KUMTHAR THUCHAH

– C. Lalchhanhima, President
NYMA

Kumthar 2021 chu Pathian khawngaihna leh kaih-hruainain kan lo chuangkai ve leh ta reng mai le. YMA Member zawng zawng te leh khawtlang mipui kumthar chibai thinlung takin ka buk che u a, he kumthar hi in tan malsawmna lo ni mawlh rawhse tiin duhsakna ka hlan a che u.

Kumhlui kan hmanral takah khan mi tamtakin chatuan ram min pansan a, keini erawh a khawngaihna in kumthar kan chuankai tak a vangin lawma Lalpa lam kan hawi hi kan tih tur leh kan bat a ni.

1. Kumthar 2021 hi nangma chakna a thleng i ni lo.
Kum 2020 chhung khan mi tam tak vuiliam an ni a, kei leh nang hi vuiliam-ah kan tel lova, Pathian khawngaihna a ni, I hausak vangte, i fel vangte, i hmelthat vangte a i hlawhchhuah a ni lova, Lalpa zahngaihna avanga thleng i ni zawk. Chuvangin he kumthar hi midang tan a malsawmna ni turin inbuatsaih nasa leh zual ang u. YMA hi midangte tan a malsawmna nihna kawng lian leh zau ber a nih a vangin YMA -ah hruaitu kan ni emaw, nilo emaw, theihtawp i han chhuah leh zual teh ang u, chu chuan kan vengchhung nawmna, leh nawmlohna pawh thui takin a hril dawn a ni.

2. Dikna leh rinawmna.
Kum 2021 bultan nan kan nun-ah dikna leh rinawmna i nunpui ang u. Kristian ni a kan inchhal a,YMA member ni a kan inchhal a nih si chuan dikna hi kan nunpui ngei tur a ni. Kan hmuh phakah ruihtheih thil avangin buaina nasa tak kan tawk a. Mi pawisa batsak, ruksak, mi in rawk leh thil bo te kan hre tam ta hle mai a. Joint Action Committee in theihtawp a chhuah a, tan kan la chungin tam tak chu tihngaihna kan hriat loh a thleng mek zel bawk.

Heng zawng zawng hi dikna leh rinawmna kan nunpui tawk loh vang a ni ti ila a sual lo ang. YMA member zawng zawng ten dikna leh rinawmna kan nunpui tlat chuan chhungkua a nuam ang a, chhungkua a nawm chuan, veng a lo nuam ang a. Veng a nawm chuan, Kohhran a hlim ngei bawk ang. Kan ram hi alo nuam anga, Kan lo hlim dawn ani. Ram a hlim a, kan inthurual chuan hmasawnna hriselna tha kan lo nei tawh ang. Kan Pathian thu chuan ‘Lalpan a phut che chu enge ni? I Pathian nena thuhnuairawlh taka len dun a ni lo vem ni?’ (Mika 6:8). Rinawmna leh dikna hi Pathian in min phut angin kan nunpui tak meuh a ngai a ni. Chumi hunah chuan inthenawm khawvenna leh thawhhona-ah hma kan sawnin vengchhung a nuam anga, inlaichinna alo thain khawtlang kan lo hlim dawn a ni.

Mosia pawh khan Pathian mit chu Israel te chungah a fuk reng tur thu a sawi angin he kumthar 2021-ah pawh hian Pathian engkimtithei, engkim hria, khawikipa awm chuan min thlir reng dawn a, a thu lo in engmah kan ti thei si lova, YMA member ten kan tih tur theuh tha tak leh dik taka kan tih theuh theih nan YMA Member nih ngawt duh tawk lo a, kan vel a midang te tana tha leh zuala hun hman hi a taka kan nunpui theuh nan mimal tin kan pawimawh angin tan i la ang u. YMA tobul hi Pathian hriatpuina a din a nih angin midangte tanpui a, midang te tana malsawmna kan nih leh zual ava ngai em. Kan hma lam hun kan hrelo, Kumthar 2021 pawh hi hripuiin min la chim reng a ni thei e, Engpawhnise, kan awm hmunah theuh rinawmna leh taihmakna kan vawn tlat chuan, harsatna, manganna pawh tawk ila khawtlangnun hi a hreawm ngailo ang.

Kan dam rei zawng hi kum tam lama teh lova, Ram leh hnam khawtlang tan engtiang chiah a rohlu nge kan hnutchhiah theih tiin kan rilru theuh siamtharin in enfiah ila. Khawtlang hmasawnna hrang hrang kan kuta awm, khawtlangro dinna kawng a, a fawng vuantuten hei hi theihnghilh lo ang u. Pawl leh hruaituten an mamawh em em tawngka chauh nilo a, a tak a thawk thin mi he kumthar 2021-ah hian kan mamawh a, chu chu i hre tlat ang u khai, kei leh nangin khawtlang hmangaihna kan nunpui loh chuan tunge, khawtlang tan ding ta ang?

3.Hun a lokal zel a, YMA Hruaitute an lo liam a mitharin a fawng kan lo vuan zel a, Vengchhung nawmna leh hmasawna ber chu Section leh Sub-Committee ten kan tih tur kan tih leh kan nih tur kan nih dik hian, Vengin hma sawn a, Vengchhung alo nuam chauh a lo ni. Kohhranin tih tur leh rawngbawlna kan neih chi hrang hrang Pathian thu leh hla kan ngaihthlak te hi a hmanchhuahna ber leh tangkai ber chu YMA hi a ni. A chhan chu a huang a zau ber a, a huam a tam ber vang a ni. Kumthar hman nuam vek ule.

Leave a Reply