KUM 2012 CHHUNGA NYMA HRUAITU TUR THLAN A NI

Ni 9.12.2011 (Zirtawp) zanah Kum 2012 chhunga NYMA hruaitu (Office Bearers) thlanna VC Hall-ah neih a ni a. Hun hi hlawm hnih ang deuh a hman a niin a hmasa zawk chu Branch YMA President, Pu R. Lalhmangaiha’n a kaihruai a, Upa K. Lalngheta’n hunserh a hmang thung.

Kum 2011 chhunga Branch YMA hmalakna hrang hrang report, Secretary hnen atanga ngaihthlak niin, Treasurer hnen atangin sum dinhmun report ngaihthlak a ni bawk. Tv. Lalthazuala, A-Section chuan kalkhawm te zaiin a awi a, Branch Asst. Secretary kaihhruaiin Member kal zat inchhiarna hun hman a ni a, Member 111 (Y-47, M-30, A-30 & Others-4) kalkhawm a ni. Member kal hnem ber ‘Y’ Section chuan lawmman Rs. 1,000/- an dawng a, ‘M’ Section i’n Rs. 700/- leh ‘A’ Section i’n Rs. 500/- an dawng bawk.

Hun hlawm hnihna chu R.O, Pu R.L. Rindika kaihhruaiin hman zui a ni a, R.O chuan Central YMA hmalakna hrang hrang te, CADS hmalakna leh YMA Branch awm zat, Group awm zat, Member zat, etc. tarlangin YMA Member-te fuihna thu tha tak a sawi zui bawk. R.O hi CEC Member mi 3, Pu R. Lalvensanga, Khatla South, Pu J.K. Duailova, Bungkawn Vengthar leh Pu Lallawmawma Chenkual, Bungkawn a mi te’n an rawn tawiawm a, R.O rawn tawiawmtu te bakah hian Branch Executive Committee meeting-in P.O atana a ruat Pu K. Zoliana, Pu C. Lalzamliana leh Pu R. Zonunthara te kaihhruaina hnuaiah tluang tak leh felfai takin inthlanna neih zui a ni. Inthlan kar lakah Solo (Tv. Vanlalsiama & Tv. Thanchungnunga) ngaihthlak anih bakah a remchan dan angin zaihona neih a ni bawk.

Inthlanna a NYMA Member kalkhawm ten heng mite hi kum 2012 chhunga Nursery Veng Branch YMA hruaitu (Office Bearers) atan hneh takin an thlang tling:
President : Pu R. Lalhmangaiha
Vice President : Pu Roneihthanga
Secretary : Pu Zokunga
Asst. Secretary : Tv. Lalrinzuala Chawngthu
Treasurer : Pu Lalchhuanawma
Fin. Secretary : Pu R.C. Vanlalsawma

R.O sawmna angin President thlan thar, Pu R.Lalhmangaiha hnen atangin thusawi tawi ngaihthlak a ni a, President chuan kum kalta lama Member-te tawiawmna thatak avanga tluangtak leh chaktak a kal anih thin ang a kumthar lamah pawh Member-te tawiawmna a ngenin NYMA Member zawng zawng leh vengchhung mite Krismas & Kumthar Chibai a buk nghal bawk. Pu R. Lalvensanga, CEC Member chuan hruaitu (Office Bearers) thlan thar te puala tawngtaina hun a hman hnuin hun tih tawp a ni.

Leave a Reply