KUMPUAN: RAM LEH HNAM HUMHALH

Mizo te hmakhawsânga Pi leh Pute tuanna chhen-fâkawm tâk Zohnahthlak unau zâwng zâwngte fuan khawmna hmun Mizoram. Kan Pi leh Pute’n a duat tâk leh lungsi tâka an lo chawrchhuahna hmun ngêi Mizoram, bul kan tanna /pârtlanna Zo-hnahthlak hnam chitinte lawi khawmna hmun, Lêngzawngte kimna hmun Kan ZORAM bâk hi ram dang hmachhuan tûr tâk tâk Zofate hian kan neilo. Kan lu nghahna hmun a ni.

Kan Pi leh Pute khan -Umbur(Tuibur), Zial, Zû chi hrâng hrâng kan neih te chu anlo tlân ve ngei mai. Mahse, hêng thil tullo ve tâk anlo tih thin avânga harsatna an tawh thu erawh Mizo Thawnthu(History) ziaktu te hian an tarlang hauh silo, chumaibakah Thuziak nilemlo |âwngka a thurochhiah, tâwng hmanga Thawnthu inrochun(Folklore)-tak ngialah pawh kan hre lo ani ber e. Amaherawhchu, Zosâp te anlo chhuah hnuah Kristian kan lo ni ta a, hun alo kal zel a, thlangkawrvai te chuan Mizote chu minlo chenchilh tâk tâk ta a ni. Chuchuan chângkanna engemaw chu kan hmu meuh mai e. Mahse, kan Hnâm tân a tângkailo thil tam tak chu an hnutchhiah ve na meuh mai. Pi leh Pute dân tha zâwng zâwng chu a dâl ta tial tial a, Taimatâka thawhchhuah lam aiin fingkherrek tâka dinchhuah chu kan lo zirthiam tan ta a. Nawmsakna zirzâwngin Zâ te chu THUPUI nghêt tâkah kan hmang zui bawk. Inzirthiamna, Lehkha thiam lama inelna pawh kan phâktawk chuan kan lo um ve ta in, India rama Tribal tamtak zingah pawh keini Mizo te ngei chu hmasawm kan ni. Kan khawthlir (environment) pawh a sângin kan mimal nun, khawtlang nunzia,mipui nun (Social life) thlir thlêk zâwng pawh a zalenin, hun tha, boruak muanawm tak karah kohhran leh khawtlang rawngbawlna te’n kan luangliama, a intuahrem thlup mai. Natna danglam sawitur êm êm a awm lo. Tawhsual tâwk(accident), Tarthi(âwmlaithi) bâk chhiattâwk chhûngkua sawi tur a awm meuh lo. Chupawh chu a khat viau in a rinawm. Tui tlan athianghlima, ei leh in, kan chawtui leh rin ber te chu mahni tâwka kan tharchhuah vêk. Kawla nichhuakchhiara kan thawhchhuah hlim tâka kan sêng te chu thanlen nân kan hmanga. Kan thawhrah, thawhchhuah ngeiin kan ei in kan in a.

Thiamna a sâng tual tual a, sumdawnna te chuan hun a hmang tân ta. Thiamna chi hrang hranga eizawnna te chuan hun aluah mêk a, kan lo inthlahpung ve hrêt hrêt a, eizawnna te chu a inher danglam dawrh ani ber mai. Mipui kan lo tam tâkah chuan khawchhak lam atangin Burmese te leh khawthlang lam atangin hnam dâng Vâi te chu Mizoram-ah anpungta hluai a. Sumdawnna tênawm tâk leh ruihhlo thil thalo tâk tâk te chu an rawn fûn tel zêl a, min tulh mawlh mawlh ani bêr mai e. Kan rinna leh khawtlang nûn te chu an rawn thlak thleng dawrh a, keini lah thatchhiata rinawm leh hausak thut duhna rilru thalo, nawmsipbawlna chi hrâng hrângte chu hnawl phal chi ani ta ngânglo. Politic phakhar tâk, mipui te bûma intiamkamna dêr mai hmanga VIP nih tum Sorkâr pawisa duh duh a penper thei nih chuhin chhaklam panin kan tleh dêl dûl a. Rîngtu tha nih chuhin kan infâk mawlh mawlh a. A tâk ram erawh kan hlat tual tual leh lawi si. Lemchan/a lema thawh kan thiamzo ta.

Heti laitaka pawi êm êm mai chu; “Nungcha, Sava leh Ramsa , Fuankhawmna Buannel râm, Sadaiêk leh Fîara tuithîang luanna, Ngênpasaltha te râm tuanna hmun chu- Ruihhlo chikim fuankhawna hmun ah a châng zo ta. A thinurthlâk tâk zêt zêt a ni. Kan pasaltha (Thalai) te chu ruihhlo bâwih ah an tânga mual an liam zawih zawih ta rêng mai. Naupang pawi sawilo te Nu neilo leh Pa nei lova an tapkhûr zawih zawihna hmunah a châng mêk a. “Kan Zalênna, himna bêr, Kan Lu nghahna, Tual kan chaina MIZORAM chu Beidâwnna leh Mittui far reh theih tawh lohna hmunah a chang ta.

Hawh u, Zo-hnahthlâk unau zâwng zâwng te u, Politic inbûmna, Sumdâwnna tênawm, Ruihhlo chi hrâng hrâng, Rînna nghet lo/âtthlâk leh Hnamdang Zoram hmangaih ve lo te hi i hnualsuat vêk ang u. Zonûn zemâwi tlawmngaihna hlû, tuarchhêlna, taimâkna hmângin i ûm bo ang u hmiang. Aw Zoram kan hmangaih che, chhantu i nei, Zo-hnahthlâk Thalai Y.M.A. Zoram tân, “KUANGLO NAWR TUR” i nei love. “KHUANUN A VENG RENG A CHE.” ‘Hei Sahrâng hmaa zâm ngailoval Ngênpasaltha (Khuangchera, Vannapa, Taitesena, etc,.) leh Thlângkawrvâi/Sâp ngâmloh tlâwmve ngâi lo Lalnu Ropuiliani Zonû mihuaisên te îangin kan rawn pênchhuak e..’ tiin kan ram tan i han pen chhuak thar leh ang u hmiang. “YMA vûl zêl rawh se”…

Leave a Reply