KUMPUAN ‘ZIRNA UAR’ KAIHHRUAINA

Kum 2019-a YMA General Conference vawi 72-na chuan kum 2019-2021 chhunga YMA Kumpuan thupui atan ‘ZIRNA UAR’ tih a thlang a, Zirna uar tih hi kum 1996 leh 1997 khan YMA kumpuan atan hman a lo ni tawh a, he Zirna Uar tih hian a tum ber chu zirna kawng hrang hranga Mizo fate’n hma kan sawn theih nan a hmalak a ni.

Zirna hi hlawm lian tak pahnihah a then theih a, zirna pangngai (formal education) leh remchan dan anga zir (Non- formal/informal education)-te a ni. Hengte hi YMA kumpuan hian a huam vek a, zirna in a tum ber chu hriatna tihzau, kawng hrang hranga mi hman tlaka buatsaih leh mahni kut ke a ding thei tura inchher puitlin hi a ni ber awm e.

BRANCH YMA TIH TURTE :
Kumpuan bawhzui turin Kumpuan Committee a din ang a, kumpuan pual inkhawm buatsaihin, he inkhawmah hian zirlaite kokim taka an tel theih nan hma a la ang. A hnuaia tarlan te tihlawhtling turin theihtawp chhuahin hma a la ang.

I. Zirna hmasawn nana hmathlir leh ruahmanna :

  1. Zirna kawnga khawtlangin hma a sawn theih nan mi bik, pawl leh vengchhung zirna in a thawktute nen inrawn khawmin, thawhho dan kawng a zawng ang.
  2. Kum khatah Branch huam chhunga zirna inte a tam thei ang a tlawh chhuakin, kumpuan zirtirna te a nei ang a, an dinhmun a zirchiang ang.
  3. Zirlaite entawn tlaka zirtirtu te’n nungchang tha an neih theih nan leh an hnathawhna hmunah thahnemngai taka an thawh ngei theih nan hma a la ang.
  4. Vengchhung zirna in tlabal leh zirna ina thawktute mamawh phuhru turin a theih dan angin hma a la ang.

II. Zirlaite hmakhua leh hmasawn nana hmalak :

  1. Zirna boruak tha zirlai ten an neih theih nan, zirlaite tibuai thei ang programme siam loh thin nise, zirlaite zan lama tei rawlai mai mai an awm loh nan leh zing lama an thawh hma theih nan a tul angin hma a la ang.
  2. Zu leh ruihhlo laka zirlaite an fihlim theih nan hma lain, zirna in bul hnaiah zuk leh hmuam, ruih theih thil zuar an awm loh nan hma a la ang.
  3. Zirlaite dawm kang turin a tul angin zir bingna (Remedial class/ tuition class) a buatsaih thin ang.
  4. Ziak leh chhiar thiam rual, thiam loten an thiam theih nan hma a la ang.
  5. Naupang sikul kai rualin sikul an kai vek theih nan hmalak nise, harsatna avanga sikul lut thei lote chu an kal theihna tur theih angin ngaihtuahsak nise.
  6. Zirna lama mi bik (talent nei tha) zir zelna atana sum leh pai lama harsatna neite chhawm dawlna kawngah hmalak nise.
  7. Zirlai ten lehkha chhiar an uar deuh deuh theih nan YMA Library awm sate tihchangtlun a, a la nei loten an neih ngei nan hmalak nise.
  8. Zirlai ten tum fel tak nen lehkha an zir theih nan, an kalna awm kawng kawhhmuhna (Career awareness) a remchan dan anga buatsaih thin nise.
  9. Zirlai nawlpuiin eizawnna tlak thiamna an neih theih nan zirna tluang tlam piah lamah (Co Curricular Activities ) hmalak a, tan lak thar nise.
  10. Taima leh thahnemngai taka hlawhtling ngei tura zirlaiten zirna an kalpui theih nan infuihna a nei thin ang.

III. Ram leh hnam tana zirna kalpui :

  1. Ram leh hnam hmakhua thlir chunga thahnem ngai taka zir tura infuih a, zonun zemawi chawisang a, Mizo tawng hmang uar leh hmang dik tura infuih thin nise.
  2. Khua leh tui tha ni tura inzirtir a, vantlang tana thiltha tih kawngah tan la zel tura infuih fo nise.
  3. Zirna lama tithate leh zirtirtu thate chawimawi a, lawmman siamsak thin nise.
  4. Eizawnna kawng hrang hrang leh chenhona atana kan mamawhte, a taka inzirtirna a tam thei ang bera buatsaih nise.
  5. Lehkha zirna pangngai/tluang tlam bakah a tui mite tan kut themthiamna lam kawhhmuh turin a remchan angin hma a la ang.
  6. Zirna bultanna hi chhungkua a nih avangin nu leh pate’n chhungkua uap lum tam tura infuih thin nise.
  7. All India Service leh Central Service-ah a tam thei ang ber lut tura infuih a, central sorkar hnuaia hna awm leh hna dangah pawh a tam thei ang ber lut tura infuih thin nise.
  8. YMA DAY-ah ‘ZIRNA UAR’ thupuia hmangin programme a siam ang a, kum tin September thla ral hmain Central YMA-ah report a pe ang.
  9. Heta tarlan bakah hian a tul angin kumpuan tihhlawhtlin nan hma a la ang.

GROUP YMA TIH TURTE:

  1. Branch YMA tih tur tarlante hi a remchan dan ang zelin Group YMA in a bawhzui ang.
  2. Group YMA huamchhungah a remchan angin kumpuan zirhona a buatsaih ang a, Group YMA hnuaia Branch YMA te tan kumpuan bawhzui tha lawmman a buatsaih thin ang.
  3. Group YMA Conference emaw Rorel Inkhawmah emaw Zirna Uar hi thupuia neih nise.
  4. Group YMA huamchhunga zirna in awmte, a remchan danin Group YMA hruaitu ten tlawhchhuah ni se.
  5. Heta tarlan bakah hian a tul angin kumpuan tihhlawhtlin nan hma a la ang.

SUB HEADQUARTERS YMA TIH TURTE:

  1. Branch YMA tih tur tarlante hi a remchan dan ang zelin Sub Headquarters YMA in a bawhzui ang.
  2. Sub Headquarters YMA huamchhungah a remchan angin kumpuan zirhona a buatsaih ang.
  3. Sub Headquarters Conference emaw Rorel Inkhawmah emaw Zirna Uar hi thupuia neih thin tur a ni.
  4. Heta tarlan bakah hian a tul angin kumpuan tihhlawhtlin nan hma a la ang.

CENTRAL YMA TIH TURTE :

  1. Kumpuan hawnna inkhawm a buatsaih ang a, kumpuan hlawhtlin nan rampumah awareness campaign uar takin a nei thin ang.
  2. A bulthum atanga zirna a kal fuh theih nan hetiang hian target group neiin hma a la ang.
    1. Pre School Group
    2. Elementary Group
    3. Secondary School Group
    4. Higher secondary School Group
    5. College leh University Group
  3. A remchan dan angin social media/print media/electronic media kaltlangin zirna uar thupuia hmangin inzirtirna/infuihtharna leh zirlaite hmasawnna turin hma a la ang.
  4. National leh State programme pawimawh bik a nih loh chuan vantlang/sorkar thiltihah an zirna tibuai thei zawnga zirlaite an tel tam loh nan a tul angin hma a la ang.
  5. Zirna in hma a sawn theih nan a tul angin sorkar leh pawl dangte nena thawhho dan a dap thin ang.
  6. Mizoram hmun hrang hrangah skill development training a remchan anga buatsaih a nih theih nan, sorkar leh pawl dang nen hmalakho dan a ngaihtuah ang.
  7. Career guidance/awareness uar taka kalpuiin, state chhungah a tam thei ang ber Career Guidance Centre din a nih theih dan kawng a zawng ang.
  8. All India Service/Central Service/Staff Selection Commission leh a dangte-ah a tam thei ang ber luh a nih theih nan hma a la ang.
  9. Kumpuan bawhzui tha lawmman Group leh Branch YMA te tan a buatsaih ang.
  10. YMA General Conference leh Rorel Inkhawmah Zirna Uar hi thupui atan hman nise.
  11. Heta tarlan bakah hian a tul angin kumpuan tihhlawhtlin nan hma a la ang a, Branch YMA tih tur tarlante hi a remchan dan ang zelin a bawhzui ang.

Leave a Reply