KRISTIAN CHHUNGKUA

– H. Zothanpuia (Y-Section)

Kristian chhungkua kan tihte hi eng ang chhungkuate hi nge ni ang, kan sakhaw vawn mek hi keini Mizote chu Kristian a ni a, kan vai mai hian Kristian chhungkua chu kan ni mai lawm ni? Nge nia kan ngaihdana mi piangthar chhungkua kan tihte chauh hi le. Kristian chhungkaw din turin kan inngenin kan infuih sauh sauh mai a, nupui pasal inneih dawn pawhin Kristian chhungkua din pui theih tur kan inzawng zel ta si. Kristian chhungkua kan han tih hi kan Pathian thuin min zirtir danin nge kan thahnemngaih danin kan kalpui zawk. He thu hi chu vawiin thleng hian Mizoteah ngaihdan pahnih a la awm reng mai si a.

Hmanni chu kan thian pakhatin heti hian a sawi a, ‘Mizo ka ni a, Kristian ka ni bawk, mahse, zu ka in thin a, inkhawmte pawh ka thatchhia, kan chhungkua hi chu kan fello khawp mai, rawngbawltu thenkhat hian Kristian chhungkua din turin tan han la teh u min ti a, kan in chhungah sakhaw dang bia kan awm si lo a, keini chhungkua hi Kristianah min ngailo niin ka hria’ tiin a sawi a. Ka chhang lem lo a thiam lah ka thiam hek lo, ngaihtuahna erawh a ti thui hle mai. Hetiang hi a lo nih tak nuaihah chuan Mizoramah hian Kristian chhungkua kan va tlem mai awm ve, Kristian ramah Kristian chhungkua kut thliah tham lek kan awm si chuan ringlo mite hnena chanchintha hril nge kan ram chhung ngeia beihpui thlak hlawk ang le, kil hrang hrang atanga han thlir chuan hei hi thil ni thei a ni tlat bawk si. Ka tarmit vuah hi a lo fiah ber bik hauh lo mai tih ka hria.

Kan ramah hian Kohhran hrang hrang leh NGO hrang hrang kan awm a, kan tum leh duh ber chu Zoram siamthat a ni a, chu chuan a kawh chu Vanram a ni. YMA hmalakna te hi a ropui khawp mai, ruihhlo tihrem tumin thapui an thawh a, mahni inchhung pawh luah lum hman lo khawp in Zoram tan an bei a, CYMA Kumpuan leh SRS te hi hah tak an ni, a takin ram an vei a, tawngka mai ni loin a tak in an thawk thin, kan tu leh fate ruihhlo bawih a an awm loh nan an thiamna leh theihna zawng zawng an hmang tak meuh a, thlamuang taka kan mut theih nan te, thalai rual ten nunna hlu tak kan chan tam ta lutuk te a lo reh theih nan te, nitin a kan eizawnna kawngah hlawhtlinna leh malsawmna dawng tlaka nun dik kan neih theih nan te, sawi tur a tam khawp ang an hmalak chhan hi, heng zawng zawng hian a tum ber chu mitin ten Kristian chhungkua nihna dik tak kan chan theuh theih nan a ni.

Chutiang zelin kan veng chhungah ngei pawh JAC ten theihtawp tak meuh an chhuah a, vengchhung mipui ten thlamuang taka hun kan hman an duh, ruihhlo ti thin ten an bansan a nun kawng dik an lo zawh theih nan hun leh tha, sum leh pai tam tak an seng mek a ni a, hei pawh hian a tum ber chu chhungtinah Lal Isua lo Lal ber se tih hi a ni. Sorkar lamah pawh Police Dept. te, Excise Dept. te an awm bawk a, hei pawh hian a tum chu Zoram nuam siam a, Lal Isua hnung zuitu rinawm kan nih theuh theih nan rim takin hna an thawk thin. Chutiang zel in pawl hrang hrang te pawhin an theihna zawn a piangah hma an la theuh bawk.

Kohhran hrang hrangten nasa takin hma an la reng a, bang lovin an tawngtai reng bawk, heng zawng zawng hi a thlawn lovang tih ring tlat i la, kan za hian Kristian chhungkua vek kan ni a, Lal Isua hnung zui tur erawh chuan nitin a kan intuai thar fo a ngai thung.

Leave a Reply