KUMTHAR THUCHAH 2018

– Zokunga (President, NYMA)

Nursery Veng mi zawng zawngte Nursery Veng Branch YMA hmingin kumthar chibai ka buk che u a. He kumthar (2018) duhawmtak kan chuankai mek hian Nursery Veng mitin tan malsawmna tamtak rawn her chhuahpui mawlh rawh se.

Kum kalta lamte kan thlir kir chuan vengchhungin thihna kan tawh nasat em avangin mi tamtak mittui pawh a la hul lo ngei ang. Thihna meuh hi zawng a tuartu chhungkaw tan hian a nat vawng vawng em avangin awm pawh a awm viau reng a ni. Mahse, kan Pathian thu ah meuh “a mi thianghlimte thihna chu Lalpa ngaih chuan hlu tak a ni” (Sam 116:15) tih kan hmu a. Kan hmangaih kalta te Lalpa’n a hnen a min hruai saknaah hian thu kan neih ve miau loh avangin a thuneitu berin hlu a tih miau avangin harsa hle mah se, mittui nen pawh kan ngaihhlut a kan lungduh kalta te nena chatuan atana inthen tawh ngai lo tura kan intawhkhawm hun tur thlir vawng vawng phawt mai hi kan tih theih awm chhun a ni rih anih ber hi maw.

Engpawhnise, Pathian hruaia kumthar duhawm tak kan lo chuankai tak mekah chuan Pathian thuin min zirtir ang a hnung lama thil awmte chu theihnghilh a, hma lama thil awmte chu ban zawk thei tura kan inbuatsaih a pawimawh hle mai. Hei hi thihna chung chang kher lovah pawh kan nitin nunphung hrim hrimah kan vawn reng atan leh kan nun kaihruai tlattu atan a pawimawh reng dawn a ni. Kum kalta lamah khawtlang ang leh YMA ang te pawhin thil chi hrang hrang kan tawng hnem hle a. Chung zingah chuan hriatreng atana tlak loh leh theihnghilh zui hmiah atana tha zawk te pawh a awm ang a, hriatreng atana tha leh chhunzawm zel chi te pawh a awm teuh ang.

YMA thlirna tlang atanga thlir a kan chhunzawm makmawh leh in inlet chunga kan in siamthat ngai thil pawimawh thenkhat lo tarlang ila.

1. YMA leh Local Council (LC), Kohhran hrang hrang leh NGO hrang hrang ten thawhhona tha tak kan neih thin hi chhunzawm zel atan a duhawm hle.

2. YMA leh vengchhung nu leh pa ten kawng hrang hrang a thawhhona tha kan nei te, YMA hmalaknaah thahnemngai taka veng chhung nu leh pa te thawhpuina kan hmu thin hi a ropuiin chhunzawm zel nise.

3. Branch/Section/Sub-Committee YMA hruaitute leh member te inkara in hriatthiamna leh thawhhona tha hmuh tur a awm fo thin te hi chhawm nun zel atan a duhawm hle.

4. Vengin chhiat kan tawh nikhua leh YMA in hnatlang a koh nikhua a hruaitute emaw midang hrim hrim emaw phut ran lova kan che chhuak suau suau thin te hi a ropui a, chhunzawm ngei ngei chi a ni.

5. YMA hian sum lakluhna ngelnghet a neih loh avang leh kan sum dinhmun te a chhuanawm fahran lo tih hrechung a LC, NGO dang te leh vengchhung nu leh pa ten YMA tana pawisa fai emaw kan mamawh em em bungrua eng eng emaw min ngaihtuah sak thin te hi chhawmnun zel atan a duhawm hle.

6. YMA in Fee/fund a khawn zingah kum kaltaah Chhiatni fund leh Nursery Aw lak man pe lo kan tam viau erawh nu leh pa te mai bakah a khawntu atana ruatte pawhin tan kan lak thar a ngai hle niin a lang.

7. Hun vawn chung changah YMA hruaitu leh member te a bikin lumen zana kalkhawm hun, thlan lai tura chhuah hun, khawhar in a kal hun, hnatlang a thawhchhuah hun leh YMA programme dang hrim hrimah tun aia hmasawn deuh kan ngai niin a lang.

Thil lawmawm lam leh in siamthat kan ngaihna thil thenkhat kan tarlan tak ang te hi Veng/Branch dang te pawhin an tawh ve fo tho anih avangin “Eng pawh ni sela, kan thlen chin atang khan hma i sawn zel ang u” tih kan Pathian thuin min zirtir angin, kumtharah rilru thar nen engemaw zawng tala hmasawnna rahbi thar rap turin tan i han la sauh sauh teh ang u khai.

Thuvawn atana “YMA chu tanpui ngaite tanpuitu a ni” tih neitu YMA hi lo vul zel rawh se.

Leave a Reply