Khawhar In

– C. Lalnunzira

Kan vengchhunga khawhar an awm a, kan zai chungchangte leh tul leh tha nia ka hriat tlêm sawi ve thain ka hria, a bîk takin thalai hunah hian engatinge tui taka kan zai theih loh fo ka ti thin? Zânin chu kan zai tui hle mai, zai a nuam hle mai, han tih tur hi a vâng riauin ka hre thin, thalai aw tha leh aw chak zawk si hian engatinge nu leh paho zai kan tluk loh tlat le? Chhan tam tak a awmin ka hria chung zinga pawimawh zual nia ka hriat tlem ka’n sawi ve teh ang. Chutih karah chuan Khawhar In reng reng hi tui taka zai theihna leh zai harsat riauna a awm thin.

Chhan hrang hrang avangin, thalai hun kan tih hian nu leh pa te hian thalaite min kian hma mah mah deuh ni te pawhin a lang, a bik takin tlaivar zan hunah te hi chuan min han zaipui rei deuh thin sela chu a duhawm hle mai, chutih karah chuan nu leh pa te chu thalai tlaivarte hma taka thlak thin turin kan beisei a, duh aiin kan che muang mah mah em aw.. ka ti deuh.

Khawhar In kal chungchangah tun aia hma kan sawn deuh chu a pawimawh hle mai. Ruang thlak tlaiah pawh hian veng hnai nu leh pa te hi chuan khawhar chhungte eng eng emaw chhuanlam siama hawsan mai lo hian kan awm tlaipui hram hram hi a mawiin a tha a ni.

Kan zai taima lo a ni em?
Hei hi chu a chhan bulpui pakhat chu a ni ngei mai, khawhar Inah kan kal a nih rau rau chuan kan zai taima tur a ni, zai bak tih tur kan nei lem lo, lusunte hnem tura theihtawpa kan zai hi kan kal chhan leh kan tih tur chu a ni ber mai, kan hla hriat ngailoh an sa a nih pawhin thiam tuma khawhar hla zir nana kan hman thiam a pawimawh a, kan thiam chhun erawh phur tak leh uar taka kan sak a tul hle thung.

Khuangpute an tha tawk lo em ni?
Tha tawk e, kan khuangpute hi mahni kohhranah pawh khuangpu thang hlir an ni ang, hengho hian khuang hi han chuh chat zel sela midang hnawn buai lo hian, ‘a tlawngdung… tlawngdung’ vuakrem thiam nazawngin khuang kan han pu ve thin hian tlem chuan zai a tiharsa a ni tih alang reng mai, nge kan khuangpu thiamte an lang reng thei si lova thalaite hian inzir nan kan hmang ve ang? Tin, khuangpu ni tur hian khawhar hla hre tam leh hla lak thiam tak nih te pawh a ngai, thalai te aw mila hla lak thiam a pawimawh khawp mai, kan khawhar hla reng reng hi sang lutuka sak hian sak tui a har viau, chuvang chuan khuangpuin kan aw mil tawka hla a lak thiam a pawimawh em em a ni. Khuangpu ni tur hian thlarau mi nih te pawh hi a ngai em aw? Kan khawhar lenpui chhung reiloteah hian pawn lama awm aiin inchhung lama awm tam tum hram hram ila a duhawm hle bawk.

Kutben kan uar lo lutuk em?
Khuangpute pui tura kut kan ben thap thap hi ava tul em. Chu chuan phurna a siam a, hlimna a keng tel bawk, khuangpu hnunglam atanga kut benga lo puih hi khuangpu tan a nuam bika zai a ti nuam em em thin a ni; mahse, khuang rem taka ben thiam erawh a pawimawh hle thung. Khuangpute han nawr tan deuh chang te pawh a awm thin, chutih karah chuan kan nula hlahril thiamten thiam tak maiin hla han hril sela, kan zai reng reng hi Pawnpui sawr ang tluk tluk a ni tawh ngei ang. Rampum huap pawha zaithiam veng kan ni, veng dang atanga lo kalte pawhin Nursery veng zaithiamzia hi hre ve sela, Zaipawla kan zai chauh ni lo, kan Khawhar In zai ngei mai hi an hrilh fak lo ni ve mawlh teh se…

Kan nula tlangvalte mai bakah kan pa valai leh nu valai te pawh hian Khawhar In kal nachang hriain, tanlak i tum tlang ang u khai……

Leave a Reply