KUMTHAR LEH RILRU THAR

– Lalrinzuala Chawngthu

Tum ren run vang pawh ni lovin kum 2010 chu kan lo hmang tan ta reng mai! Mithiam leh fing zawkte angin thurawn tha awm tak tak han chhawpchhuak ve ngawt teh ang.

Mithiamte chuan hun kal tawh atanga inenleta hmalam hun atana inbuatsaih a that thu an sawi thin a. Kum 2009 chhung khan kan hun leh nun hman danah tih fuhloh emaw tih hmaih emaw kan nei mai thei e. Chutiang kan lo awm anih chuan Scientist ropui Albert Einstein-a thil thlir dan hi ngun takin lo ngaihtuah ve teh khai. Kum 67 a tlin kum chuan a thil siamna Factory a kang vak mai a, a hlutzawng lah chu Cheng nuai tlem hu chauh a ni mai si a. Einstein-a chuan kum tam tak chhunga a hnathawh leh thawhna hmun chutia meivapa chang ta chu ngun taka thlir vang vang chungin,”He chhiatna rapthlak tak hian hlutna tam tak a nei a nih hi. Thil thar hmuchhuak thei tura ka nunna min la zuak sak avangin Pathian, i chungah ka lawm e” a la ti fan a nih chu! Chu mi hnu kar 3-na ah chuan Phonograph a hmu chhuak ta mai bawk a ni. Tin, Electric bulb a hmuhchhuah dawna vawi 10,000 lai mai a tih sual chu tihsual ni lovin a tih dan dik zawk hmuh chhuahnaah a ngai hmiah thung bawk a ni.

Nia, mihring kan nih chuan tihsual leh hlawhchham chang hi thleng ngei ngei tura ngaih a ni. Mi hlawhthling tak tak hlawhchhamna aiin an lo hlawhtlinna kan hmuh lansarh thin bakah mi vannei tawp niin kan sawizui fo thin. Pathianin hlawhchham ngawt turin tumah min siamin a rinawm lohva, nang leh kei ngei pawh hi engemaw kawnga hlawhtlinna ropui tak thleng turin Pathianin min siam tih ngaihtuaha beiseina sang tak nei chungin he kum 2010 hi YMA Member zawng zawng ten hmachhawn ila, he kum hian engemaw thil tha, kan la hmuh/neih ngai loh min pe ngeiin ka ring tlat a ni.

Thalai, zu leh ruihhlo avanga engmah ti thei lo, beiseina nei lo YMA Member kan la awm fo mai hi thil lungchhiathlak tak a ni a, kan ram leh hnam, khawtlang leh chhungkua tan tunah tih theih nei tlem hle mah ila 2010 kum tawpah khi chuan engemaw tangkaina tak nei turin rilru i siam ang u.

Leave a Reply