KRISMAS LEH KUMTHAR THUCHAH

Central YMA hmingin chibai ka buk a che.

Krismas leh Kumthar hunpui lo thleng tur hi, hlim leh lawm taka hman a nih theih nan, Central YMA chuan duhsakna chibai kan buk a che u. He hun pawimawh tak hi mimal, chhungkua leh khawtlangin thlamuang leh hlim taka hman a nih theih nan, a hnuaia hmalakna tur tarlante hi Sub- Hqrs./Group/Branch YMA tinin thahhnemngai taka bawhzui turin kan ngen a che u.

1. Krismas leh Kumthar hi mi tinin hlim leh lawm taka hman a nih theih nan veng chhungah mi harsa, damlo leh mulum zo lo an awm em? tih dapchhuakin chutiang mi an awm a nih chuan a theih leh remchan anga chhawmdawla tanpui ni se.

2. He hunpui hi mi tinin kan nghahhlelh theuh a nih avangin mi dangte tana harsatna thlen thei – Silai lem (Inhliam theihnate), mite tithlabara boruak tibawlhhlawh theitu Halpuah chi hrang hrangte, Zopa Rawket (Sky Lantern) hal/zuar lo tur leh lei lo turin mi zawng zawng kan ngen a ni.

3. He hunpui hi thalai leh rawltharten nunkawng sual an zir thar hun lai leh kawng tha lo pawh an zawh tan hun a nih theih thin vangin, Puitling tel lovin zanah naupang kumtling lo khawlaiah vah chhuah tir loh ni se. Naupangte thlahthlam lo turin chhungtinte kan ngen a ni.

4. Boruak muanawm tak hnuaiah he hunpui hi kan hman theuh theih nan Sub-Hqrs./Group/Branch YMA tinin mahni huam chhungah a tul dan ang leh Mizoram Sawrkar-in SOP a duante bawhchhe lova Duty insiamin, mi tha leh pawisawilote rilru tina lo zawnga hawihhawmna lantir chungin duty ni se. Mimal, chhungkua leh khawtlang tibuai thei, a bikin RUIHHLO khuahkhirhna kawngah theihtawpa hma la turin kan inngen a ni.

5. YMA duhdan leh beiseinate hi a hlawhtlin theih nan Sorkar, Tlawmngai Pawl, Kohhran hrang hrang leh mipuite tawiawmna kan ngen a ni.

I thawhpui,
Prof. LALNUNTLUANGA
General Secretary,
Central YMA

Leave a Reply