KUMPUAN HAWN – cum- MEMBER THAR LAWM

Ni 29. 4. 2011 (Zirtawp) zan khan VC Hall, Nursery Vengah YMA Kumpuan hawn – cum – Member thar lawm inkhawm tluang taka neih a niin Pu Lalbiakzuala, Gen. Secy., Central YMA chuan kumpuan hi a hawng.

Central YMA hruaitu Pu Lalbiakzuala chuan hawnna thusawiin, YMA Kumpuan “Khawtlang nun siamthat” hi kum 2 kan hmang tawh a, kaihhruaina duante tihlawhtling thei ila kan khawtlang chu a nuam hle ang. Kaihhruaina point hrang hrang zingah –
(1) chhungkaw tha buatsaih a pawimawh a, sikul hmasa ber inchhung niin zirtirtu hmasa ber nu leh pa an ni a, nu leh pa tha enkawl chhungkua atanga fa fel tak tak an lo chawr chhuak thin.
(2) ngaihhlut tur thlan thiam kan mamawh a, sum ngah apiang inngaihsan siak hi siamthat a ngai a, mi rethei leh hausa kar zau zel te hi sum ngah leh a lak luh dan tha lote khawtlang leh kohhrana an tlaktlum thin vang a ni a, siamthat a ngai. Thawkrim leh taima, mahni intodelh te hi kan idol/icon nise.
(3) zirna leh thiamna kawnga rualel chungchangah mahni veng leh khuaa lian ve viaua inngai; thleng hla tial tiala kimki telh telh leh si kan awm ang tih a hlauhawm. Zirna kawngah mite nih phak kan ni ve thei tih inhriat a pawimawh hle. Hlawhtlinna hi amaha rawn awm ni lovin a thawha thawh chhuah a ngaih thu te a sawi.

Pu Mabiaka chuan YMA-in kum 75-na cham kan hmang zo hlawt a, Nursery Veng YMA hi tun atanga kum 75-ah engtinnge a kal zel dawn? Bungrua leh thil neihah rual kan ela hma kan sawn zel laiin YMA thuvawn “Tanpui ngaite tanpui” kawngah hma kan lak si loh chuan, “YMA rel a sual ngai lo,” titu Zoram mipuite rinna a tlahniam ang, chuvang chuan kan kumpuan hlawhtlin nan YMA thuvawn leh thuthlungte i vawng nung zel ang u, a ti bawk.

He inkhawm Pu R. Lalhmangaiha, President, NYMA kaihhruaiah hian Pu K. Zoliana, Adviser, NYMA – in hunserh a hman zawhah Pu Zokunga, Secretary, NYMA-in Branch report a pe a, Pu Roneihthanga, Vice President, NYMA, CEC ni bawkin kum 2011 atana YMA member thar te lawmna thu a sawi a, Tv. Lalrinzuala Chawngthu, Asst. Secy, NYMA kaihhruaiin YMA Thutlung sawi rual a niin Nl. Lalhruaitluangi Hmar, Y-Section-in zaiin kalkhawmte min awi a, Pu Lalchhuan awma, Treasurer, NYMA-in lawmthu sawina hun a hman zawhah tluang taka tin a ni.

Kumpuan hawn -cum- Member thar lawm inkhawm hi Pu CT Zakhuma, Chairman AMC leh vengchhung pa engemawzatin min hmanpui a, beisei angin member kal kan tam lo hle nain a kal chhunte erawh chuan kan hlawkpui hle a ni.

Leave a Reply