KHAWTLANG NUAM I SIAM ANG U

– Pu K. Lalngheta (A – Section)

A tul lova pawisa sen a nih loh nan leh kan hriselna tihchhiat a nih loh nan, a khua leh tuite that tlanna turin Sawrkarin halpuah hal a khap a. Hei hi zawm theuh tum ila a tha hle a ni. Vantlang leh Sawrkarin kan that tlanna tura tihtur leh tih loh tur an sawite zawm hi khua leh tui thate tih tur a ni a. Sawrkarin kan that tlanna tura ‘thil’ a khap kan tih luih hian kan thenawm khawveng tan harsatna kan siam mai bakah keimahni ngeiin a sawh khawk chu kan tuar a ni tih kan hriat tlan pawh a pawimawh.

Zu leh ruih theih thil kan zawrha, khawtlangah kan lakluh luih tlat hian a leitu leh thenawm khawveng tana mi hnawksak kan nih mai bakah, kan tu leh fate, kan chhungkaw tan ngei thil pawi tak kan ti a ni tih i hre thar leh ang u. Tunah pawh hal puah hal lo turin Sawrkarin khapna thupek a chhuah chung pawha kan fate tana kan lei sak hian “Sawrkar leh vantlang chu zah suh, khapna thupek chu an chhuah ve mai mai a nih hi. I nu/I pa ka awm alawm, hlau reng reng suh” tiin tawngka ni lovin chetzia-in kan fate hnenah kan lantir tihna a ni a. Nakin hun atan kan fate nun tur chu a ngaihtuahawm dawn a ni. Aia upa zah chu sawi loh, vantlang pawh zah lo turin kan inzirtir tihna a ni anga, chutih hunah chuan keini an nu leh pate ngei pawh hian kan zirtirna rah tha lo chu kan la seng leh thei dawn a ni.

Kan fate’n an ngen avang te, kan thenawmte’n an fate tan an lei avang emaw-in sawrkarin a khap, thil tha lo chu kan tih loh ngam a ngai a. Kan fate’n an ngen tlat a nih pawhin a that lohzia leh sawrkar khap thil chu tihluih tur a nih loh zia fiah fel takin kan fate i hrilh zawk ang u. An ngen tlat avanga thil tha lo pawh Vawiina kan lei zel a nih chuan nakina kan chhungkua leh khawtlang nun chu a ngaihtuah awm dawn >m a. Chuvangin nakinah chhungkua leh khawtlang nuam leh hlim kan neih theih nan, hawh u vawiinah hian sawrkar leh khawtlang khap thil hi chu i do tlang ang u. Vawiina kan fate enkawl dan hian nakina kan chhungkua leh khawtlang awm dan tur a hril si a. Thil tul lo, halpuah leh ilova pawisa kan sen phal zat chu mi harsa-te tanpuina atan pe zawk ila, a va lawmawm dawn em.

Leave a Reply