTION COMMITTEE MEMBER)

Ni 23.06.2021(Nilaini) khan Khanpui khua te chuan, chawhmeh chi hrang hrang, thlai hnah leh rah te bakah, thei tuihnai tak tak te nen kan veng tan Luanchhuahna hun an rawn nei a, hemi atan hian Pick Up pali (4) leh private car te hmangin kan veng hi an rawn pan a ni. Heti tak maia Khanpui khawtlang te min hmangaihna leh duhsakna, kan tana an luanchhuahna hi ropui kan tiin kan va lawm tehlul em!!

Thilpek hlu tak leh lawmawm tak min pe tur hian khawtlang hruaitu pawimawh tak tak mi 14 lai an rawn tel a, kan veng tana thilpek min rawn hlan hi a chikim chuan, chi hrang hrang 32 lai a ni nghe nghe a, a va ropui tak em, kan lawm êm êm a ni.

Phût lêt leh beisei lêt nei hauh lova, an kutkawih hlu tak mai heti zat mai kan veng tana ui miah lova an sêngral hi a va ropui tehreng em!! Heti zo zai hi sumah chantir ta sela, sum fai engzat tak chhuak ang maw!! A tlem chhe viau in a rinawm lem lo hle a ni. Chutiang khawpa thilpek tam leh lawmawm, hlu bawk si hi keini veng hian kan dawng tawh rêng em le tih te min ngaihtuah tir a, kan veng tana an inpekna hian lawmna a ti nasa lehzual hle nghe nghe a ni.

Khanpui khawtlang leh hruaitute zawng zawng chungah hian, Nursery Veng LLTF mai nilo, a veng pum pui hian bang lovin lawmthu kan sawi tak meuh meuh e.

Khanpui atanga rawn kal te hi mi 14 lai mai an ni kan tih tawh kha, zanlai ah kan veng lam panin khua an rawn chhuahsan a, a tuk zing dar 5:45 velah kan veng rawn thlengin, Nursery Kawnah LLTF member te leh YMA lama dawngsawng a, inkawmkhawmna hun tawi te hmanpui niin, an bungrua/thilpek rawn ken te chinfel hna thawh nghal char char a ni bawk.

Pu Zokunga (Jka) te chhungkua Y – Section a mi te chuan, min duhsaktu Khanpui khawtlang aiawha rawn kal te leh anmahni lo dawngsawngtu LLTF leh YMA member te ei tur, tukthuan tuihnai leh chawhmeh chikim, duhtawka ei tura tam min buatsaih sak a, Pu Zokunga te nupa chungah hian kan lawm tak zet zet a, Nursery Veng LLTF chuan Pi Sangpuii te chhungkaw chungah hian thinlung takin lawmthu kan sawi mawlh mawlh bawk e.

Tukthuan eikham veleh atangin, Khanpui khawtlang te hnen atanga khawngaih thil thlawnpek lawmawm leh ropui tak kan dawn, thlai hnah leh chawhmeh chi hrang hrangte chu, vengchhung chhungkaw tinte hnena semchhuah runpui neih a ni chhunzawm lehnghal a ni.

Khanpui khawtlang ten duhsak taka kan veng tana thilpek min hlan hi a tam tham em em mai a, vengchhung chhungkaw tin hnena semchhuah tur a nih avang hian mihring pawh indaih a ngai hle bawk. Hemi semchhuah hna thawk tur hian, Branch YMA hnuaia Section tina Committee Member-te chu tlawmngai tura ngen niin, anni’n kan ngenna te tlawmngai taka ti hlawhtlingin, nileng thakin a semkual hna an thawk ve leh thung a, Branch YMA leh Section YMA te chungah kan va lawm em, bâng lovin lawmthu kan sawi mawlh mawlh e.

Hei chauh hi a la ni lo cheu, a semchhuaktu tura tlawmngai thei mihring kan awm hi a la tawk mai lo, a phurh kualna tur atan Motor kan mamawh a ni tih hria a, phal tak maia an lirthei (Motor) min hman tirtu te zawng zawng chungah hian kan va lawm tehlul em. Nursery Veng nih hi a nuamin a lo va mânhla tehreng em.

Hemi nia lama tlawmngai taka thilpek semchhuahna kawnga tha thawhtu te leh lirthei thawhtute zawng zawng chungah Nursery Veng LLTF chuan lawmthu kan sawi mawlh mawlh e.

Sd/-
Secretary
Local Level Task Force,
Nursery Veng

Leave a Reply