KHAWTLANG NUN SIAM THAT (Nunpui tur leh inzirtir ngaite)

– C. Zoramliana
(Vice President, CYMA)

YMA in kum 75 – na (Platinum Jubilee) alawm dawn a, Kumpuan thupuiah ‘Khawtlang nun siamthat’ a thlangchhuak hi ainhmeh hle a. Kaihhruai nain midangte zahtlak leh rinngam nitura min fuihna te, YMA chu zawldawh chunga khawtlang rawngbawltu a ni tih hre rengtura min chahte hi azahawm hle a ni. Kan hriat hmaih hauhloh tur erawh chu thupui leh kaihhruaina chu thahle mah se, thawhrimna leh siamthatna in azuiloh chuan, mumang aiin aropui chuang lovang.

1. MIZO NUN ZEMAWI LEH NUNPHUNG THATE NGAI HLU A CHHAWM NUN:
Mizote hi hnam nunchan zirna sikul – Zawlbuka seilian kan ni thin a. Sap rallian – Colonization in Zawlbuk min tihchim sak tak hnu khan nunphung leh khawsak alo danglam ta a ni. Chung te chu hmu in hnamzia, nunphung leh nihna (Identity) a boral loh nan kum 1935 June 15 khan YLA min lo din sak a. Mizo kan la nih hma, Lusei/ Lushai tia koh kan nih lai a YLA President hmasa ber Rev. Lewis Evan (Pu Niara) an an rama lehkha a thawnah heti hian a ziak a. “Missionaries in Lushai’s will have the birth of a nation as well as a church in their hand” “Zosap missionary te avang hian hnam ala piang anga – Kohhran te pawh mahni kein an la ding ang” tiin. Tichuan, a hnu kum sawm velah hnam thuthlunga than harhna (National Conciousness) avangin Mizo inpumkhat nan Mizo Union a lo ding a, LSA (Lushai Student Association) chu Mizo zirlai Pawl ah thlakin keini Young Lushai Association te pawh kum 1947 khan Young Mizo Association tia thlak kan lo ni ta bawk a, a dikna chu sawi tam ngai lovin kan hre thei theuh a ni. Engpawhnise kum 75 liam hnua khawmpui lianin Kumpuan thupui a ‘Khawtlang nun siamthat’ a lo thlan leh tak hian, siamthat ngai leh chhawmnun a ngai a awm tih hi phat rual a ni lo, chu chu vawiin a kan YMA kan kalkhawm chhan ber chu a ni.

(i) Tlawmngaihna: Tawngkam khat lek nisi, chaw funa sawitham, YMA tobul leh hnam lungphum, tlawmngaihna hi a awmzia a rilin a zau a. Ziak dan hrang hrang leh sawi dan hrang hrang te hi dik ber leh dik lo pawh a awm chuang love. Sawitu nih inthlahrunawm tak sawi loh theih si loh tlawmngaihna hi kei a han sawi thiam ve dan chuan ‘fak leh chawimawi phut let hauh lova midang tan thil tha tih’  hi a ni.

Tlawmgaihna chu zanthimah a lang fiah zawk a, ruahsurin a chiah zawp thei hek lo. Chirhdiak karah pawh a pil ngai lo a. Tuilianin a len zo hek lo. Tunlaiin mi thenkhatten tlawmngaihna hi bo ta der anga sawi an awm thin a, heng mite hi thlan laihna, mitthi tlaivarpuinam mibo leh tuitla zawnna hmunah te, chhiattawh r$krum thlenna hmunah te leh lirthei accident-na hmunah te hian kal ve se chuan, an sawi dan a danglam ngei ka ring. Tlawm-ngaihna hi a zia a zawih em avang te, zualko tlan, ral leh sahrang a awm tawh loh avang hian a bo a ni ngawt lo a, a hun azirin a rawng (colour) erawh a inthlak ve hret mai chauh a ni. Amaherawhchu, Branch tin leh Section tinah member kan pung tual tual a, a hah leh tlawmngai thin hmel te bawk hmel thar hmuh tur a tam phah chuang lem lo niin a lang. Helai tak hi tan lak ngaihna niin a lang a, chh

(ii) Ai upa zah leh naupang zawkte duhsak : YMA Dan Bu-in a tarlan angin, ‘mahni aia upa tawh phawt chu, eizawnna leh thiamna kawngah hnuihnung zawk pawh nise kan zah tur a ni’ a ti a. Hetihrual hian upa zawkte pawhin naupang zawkte hlahthlem leh duhsak hi kan tih ve tur a ni. Upat chhuanga naupang zawkte kan ken nachang hre si lo te leh zahtlaka kan nun si loh chuan naupang zawkte zah kan beisei ngawt thei lovang. Chuvangin YMA tana filter thleng rawk khawpa sikrek zuk a mawi lo e, kan ti a ni.

(iii) Thenawm khawvengte laka thilphal: ‘Lak aiin pekin lukhawng a nei’ tih te, ‘Sem sem dam dam, ei bil thi thi’ tih te hi midang tana luangchhuak tura infuihna leh inzirt$rna a ni a. Midang hmakhua thlir hauh lo va mahni tanghma haina ringawt hi chu malsawm dawn lohnaah an ngai hial thin a ni. Kan ngaihsan England ram khu ramdang tana a luanchhuah lai kha chuan khawvel ngaihsan a hlawh thin a. Tunah erawh ramdang tana luangchhuak tam ber America chu khawvelin Pa enin a en ta. Chuvangin Rock star Michael Jackson leh mi hausa Bill Gates te pawh midang tana an luanchhuah avangin khawvelin a ngaihlu a ni. Tui pawh a luanchhuah loh chuan a tenawm thuai thin a, midang tana luanchhuah hi Pathian malsawmna luanluh nansa inbuatsaihna a ni.

(iv) Tanpui ngaite tanpui: Hei hi YMA thuvawn, miten YMA a zahna chhan ber pawh a ni. Mi harsa tana In sak sak te, thisen pek te, lusun hnem te, damlo kan te, Mizo hunpui Krismass leh Kumthar a tanpuina pek te hi YMA vawng nungtu a ni a. Hnamdangin Mizo min awhna ber pakhat chu, thliar bik neilo a tanpui ngai apiang a tanpui thin hi a ni. Kumin YMA Day vawi-75 na-ah hian Branch tin te hian midang tan kan luang chhuak ngei ang chu maw.

Hman deuh khan Tuifinriat kamah Tanpuitu Pawl pakhat a awm a, passenger Sea Pirate in an suam te, lawngchhia leh kawng bo te an pui thin a, miten an ngaihlu hle thin. Kum 70 vel a lo din hnu chuan pawl din chhan Tanpui ngaite tanpui an mangnghilh a, lamna club te, inkhelhna club te, intihhlimna hmun buatsaih reng rengin an lo buai ta a, chu pawl chu kum 75 hnu chuan a awngrawp der.

(v) Tawngkam mawi leh hawihhawm hnam: ‘Lampui chang khatah mi an be chhe ngailo’ tih te hi tawngkam mawi leh hawihhawm hmang tura inzirtirna a ni a. Mi tumah hi mahni mai in kan khawsa thei hauh lo. Chuvangin, midangte mamawh hun a awm fo thin. Tawngkam chaltlai hman leh intihvei te hi chapona chi khat ve mai a ni a, ngainat leh lawm an hlawh ngai lo. Bur ruak leh tin ruak ria ring zawk ang hian, puipun nikuaa a pawr pawr leh luruh ring ring te hi a huai ber an ni vek kher lo. A sa seh tak takah chuan, keini hruaitu te hi a seh tur te chu kan ni tih hriain, member thaltlai lutuk tur thunun kawngah mawh kan phur. In hmelhriat leh lutuk khawpa in kawh siah siah erawh hi chu YMA tan a mawilo hle.

2. KHUA LEH TUI THA NIH: Mihring te hi mahnia dam khawchhuak zolo a huhova khawsate kan ni a. Chuvangin kan chenpui leh khawsakpui midangte kan pawisak a tul hle. Thlanlung mawi leh ropui chu kan duh theuh mai. Kan thlanlung dik tak chu- kan damlai a mi te min hriat dan hi a ni mah zawk. Pi leh pu te kha khawtlang huapa thil ti thin an nih avangin, vantlang thil an zah a- Tui tlan tihbawlhlawh te, kawngpui tihnawk te, (hei phei hi chuan tunlaiin Politician ten an hmang uar hle) puithuna thila inthawina tihbawrhban te phei chu an duh lo hle thin. Khawtlang tana mi hnawksak luhlul fal te chu midangte en huai huai turin mualah an pho chhuak a. Chu chu MUALPHO tih lo chhuahna chhan a ni awm e.

Tunlai hunah pawh veng leh khaw huapa thiltih a la awm nual a, i.e hnatlang, chhiat tawh rikrum leh mibo zawn chungchang thlengin. Heng hunah awlruk lo tum te hi zahthlak tak a ni. Vantlangin kan intawm thil kawngpui, school, hall, Tuikhur leh Sorkar building te hi uluk taka enkawl leh humhalh tlat tur kan ni. Khawtlang dan zawm te-Khawtlang tana thilsem, Ration, Tui, Gas, inhlawhfakna, chawhmeh leh sa lei te chen hian chuhhelh bik leh duham fal nih te hi a mawilo hle. a hmunah en ve chhin la, i hre mai ang.

British hovin min awp hnu khan Sap tihdan kan ngaisang a a tha tho e. An hnam nun zepui taimakna, tumruhna, rinawmna phawkchhuak pha si lovin thlang kawrvai nun kan la hlauh lawisi. Chuvangin khua leh tui kan nihna a kan duty-chhiah leh bill chi hrang hrang a hun taka pek te, mimal, Bank leh Sorkar a pawisa puk a hun taka rulh te, mipui hamthatna tura Sorkarin Policy hrang hrang a duan, a nihna taka hman te hi kan uar chhoh zel a tul a ni. Chuti anih loh chuan mamawh leh hunah ‘KAL MAI TEH’ tih chu kan chan tur a ni mai.

3. INTODELH LEH TAIMAKNA : Riltam an huai ngailo a, rethei an zahawm ngai hek lo. Mizote hi (classless society) hnam hnuaihnung leh chungnung bik awmlohna a ni a. Hei hi kawng tam takah tha viau mahse mi tam takin mahni nihna kan hriatloh phah fo. Pawnlam a kan thuam leh incheina han en ngawt hi chuan kan danglam teh chiam pawhin a lang lo. Nu lehpa atanga kan rochan leh thawhchhuah erawh a inanglo hle si. Chhungtinah hian a thawkchhuaktu aiin chawmhlawm an nalh mah zawk em aw? In renchem leh hnathawhtam hi intodelhna rahbi hmasa a ni a, pawl leh mimal thiltihna-ah pawh a senso tlem leh hautak lo zawnga thil tih hi kan zir tlan a ngai khawp mai.

Sub-Headquarters, group leh Branch ah Central YMA aiawh kan fehchhuah changin parthi leh satui tinreng-a chang phei chuan Taj Mahal rimnam cham cham khawpa rimtui min lo chhawp thin. Hengte hi langlo liama rim taka thawk thin YMA member nawlpuiin an ei ve phak loh a nih si chuan, hmui tui viau mahse a han a tawi kan ti a ni. Central YMA hruaitu te hi Mizo tlangval, maian bai leh behlawi bai nen pawha chaw ei puar ve thiam, chhuatdaia muhil ve thin kan ni kan tih hian min nuihzatchang a awm thin- Ka sawi chhan ber chu Central YMA tan buhchangrum leh chaw mangkhawng ei ai chuan inhmangaih tawnna chauh ba a chaw thing bar a tha zawk e kan tihna a ni. Khawlkhawm nachang hriat hi midang hambuailo a khawsak theihna a ni a, a zahawm a ni. Chuvangin khawlkhawm nachang hriat hi mimal leh YMA branch tin tana zir thar a tul hle.

Prime Minister ropui tak Mrs.Indira Gandhi khan India ram intodelhna tura hmalaknaa a thusawi chu “In developing a state or a country, I find there is no substitute rather than hard working’’. “Intodelh tur leh hmasawn tur chuan thawhrimna aia tha hmanraw dang engmah ka hre lo a ni” tiin Ram thuvawn (slogan) ah ‘ thawkrim la,tawng tlem rawh’.(work more talkless) a la thlang zui. Keini erawh chu Pawl a ni emaw Kohhran a ni emaw, Politics ani emaw, tawng teuh la,ei teuh rawh tih hi kan kal phung a ni mah lo maw? Hengte avang hian keini YMA te chuan, Hreipui khuai tu thei tha ngai ngei mai kha kan la thlang zel rih zawng a nih hi.Vengtinah hian han in en ila, thawktu aiin thawhchhuah neilo chawei tui kan tam zawk mah lo maw. Hnathawk thiamlo thil tui hria kan tam lutuk chuan vengtina AMM-’Awm mai mai’ pawl chak tak ala ding thluah ang tih pawh a hlauhawm ta a ni.Chumi kan pumpelh theih nan leh thalai ten hnathawh tur an hriat theih nan vengtinah labour exchange, branch YMA bul tumin kan din thei angem? Hnamdangin kan rama hna an thawh ang hi a ram neitu Mizo thalai te hiankan thawk thiam ve tho si. A nih loh vek lehIndia ram tana kan tangkai theih nan StaffSelection leh Sipai (Arm Forces) a tan lamahte kanin kaihruai leh thei angem ‘‘Idle minds the Devils workshop” ‘‘Thluak thawl hi setanan hna thawh nan a hmang” tih ziak ani si. Nakinah chuan YMA te pawh project hrang hrang kan dawn thiam hunah chuan Chief Guest kan la insawm tlem telh telh turah ngai phawt teh ang.

4. Ngaihhlut tur thlan thiam: Pipu huna an ngaihsan leh ngaihlut thin chu pasaltha, mi tlawmngai, huaisen, chak, taima, rinawm, nula hmeltha leh buh ngahte an ni thin a. Chhungkua an dah pawimawh a. Khawtlang tana mi hnawksak nih an duh ngailo a, in thenawm khawvenna an dah chungnung hle thin. Tun dinhmunah erawh chuan Globalization Administration leh Media avangin nunphung, khawsak leh ngaihhlut zawng a danglam ta hle mai. Thenkhat sawi dan chuan kan ranvulh – Zawhte lahin ek an phum duh tawh lo a. Tho te lah zan rei tak tak thlengin an thlawk thlawk mai a, Arpa te lah in chuan khuan hunbi lah an nei tak heklo te an ti hial a, tak tak ni maw? Kan thaliate lah chu zanah mutna chang hrelovin zingah thawhna chang an hre bawk si lo, kan menrei hian zan khawrel kan bawhchhia a, kan thawh tlaiin ni kan hmangsual tih kan hriat a tha khawp mai.

Tunah chuan hmangaihna a dai zo ta tih ziak ang deuh khan mahni indah pawimawhna (Idividualism) avangin midang ngaihsakna a tlem tial tial a, mahni hmasialna leh sum leh pai a duhamnate, thawmhnaw, TV,Comp uter,lirthei chi hrang hrang (Materialism) leh hmingthan leh lar duhna chi hrang hrang, Music, Sports, zai te leh midanglam ni duh hrim hrimna (Popularism) te hian min run mek a, hengte hian awhna sualah min hruailut mek a ni. Bible in ‘rilru a rethei te chu an eng a thawl e ‘ a tih ang ni silo, mahni inkhawngaihna (Self pity & Emotion) avangin chhungkaw khawsak a buai zo ta. Thianghlim leh thianghlim lo pawh dawn phallo in kan ham duak duak a. Puk chawpa intih milen lah kan hnualsuat der chuanglo silo. Mi hlawhtling kan tih te zingah belhchian dawl leh phureng avanga hlawhtling te hi, ngaihhlut tur dik tak an ni. Sap kan ngaisang a, a hming pawh kan put a nual. Mi ram Johna leh Mary te hi chu an meng chum phat a saptawngah an buai leuh. Chutih laiin ‘Yes’ tih chiah thiam Johna rui reng mai te leh English a Mary te an han fail leh beih mai thin te hi chu zialo lam hret chu a ni.

Kaihruainain chawimawi phute chawimawi thiam a tihah hian kawng dang dang kan sawi hman veklo ang.

Kawng khat chauh, Politics a chawimawi phu ka tih ve te chu-
(1) Hreipui khuaitu thei – tha ngai hmanga kawngpui min sial sak tu – Pu C. Pahlira (ani hi Central YMA in chawimawina a lo hlan tawh a).

(2) Zoramin thim a sut laia Human Rights hmanga Mizo mipui min thlamuantu- Brig. T. Sailo

(3) Ramin a kohna chhanga a service lai ngata ram tana pen chhuak IPS tlangval- Pu Lalduhawma

(4) Khawvel Political history a awm ngai meuh lo, remna leh muanna duh vanga Lalthutthleng kian ngam- Pu Lalthanhawla leh

(5) Sipai ram a ram rorelna khawl Secretariat, New Capital Complex a sawn tu – Pu Zoramthanga te

Leave a Reply