Kumthar Thuchah

– C. Darthankima
Chairman
Local Council, Nursery veng

Pi leh pu, thian duh tak te u, a hmasa in kum 2020 min hruai thlengtu Pathian hnen ah lawmthu kan sawi hmasa duh a. Kum 2019 chu ngai in au au mah ila, kan au kir rual lohin hun in a liampui ta si a. Kha kum 2019 ah khan mitthi 28 kan nei a, ruang chhuak 4 niin, 24 te chu kan thlanmual ah vuiliam an ni. Khawhar lusun chhungte kan tawrhpui in, an lusunna te Lalpan min hnem sak rawh se.

Pathian tanpuina leh kaihhruaina a zarah kum 2019 khan Nursery Vengin hmasawnna thil chi hrang hrang kan dawng a. Tin, khawtlang rorelna lamah kan Local Council-te leh N.G.O te thawh hona a tha a, kan lawm em em bawk a ni. A bik taka kan sawi duh chu kan J.A.C te chungah lawmthu kan sawi duh a, khawtlang nun veng mipui ten ralmuang taka min hman tir tu te an ni a. Tin, ruihhlo ngai te an simna turin Home hrang hrangah te a tul anga hma min laksaktu te an ni. Samari mitha ang mai in, a thim a var, a sur a sa hnuai ah mahni inlum pawh thlahlel hlei thei lovin an hun te an hmang a, an va han fakawm tak em!! Kan sawi belh leh duh chu he kan J.A.C te hmalak nan hian mimal, thianho, kohhran etc. ten sum kan han pe thin a, a va han lawmawm thin tak em!!

Awle, hla in “Nunhlui ngaih a sawt lo, kan hma lam i thlir ang”, a tih ang hian kum 2020 hi engtin nge kan hmachhawn tak ang le??

Khawtlang rorelna kawng ah: Mimal, chhungkaw tin ten kan zawm tlan zel hi he veng leh khawtlang hian kan va mamawh tak em. Local Council ten bawlhhlawh paihna man chhungtin hnenah an han khawn a, hei hi A.M.C thupek a ti kan ni. Mahse, chhungkaw thenkhat chuan chungte pawh chu kan lo hnial tlat a, kan lo pe tha duh lo vel a, hetiang tih ching te hi mi changkang lo tak hna a ni tih kan hriat a pawimawh hle. Y.M.A pawh in chhiatni fund an han khawn a, lo pe tha duhlo kan awm fo te hi, kan chin loh a tan a tha.

Khawvel changkang zelin kan ram khawtlang min rawn luhkhung ve zel a. Kan khawtlang alo thianghlim a, alo fai hi kan tun hun ah kan lo mamawh ve ta. Kan in leh a vel kan tihfai mai bakah kan ran vulhte, midang te tana hnawk leh rimchhia kan siam loh a pawimawh hle a ni.

He kum lo tharah hian kan in leh lo, mite kan luahtir dawn pawh in, i fimkhur tlang teh ang u. Eng ang mi nge a nih chian hmasa zel phawt ila, kan fimkhur loh avangin kan veng hmingte a ti chhe thei a ni tih kan hriat tlan a tha hle mai. Tin, pem lehkha an neih leh neih loh hriat hmasak tum bawk ila, neilo chu i luah tir lo ngam bawk ang u.

Bawlhhlawh ah kan lut leh lawk ang a, Aizawl veng 83 ah hian veng 19 min thlang chhuak a, chutah chuan Nursery veng hi thlan chhuah ve kan ni. He veng 19 te hian Bawlhhlawh a tawih thei leh theilo tha taka thliar hrang turin min ti bik a, min ngennna te ngai pawimawh in, a tha thei ang bera kan bawlhhlawh te thliar hram i tum ang u.

Sawi tur a tam mai, kan insum hrih lawk mai, a sei lutuk dawn e. Kan sawi leh hram duh chu, kumin ah hian Local Council te kan inthlang leh dawn a, vengchhung party tin ten uluk taka ngaihtuahna hmang turin kan insawm a, a thlawptu mipui te pawh in Party ruihchilh lova, veng tan a mitha thlang thei turin i inbuatsaih ang u.

Engpawh nise kan thlen chin atangin hma i sawn zel ang u. He kum thar lo inher chhuak hian mimal, chhungkua, kohhran ah malsawmna tam tak lo thlen mawlh teh se, in zavaiin duhsakna ka hlan a che u.

Ka lawm e.

Leave a Reply