KUMTHAR AH CHUAN

Kumbul atang chuan, dinhmun ngaia awm lo in, hmasawn tumin ke kan pen ngei tur a ni. YMA Member te kan zirna,eizawnna leh hriselna kawng tin rengah hmasawn tumin bul kan tan tur ani. Chutih rualin kan nitin nun in a lohtheih loha a ken tel ei leh in thlengin kan duhtui a hun ta khawp mai, Zuk leh hmuam,..zial, kuhva, sahdah, tuibur, khaini te bakah Shikhar .. kuhva chhia atanga siam chi reng rengte, azavai khian kan nghei theilo thlawt a nih pawhin tlem a kan thlah dul tial tial hi a hun khawp mai, thalai te zawi zawia min suat tu a ni a, kan hnam tan a him lo vek ani tih hria in changkang zawk leh puitling zawk, zirsang zawkte phei chuan tihloh luih kan ngam a hun ta, hriselna atan a thalo ang chi reng reng hi chu inhrilh hriat a, zawm hram hram tumin kumbul i tan tlang theuh ang u.

Chutiang ang bawk in, kan veng/khua hotu lu te, Local Council leh NOG’s te’n veng chhung thatna tura dan an zam te mipui nawlpuiin kan zawm thiam a tul khawp mai, Local Council thuchuak; Ui leh Ar Z(ran) khuahkhirh thu ah te, mahni in leh avel te vawnfai chungchangah te, bungrua chhekkhawm leh Motor park chungchangah te, tui chhe paihna leh mahni inbul kawr thenfai thin te, Sorkar thu pawimawh mipui hriattirna thuchhuah ang chi Local Council te kutah an dah mipuite hnenah puanzar/thuchhuah bawhzuina kawng tin rengah Veng mipuite’n ngaipawimawha zawm thap thap thin turin Nursery Veng mipuite kan in sawm a ni.

Tin, khawtlang rawngbawltu, YMA, MUP, MHIP, JAC, NSC..etc , member kan nih chuan kan hruaitute kan tawiawm thin tur a ni a, tar leh upa zawk te, naupang chumchiap te thlengin veng tan kan pawimawh vek ani tih hriain kan theih tawk theuh i chhuah tlang dial dial ang u. Vengchhungin chhiat that a tawh changte, Sorkar atanga hmasawnna eng ilo a lo thlen changte a awm ang, chumi hunah chuan mawh kan phur vek a ni tih hria ila, tanrual hunah tumah bengkuai thlep mai lovin kan inngaihven tlang thin tur a ni. Veng thatna tur anih chuan tute emaw hmalakna sawi sel mai loin kan inpui tlang dial dial tur a ni, tangkai loh chin kan nei ang, chutiang hunah pawh chuan vui mai lovin rilru thianghlim taka lo inthiarfihlim te zirthiam tlang turin kan inchah bawk a ni.

A tawp berah chuan, ruihhlo hian kan khawtlang,chhung-kua,kohhran leh Sorkar thlengin a khawih buai a, Kohhran hrang hrang, pawl hrang hrangin a din Nursery veng Joint Action Committee (JAC) in Veng tan a ke a penna kawng hrang hrangah kan support thiam a tul hle mai. Ruihhlo ngaite an fihlim theih nan te, vengchhunga ruihhlo chi hrang hrang zawrh leh a punlun loh nana an hmalakna te, nu nau tar leh naupang chumchiap zawkte an lo him zawkna tur leh thangthar zawk te ruihhlo laka an fihlim theih nan te, ruk ruk leh vangtlang/Sorkar thil venhim hna te an thawk nasa hle a ni tih hriain an tha tichak zawnga kan khawsak a tul tak meuh meuh a ni.

Kum 2019-ah hi chuan khawtlang rawngbawltu nih vek tum i la, khawtlang hruaitute thu zawm thiam ila, mitin in mahni inbul thenawm khawvengte tan harsatna siamtu nih loh tum vek ila, misual/awmtha duh lo te lakah biru mai lovin intanpui/intawiawm dial dial thin turin kan inchah bawk a ni.

Leave a Reply