KUMTHAR AH CHUAN

– C. Darthankima, Chairman
Local Council

Khua leh tui tha: Khua, veng chhunga awm ten, Dan leh Hrai kan zawmthat hian khua leh tui tha kan ni mai tiin a tawi zawngin han sawi mai ila.

Local Council ten Dan leh Hrai vengchhung tan kan han siam thin a:
1) Mahni in leh a vel vawnfai.
2) Bawlhhlawh, bawlhhlawh motor-ah chiah paih tur.
3) Garage neih vek tur.
4) Turning point-ah motor dah loh tur.
5) Luikawrah bawlhhlawh paih loh tur.
6) Kalkawng dungah tui chhia paih loh tur.
7) Ui khuahkhirh tur
8) Septic tank mi dangte tan a rimchhia a tih loh tur etc. te hi han zawm tlang thei ta ila, khua leh tui tha kan ni in, kan veng pawh a nuam ngawt ang le.

Awle, YMA Senior Adviser ka nih na angin YMA lam rawngkai kan sep ve lawk ang e.

YMA in kumtin mai khel lova kan tih ngei ngei ngai a awm a, YMA membership fee khawn,Chhiatni fund khawn leh Nursery Aw man khawn te a ni.

YMA membership fee hi chu duh leh duh loh a nia, Tin, Nursery Aw pawh hi a ni tho awm e.

Chhiatni Fund (Thlanmual fund) erawh hi chu chhungtin ten a bat a kan bat tlat a ni tih Nursery Veng mipui te hian i hre thar leh ang u.

Chhungtin te hian Chhiatni thatni kan hma chhawn vek dawn. A bik takin chhiatni hi kan hmachhawn ngei ngei tur a ni tih hi kan chian sa em em vek a ni.

Chhiat kan lo tawk a, zanah nula tlangval ten min tlaivar pui a, thlan min laih sak a, kan kuangte min siam sak a, thlan lai ho ei leh in tur te, tlaivar ei leh in tur te, kuang man a tan thingzai man tam tawk sen ngai te hi han chhut chhuak teh, a tam teh mai a nia, kan YMA ten Rs 300/- aia tlemlo min khawn a, la pe thei lo chhungkua kan awm thin hi chu a pawi khawp mai. Lawm taka lo pe mai tu nih in tum teh ang kum 2019 ah hi chuan.

Huatthu ah mi in minlo changlo se, an hming hre reng mah ila kan sawi lovang a, chhiatni fund an khawn a pe lo, mahse an chhungkua in chhiat an tawk a, kan YMA hotu ten chhiatni fund an dil leh hnuhnawhte pawh kan awm nawk ta mai. Chutiang chu awm tawh lo hram se kan va duh tak em!!!

Awle , khawtlang tana thil thalo miin lo ti se, a hau ngamtu nih in tum theuh bawk teh ang u. Tu te hauh atan a khek mai lovin veng, khawtlang thatna turin kum 2019 hi chu tan lan nan in hmang teh ang u.

Kan ramah sawrkar thar alo piang leh ta. He kan sawrkar thar hian kan veng hmasawnna rawn thlen mawlh rawh se. Tunah hian PHE department hnuai ah Link Drain siamtur Local Council ten kan thlen a, hei pawh hi min rawn tihsak mai turah kan ngai a. Vengchhunga hnathawkte reng reng in a tha leh tlo tur ngaihtuah chunga hna kan thawh tlan zel hi kan tih tur ah i ngai ang u.

Hma lam pan a kan kal mek laiin thenkhat mahni insakna tur Rod chhutngil nan kawngpui dimlo taka lo hmangte, insakna bungrua cubic lung remchanga bun mai te kan chin tam loh a tha hle mai.

Awle, kan zavaiin khua leh tui tha nih in tum vek teh ang u. Nursery veng vulin thanglian zel rawh se.

Ka lawm e.

Leave a Reply