KHAWTLANGNUN SIAMTHAT

– J.H. Zoremthanga (CEC, CYMA)

Khawtlang nun hi mimal nun tlingkhawmin a siam a ni a, keimahni khawtlang nun siamthat tura kumpuan a neitute hian kan nun theuh kan siamthat hmasak a ngai a ni. Keimah avanga khawtlang nun a sual leh thalo thlen theitu kha paih ila, a sawi mai nilo, a tih a tih a ngai tawh a ni. Chuvangin keimahni theuhah bul i tan thar ang u.

YMA in kum kan puang a, chu kan kumpuan chuan tih tur (duty) member tinte min tuk a, chumi tihlawhtling tura theihtawp kan chhuah chu kan tihtur chu a ni. Mahni tihtur ti tute chu a changin dodaltu tam avangin hlawhtling rih kher lo mah se, rilrua lungawina leh thlir tute en pawha zahawmna khan a hliahkhuh reng reng a ni.

Spanish Civil War lai khan hmelma rual laka tlawma, dam reng ai chuan miten thih an thlan thin avangin, “|hingthi a nun reng ai chuan ding chunga thih a tha zawk” tiin au hla an nei thin a. Sual do ngam lova dam reng ai chuan sual dova thih an thlang zawk ta thin a ni.

Kan thiltih dan turah reng reng ngaihdan kan siam tawh a nih chuan, rilru mum taka kan kalpui a tul bawk thin. Allinsky chuan, “Kan tihtur chu a thatna 52% nise, a thatlohna 48% ni ta se, ti tura thu kan pawhchah tawh rau rau chuan za a za tha ang chiah a kal pui tur a ni a, vana vantirhkoh zawng zawngte pawhin min tan vek tur leh hmelma te chu setana lamtang ang thlapa ngaih tawh tur a ni” a ti hial a ni.

Tih tur hi a in ang vek lova, awlai taka han tih mai theih a awm a, harsa taka tih hram pawha la harsa takte pawh a awm a, a awl leh a harsat a thuin tihturte chu kan tiin kan ti lo tur a ni lo. Tihtur a nih phawt chuan tih mai tur a ni, a harsat poh leh a rah chu a hlawk ngei ang. Thing pawh hi vawikhat chauh chehin a tlu kher lova, hah taka vawi tam tak cheh hnuah erawh chuan a tlu nge nge thin.

Khawtlang nun siamthatna hi vawi leh khata zawh duak duak chi a ni lo. Kum tam tak pawh a duh thei, beidawn mai tur a ni lo. Mithiamte chuan hnam pumpui nun hi ami za pahnih (2%) aia tlem pawhin tihtakzeta an beih a hmathlir tha (new vision) an neih chuan an thlak danglam thei a ni an ti. YMA member nuai li zet (4 lakhs) Mizoram pumpui mihring 40% vel zet hian tihtakzeta siamthat hna kan thawh chuan kan hlawhtling thei a ni tih i hria ang u.

Leave a Reply