KHAWTLANG TAN THALAITE

– Lalrinzuala Chawngthu

Hmanlai Mizo khawtlang nunah thalaiten hmun pawimawi tak an chang thin a, Mizo history siamtute kha thalai an ni deuh ber. Khawtlang a ralmuan chuan thalaite an hmingtha a, khawtlang a raltit chuan thalaite an mualpho thin. Chuvangin hmanlai Mizo khawtlang nun kha a hunlaia thalaiteah a innghat e a tih theih hial ang.

Lal awpna hnuaiah sa leh ral laka khua a ralmuan viau chuan chu khua chuan thalai huaisen a ngah tihna niin Lal-in a hmingthan phah thin a; khaw dawihzep deuha sawi te chu kha khaw thalaite dawihzep vang a ni bawk thin. Inzirna an neih ve chhun Zawlbuk atanga inzir chhuak thalaite khan zonunmawi kawng hrang hrangin an lan chhuahtir thin a, a tul chang chuan Val Upaten thununna an lek thin. Lal leh Khawnbawl Upa te khan ro an rel ngei a, mahse, a bawhzuitu ber erawh thalaite an thin a, roreltuten thalaite zai ngai chungin ro an rel thin a; thalaiten Lal leh Upate zai ngaiin an bawhzui thin. Lal leh Upaten thalaite pawimawhna hriain an hlau thiam a; thalaiten roreltute an zahthiam hle bawk.

Vawiina kan khawtlang boruak han thlir hian hmanlai Mizo khawtlanga roreltu te leh thalai te inkar ang kha kan va pha ta lo em! Hmanlai chuan sa leh ral laka khawtlang leh mipui inhum-himna leh thlamuanpui ber chu thalaite an nih thin laiin an tuchhuan kal zel thalaite erawh khawtlang leh mipui tibuaitu, tiraltitu, tilungngaitu, tiluhaitu leh hmasawnna daltu kan ni ta!

Khaw intodelh leh buh ngah khua apiang chu thalaite taimak vang ni thin kha tunah erawh thalaite kan thatchhiat avangin nu leh pa an rum a, thalaite thutthluan laiin nu leh paten kan hrawk chawm nan an thawk ta thung, a thlum a al nghei bik erawh kan tum der si lo. Kan nu leh paten theih ang tawka nundan tha zawh an tum laiin nundan tha zawh mamawh ngawih ngawih zawk thalaite erawh chuan kan dinhmun phak ang zelin nuam kan tawl a, kan thatlai hun chen tumin khawvel hmun danga kan thatlai puite dungthlulin ‘ka nun hi ka nun a ni’ tih kan changthlan a. Kan nundanin kawng dik loah min hruaibo ta a ni.

Kan khawtlang hian chhan a mamawh takzet tawh tih kan ngaihtuah em? Tunhma atanga thlah hauh loa kan lo chhin than leh vawnnun ve hram hram thin Zonunmawi tam tak kha khawvel changchannain min lenpuibosak then tawh a, min la lenbosak zel dawn bawk. Zirsangzela’n “Zonun-mawi, liam loin la cham rih hram rawh aw” tia a koh lawm lawm kha vawiinah chuan thalaiten kan zir miau loh avangin Zonunmawi thenkhat chuan he kan hnamah hian mikhual chan an chang tan a, cham mai ni lo, inbenbel zel an chak laiin cham reng ngamnaah an ngai ta lo a, min kiansan an tum a nih tak hi!

Enteh u, he khawtlangah hian min thlahtuten thahnemngai taka an lo vawnnun Zonunmawi pakhat—Khawhar inriah khan khawhar inriak tur tlangval kan inhmuh zawh thin tak loh avangin tihtawp mai tur em ni tih min zawt mek a, engtinnge tlangvalten kan chhan dawn le?

He khawtlanga Zonun zemawi vawnnun leh thlah liam hi he veng thalaite kuta innghat liau liau a ni a. Kan pate chuan an hunlaiin an lo vawngnung tawh a, an hunlai pawh khan kan tawn inang lo mah se vawnnun harsa tih chang an nei ve ngei ang, mahse anni chuan an thlah chuang lo. Zonunmawi zinga chhiat tawkten an thlam-uanpui khawhar inriah kha inthiamna nei hauh loa kan khawtlang atanga kan thlah liam chuan khuareiah tumah dangin mawh an phur lo ang, vawiina tlangvalte chauh lo chuan.

Tlangvalte u, hetiang chona thil lian tham alo pian chhuah hian thut hmunah kan lo ngawi mai dawn em ni? Khawnge Mizo khawtlang nuna Zonunmawi par chhuahtirtu thalaite kha kan awm tak le? He hnam leh khaw-tlang hian chona dawng mek a, tunge chhang ngam dawn le?

Zonunmawi thlah liamtu hmasa zinga telte hi kan thlah lo kal zel tur, kan hnam nun mawi khawvela hmai uang taka lo la tarlangtu turten min dem mai lo’ng maw? YMA hruaitute kuta dah ngawt chi a ni lo, a tihlawhtlingtu thalaite kuta innghat liau liau a ni zawk. Kan hnam ze mawi tak hi kan thlah liam phal dawn maw?

Leave a Reply