KOHHRAN, KOHHRAN ZAWNGIN MAW?

– Solomon L. Sailo

Kumin chhungin kan vengah chhiat tawk kan awm ta nual a, kum dang ai chuan Pathian zarah chhiat kan tawk tlem a, kan chhiat tawh dan han en hian Kohhran hrang hrangin kan mi leh sate thlah liam kan nei vek a ni.

Chhiat kan tawh zat lam hi ka sawi tum pawh a ni lova, kan kal dan hi a dik em tih hi mutmawh hnarmawh a ka neih thin anih avangin sawi lan tulin ka hria a ni. Kohhran mi chatuan ram pan an awmna Kohhran programme pakhatah kan ngai vek a, Kohhran mite pawh kan kal tha thin khawp mai. A nih dan tur dik tak pawh niin kan ngai vek awm e. Mahse, Kohhran programme kan tih lai hian mahni Kohhran ni lo Kohhran dang mitthi ina kal tum miah lo kan awm ta hi chu nakin a kan inchhirna tur a ni mai lo maw?

Tlang takin han sawi ta ila, Kohhran hruaitu thenkhat an Kohhran mi ni lova lang ngai der lo hi kan pung chak riau niin a lang a, punna lawmawm lo tak a ni ang. Lumen ngai mitthi kan neih chuan a awmna Kohhran thalaite’n solfa hla sak hi anhruai tlangpui thin. Tlaivar zana kei mit tha vak lo pawhin tarmit phelh chung paw’n en kual ila mahni Kohhran chauh maia lang thalai pawh kan awm ta nawk tih hi hai rual a ni love. YMA hruaitute tan chuan sawi nuam lo sawi ngai si a ni a, chuvangin uar takin kan sawi ta a ni. Hetianga kan kal zel a nih chuan kan tawpna tur hi dâwn ngam a nilo thuai ang tih a hlauhawm hle.

‘Keini Kohhran chu kan lian a Kohhran dang pawh awm lo mahse min pui tham an awm alawm,’ tih rilru erawh kan la pu pha lo turah ka ngai a, Kohhran len leh tet in kawngro a su lova, Kohhran lian ber inti pawhin a Kohhran bila kan kal dawn a nih chuan a tuar nasa ber kan ni thei a ni tih hi i dawn thiam ve em?

Kohhran bila la bika ka hriatte chu eng Kohhran nge ka sawi lang dawn lova, an hruaitu thenkhat beng erawh a thleng ngei tawhin ka hria. Hetiang renga kan kal a nih chuan an hming sawi hun pawh a awm mai ang tih hi a hlauhawm hle a ni. Nula/tlangval a vei deuh chuan hming hmerh paw’n an sawi fak fak thei chu a ni der tawh. Kohhran hruaitu ka tih hian |halai lam hruaitute thleng pawn a huam ngeiin a lang.

Veng mipuite tana thil tha lo tur anih miau avangin kan ngaihtuah nawn leh hi a pawimawh kher mai. Kohhran hruaitu ni lem lo pawh mahni Kohhran chiaha lang kan awm tih hi ka sawi hmaih phal bik lo. Veng thenkhat buaina pawh a ni ve reng mai, mi tam tak sawi dan phei chuan, “Kan vengah chuan an Kohhran mi lo chu an kal lova, a hnu lawkah nupate’n an ral mai thin,” an ti. Vengin chhiat kan tawh reng reng hian tlawmngaihna lan chhuahna lai chu in ral tel lo zawng hi a ni ti ila ka sawi sual awm love.

Ka khah liam em avangin ka sawi thui lutuk dawnin a lang, kan Veng chhung Kohhran tinah hian thu sawi dawn ila, ka sawi tur chu kan hrethiam mai awm e. La insiam tha thei dinhmunah kan din vek avangin mahni Kohhran tinah tan la thar leh vek ila, he veng kan chenna in ban innghahna veng hi siam that i tum vek teh ang u. Nursery Veng nih a nuam zual ngei ang.

Leave a Reply