KUANG DUAN LAWK HNATLANG

– Zokunga (President, NYMA)

Kan ramin hma a sawn rualin kan veng ngei paw’n hma kan sawn ve zel a, Bungkawn atanga VC/YMA te kan indan tirh nena khaikhin ralah chuan mipui pawh thahnem tawh tak kan ni. Mipui kan pun rualin thihna te pawh a pung lo thei bik lova, chu bakah mitin mai hi mahni tlatna mual theuhah kan buai tain chhiat tawh nikhua a kuang siam tur han insawmkhawm chawp chuk chuk pawh thil remchang a ni ta meuh lo.

Hetiang dinhmun a kan lo din tak avang hian a tlachawp a helnuai deuh taka kuang siam rum rum lovin Kuang duan lawk hnatlang kovin loin hmakhua lawk thin a ni. Branch YMA hruaitute an inthlahrun thin avangin Kuang duan lawk hnatlang-ah hian a tlangpui thuin Branch YMA Executive Committee Member chin in koh a ni thin a. Mahse, veng tana mi thahnemngai, YMA neitu rilru dik tak pu mi engemaw zat hi kumtinin Pathianin min pe thin a. Heng mi Executive Member te aia kut themthiam mah zawk leh tha pawh nei mah zawk te zarah hian tluangtakin a tul hun a piangah Kuang duan lawk hnatlang neih thin a ni.

Kan hriat angin kuminah kan khawtlangin chhiat kan tawk nasa mawlh mawlh hle mai a, vengchhunga vui mi 19 leh ruang chhuak 5 (Total 24) zet kan nei ta der mai. Hetiang dinhmun a kan din mek avang hian kan kuang duan lawk sa pawh kan hmang zova, chhiatni fund kan khawn sa in min daih loh avangin kan khawn belh leh a, tunah tak pawh hian chhiatni fund a kan Branch dinhmun chu tha lo tak a ni.

Kan kuang duan lawk sa te kan hman zawh tak avangin kan hruaitu ten ruahmanna an siam angin Ni 14.9.2017 (Ningani) nilengin Kuang duan lawk hnatlang koh a ni a, hruaitute an inthlahrun avangin a hmingah Executive Committee Member hnatlang tih ni mah se, a hlawhtlinna tak tak chu hnatlang a rawn thawk chhuak mi tlawmngaite vang liau liau a ni. Hnatlan ni hian Kuang 8 zet duan lawk a ni a, kuang pang/bang kuang 10 vel zet daih tur ruahman lawk a ni a, kuang dahna room, YMA Choka leh VC Hall vel te thenfai vek anih bakah Choka chhuar leh perek bawm te siam a ni bawk a ni. Kuang duan lawk hnatlang kaihhnawihah Branch YMA chuan lawmthu sawina tur tam tak a nei a. Ram pumah MNF Party-in Total Bandh a neih ni anih avangin kan hruaituten hnatlang lo koh an inthlahrung khawp mai a. Mahse, Kuang duan lawk kan neih tawh loh avang leh engtik lai pawh a chhiat tawk thei kan nih bawk si avangin MNF Unit hruaitute biakrawn an ni a, i-he lova min lo remtihsak avangin a lawmawm hle a ni.

Chaw eikham thingpui tui tak min hluitu Pi CKi te, chhun thingpui leh a hmeh min tum saktu Pi Peki te, Chawhnu thingpui min lum a a tul anga ei tur siamnan a an neih ang ang min hman tirtu Pi Sangpuii te, Cheng tam tak man an hmanrua rawn thawhtu Pu RC Thuama leh Pu Mahmingsanga te, kan bawlhhlawh khungkhawm zawng zawng a tuk a min lo paih saktu Tv. [email protected] te leh hnatlanga thawk chhuak zawng zawng te chungah NYMA kan va lawm tak em!

Mahse, kuang duan lawk kan neih avang hian veng mite a bikin kut themthiam deuh zawk te in thlahdul ngawt thei kan ni lo. Kan kuang duan lawk sa hi han hman dawn tak tak meuh chuan eng eng emaw buaipui ngai (a tuam, etc.) a awm a ni tih hrereng chungin mitthi kan neih nikhuaah kuang siamna lamah hian tun aia tam deuh zawk kal khawm turin rilru i seng thar ila.

Kuang siamna hmun VC Hall bulhnai a mi leh tlem a hla deuh te pawhin kuang siam tute tana thingpui ila lo hlui nachang hriatte pawh hi thil chin dawklak tlak tak a ni. Kuang siamnaah hian tumah han thiam fal bik em em leh mawhphurtu bik kan awm lo tih hria ila, tuna siam thang deuh ten rokhawlhna an neih nikhua pawh a kuang lo siam mai thei tur awm fur turin kuang siam dan te pawh hi YMA Member a tam thei ang ber hian hriat i tum tlang teh ang u.

Leave a Reply