KUMTHAR THU CHAH

– C. Lalchhanhima
President, NYMA

Kumthar 2020 chu Pathian khawngaihna leh a kaihhruai na in kan lo chuangkai ve leh ta reng mai le. YMA Member zawng zawng te leh khawtlang mipui kumthar chibai ka buk che u a, he kumthar hi in tan malsawmna a nih theuh ka duhsak a che u.

Kumhlui kan hmanral takah khan mi tam takin chatuan ram min pansan a, keini erawh a khawngaihna in kumthar kan chuangkai tak avangin lawm a Lalpa lam kan hawi hi kan tihmakmawh a ni.

1. Kumthar 2020 hi nangma chakna a thleng i nilo.
Kum 2019 chhung khan mi tam tak vui liam an ni a. Kei leh nang hi vui liam-ah kan tel lova, Pathian khawngaihna a ni. I hausak vangte, i fel vangte, i hmelthat vangte a i hlawhchhuah a ni lova, Lalpa zahngaihna a thleng i ni zawk a ni. Chuvangin he kumthar hi midang tan a malsawmna ni turin in buatsaih rawh. YMA hi midangte tan a malsawmna nihna kawng lian leh zau ber a nih avangin YMA-ah hruaitu kan ni emaw nilo emaw theihtawp in chhuahtlang teh ang.Chu chuan kan vengchhung nawmna pawh thui takin a hril a ni.

2. Dikna leh rinawmna.
Kum 2020 bul tan nan kan nun-ah dikna leh rinawmna i nunpui ang u. Kan hmuh phakah ruihtheih thil tih a vangin buaina nasa tak kan tawk a. Mi pawisa batsak, ruksak, mi in rawk leh thil bo te kan hre tam ta hle mai a. Joint Action Committee in theihtawp a chhuah a, tan kan la chungin tam tak chu tihngaihna kan hriat loh a thleng mek zawng a nih hi.

Heng zawng zawng hi dikna leh rinawmna kan nunpui tawk loh vang a ni, ti ila a sual lo ang. YMA member zawng zawng ten dikna leh rinawmna kan nunah kan vawn tlat a pawimawh hle mai. Kan Pathian thu chuan ‘Lalpan a phut che chu enge ni? I Pathian nena thuhnuairawlh taka len dun a ni lo vem ni?’ (Mika 6:8). Rinawmna leh dikna hi Pathian in min phut angin kan nunpui tak meuh angai a ni. Chumi hunah chuan a nuamin inthenawm khawvenna leh thawhhona-ah hma kan sawnin vengchhung a nuam anga, inlaichinna alo thain a lo nghet dawn a ni.

Mosia pawh khan Pathian mit chu Israel te chungah a fuk reng tur thu a sawi angin he kumthar 2020-ah pawh hian Pathian engkimtithei, engkim hria, khawikipa awm chuan min thlir reng dawn a, a thu lo in engmah kan ti thei si lova, YMA member ten kan tih tur theuh tha tak leh dik taka kan tih theuh theih nan membership fee pek ngawt duh tawk lo a, kan vel a midang te tana tha leh zuala hun hman hi a taka kan nunpui a ngai a ni. YMA tobul hi Pathian hriatpuina a din a nih angin midangte tanpui a, midang te tana malsawmna kan nih theihna kawng hrang hrang-ah theihtawp kan chhuah leh zual ava ngai em, tiin he kumthar- ah hian member zawng zawng te kan insawm thar leh a ni.

Kan dam rei zawng hi kum reilam a teh lova, Ram leh hnam khawtlang tan engtiang chiah a Rohlu nge kan hnutchhiah theih tiin kan rilru theuh siamtharin lo awm sela.

Pawl reng reng chu committee rorel anga kal zel kan nih angin, Executive Committee Member leh Section hruaitu chin chuan a bik takin Branch thu leh hla hi kan ngaih pawimawh thiam a tul hle a, ngai pawimawh lova mahni duh dan a thil a kal loh chang a, thil ti tha duhlo kan awm thin te hian pawl a ti thuanawp thei. Sawiseltu ni lova thu rawn pe a fuih tang thintu pawl leh hruaituten an mamawh em em tawngka chauh nilo a, a tak a thawk thin mi he kumthar 2020-ah hian nih kan tum tlang dawn a nia.

“Nang nang nang, tih aiin Kei kei kei’ tih na-ah thawh hona a tha in pawl a chak thin. YMA a nih angin a dinchhuah, a lo irh chhuah danah midangte zai ngai a kal a hlu a, kal thiam a tul. Kan thlen chin a tangin hma i sawn theuh ang u, ka lawm e.

Leave a Reply