‘KHAWTLANGNUN SIAMTHAT’

– J.H. Zoremthanga (CEC, CYMA)

Kum zabi 18-naa England Khawtlang nun chhiatzia hetiang hian a ziak a – “Ramsa chungah an nun a rawng a, ram mipui te’n zu ngawl an vei nasain an sumdawng nasa hle, Kohhran rawngbawltu fate thlengin an sual em em a, pawisa khelh leh nawhchi zawrh a hluar a, dan leh thupek a chhia a, inthamna leh eirukna a nasa a , tihtakzeta Pathian rawngbawl an tlem a, retheite retheihna a nasain fahrahte an tam em em bawk, hemi avang hian England ram chu Kristian ram zingah a chhe ber e”, a ti hial a ni.

Hetiang hi nimahsela, John Wesley te unauin thlarau nun leh khawtlang nun siamthatnaa theihna leh remchanna hmun apiangah Biak In chhung leh kawtthlerah te an aupui zel avangin kum zabi 18-naa England ram khawtlang nun chhe tak tawh chu kum zabi 19 leh 20-ah chuan siamthat a lo ni leh ta a, ram ropui tak a ni ta zel a ni. Hetih hunlai vek hian French ramah chuan thisen chhuakin siamthatna kalpui a ni a, England-ah chuan Wesley-a te uanau avang hian thisen chhuak lovin siamthatna hi kalpui a ni thung a ni.

Chhungkua, khawtlang leh hnam nun siamtha turin kohhran, khawtlang leh tlawmngai pawl hrang hrangte’n hma kan la thin a, thenkhatin dan leh thupek hmangin sual kan do laiin, a then te chuan thatnaa hneh an tum a, ziak loh khawtlang dan hmanga sual nuaibo tum kan awm mek bawk. Hei hi a tangkai lo ni lovin kan bul tan hun hi mihring nungchang siamtha tura hmalakna atan a tlai lutuk tawh thin a, “Se bo hnua se kawngkhar ang” in tih ang mai a ni. Chuvangin khawtlang nun siamtha tur chuan kan bultanna dik ber nia lang ta chu, sualnain a la chimbuai leh naupang leh nausen te nun enkawl ngun a ni ta a ni.

United Nation’s International Childrens Emergency Fund (UNICEF) hotu pakhat John Corun chuan hetiang hian a sawi a, “Khawvel hian leibat tlak ngei ngei tur kan nei a, chu kan leibat chu naupangte hnena kan neih hlu ber pek a ni a, mi tam berin kan leibat rulhna chang kan hriat loh avangin khawvelah hremhmun kan tem lawk thin a ni,” a ti a. Hemi awmzia chu, “Khawvel hian naupangte pawimawhna a hre tawk lova, naupang enkawlna lama kan inthlahdah avangin, khawvel hi hremhmun ang a ni a, sualna khurhpuiah ka hnuklut zawk a ni,” a tihna a ni.

Psychologist hmingthang James Lincoln Collies chuan, “Asia khawmualpuia hnam tam takten an ram economy dinhmun hre lova nawmchenna an uar lutuk avang leh chhun leh zan hun zalen lutuka an hman- na avang hian Asia khawmualpui hi Drugs leh HIV/AIDS khawpui a ni kumkhua mai dawn niin a lang,” a ti a. Mizoram tan bik pawh hei hi a dik thui hle dawn a ni. Tuna kan khawtlang nun sualna tam ber te hi kan chhutchiang ngam a nih chuan enkawl hun an nih laia kan fanaute kan thlahthlam vang a ni. Naupang kum 7-11 atangin sualna chi hrang hrang, a bikin sex lam leh ruihhlo an khawih tan tih hria ila, he hun pawimawh hi zirtirna tha kan pek hun tur a ni. Kan ramah tunah hian HIV/AIDS 4,089 lai an awm mek bawk. Heng zinga 2,545 chu sex vang a ni a, IDU’s 1,226 an awm bawk. Huau huau leh kan hunpui hman thin a kumtlinglo naupang zan lamah nu leh pa tel lova chhuak tam lutuk hi kan khawtlang nun chhiatna bulpui a ni, hetah hian YMA-in hma kan la thei a ni.

Kan ramah kum 2009 chhung khan pawngsual, a bikin naupang kum tlinglo vawi 40 aia tam mah a awm a hriat a ni. Hetianga pawngsual thintute hi tute nge ni le, mipa puitling tawh an ni tlangpui. Naupang kum tlinglo khawih chhiat avanga KS lo ni ta hi KS zingah pawh a tam ber an ni ngei ang.

Home hrang hranga naupang dah zingah nu leh pa nei lo tak tak chu 20% vel chauh an ni. 40% zet chu nu leh pa nei an ni a, 40% dang chu nu emaw pa emaw nei an ni. Nu leh pate zingah mahni fate enkawl peih lo an tam hle tawh tih a hriat a, hei hian khawtlangah sualna a thlen tam. Khawtlang nun siamthat ngai kan lo neih tam phah hle a ni.

Reader Digest 2005 September thla chhuakah chuan India ram khawpui hrang hranga tleirawl hovin an nu leh pate an hmuh dan (report card) tarlan a ni: Ringlo mi kan tih zawkten an fate an enkawl tha hle a ni tih a lang. Heng tleirawl te hian an nu leh pate thawhrimzia leh an enkawl thatzia sawi chhuakin mark an pe sang hle. Kan fate hian eng angin nge min hmuh a, mark engzat nge Mizo tleirawlte hian nu leh pate mark an pek ve ang le.

Leave a Reply