KUMTHAR THUCHAH LEH LAWMTHU SAWINA

– C. Darthankima
Chairman
Nursery Veng Local Council

“ Kan nghah kumthar lawmawm chu alo thleng,
I zai ang hlim takin aw;
Nunhlui ngaih a sawt lo,
Kan hma lam i thlir ang.”

A chunga Hla thu mawi tak mai hi, kum tam tak liamta ah khan Pu Laithangpuia chuan alo au chhuahpui tawh a. Hun pui lo inher chhuah apiangin, he hla hian mite thinlung a luah khat tlat thin a nib a. Kei pawn ka’n thlang chhuak ve phawt a ni e.

Kum 2018 hlim taka kan hman laiin chhungkaw thenkhat in khawhar lusun nan kan hmanga. A bik takin khawhar lusun te kan tuarpuiin, an khawhar lusunna te Lalpan min hnemsak zel rawh se.

Kum 2018 kum chu ngai mah ila kohkir theih rual lohin min liamsan ta. Khawtlang anga kan hma lakna kawng hrang hrangte Lalpan a tha lam zawngin mal minsawn sak rawh se. Tin, mi thinlung lo tih nat palhte pawh kan nei thei e, hun in a liampui tawh anga, kan in theihnghilhsak ka duh in kan ngen a che u. Kan thlen chin ah hmasawn zel turin kan ngaihtuahna he kumthar ah hian i hmang zel ang u.

A bul tan nan a hla thu ka han tarlan tak ang in, kan nghah kumthar lawmawm chu alo thleng ta reng mai. Kum 2019 hian kan chhungkua, mimal, khawtlangah malsawmna tam tak min thlen mawlh rawh se.

Kan hla thu in “ Kan hma lam i thlir ang” a tih angin, he kumthar ah hian kan hma lam inthlir dawn teh ang u.

Nursery Veng a lo nawm zel theih nan ka’n sawi hmasak ber duh chu :-
I in hmangaih tlang ang u, i induhsak tawn ang u, thupek i zawm tlang ang u, chu chuan veng nuam leh changkang min thlen ngei ang.

Inluah hungchang:
Kum tinin kan veng in alo pung hret hret zel a. A lawmawm e. Hetah hian kan sawibelh duh a chu, kan inluahtu te ah hian i fimkhur tlang ang u. Veng minti mualpho tu tur kan lo khawi palh ang tih hi ka hlau a ni; Kan in luah tur te reng reng an awmna hlui VC/LC te atangin pem lehkha an nei ngei tur a ni. YMA ah leh LC ah a copy pe ngei se. Tin, VC/LC lehkha nei ringawt ah lungawi lovin, eng ang mi nge an nih kan theih angin i chian tlang thin bawk ang u.

Vengchhung vawnfai:
Khawvel lo changkang zel in a ken tel tlat chu, Fai leh thianghlim hi a ni; Kum 2019 kum hi kan in leh avel tihfai uar kumah hmang ila, Aizawl veng 85 ah hian vengfai ber kan nih loh pawh in top 10 ah chuan kan langpha ngei ang. Tin, kan tuichhia te kawngdunga paih lovin midangte tan a hnawklo/ngaihmawh awm lovin i paih ang u. Kan Septic tank te pawh midangte tana ngaih mawh awmlo turin enkawl ang u.

Bawlhhlawh hi kan sawi tam pawl tak a ni ta. sawrkar (AMC) in Motor in min paihsak thin a. Chuti chung chuan kan luikawrah te paih lui kan la awmfo mai a. Hei hi kan kalsan a hun ta. hetih ruala kan sawibelh duh chu Bawlhhl;awh paih man chhungtin hnenah khawn thin a ni a, vawiin ni thleng a la pe tha duhlo kan la awm fo mai, hei hi kan bansan a hun ta. Hetiang a ngawhngawl chhuah kan awmfo chuan in chungah “DAN ANG IN RO KAN LA RAWN REL VE ANG” tih hi minlo hriat sak teh u. Bawlhhlawh hi a paih lohna tura paih chu lei tam tak cawhi theihna a ni e.

Motor dahna (Garage) chunchang:
Sawrkar hmalakna kal mek ah lirthei nei zawng zawng te lirthei dahna neih vek tur a ni a, vengchhunga lirthei nei thenkhat te he dan hi zawm duhlo kan la awm hi pawi ka ti hle a, remchang hmasa berah Traffic lam nen, traffic chahbi kengin kan rawn endik leh dawn a, lirthei neitu zawng zawng te mahni garage-a lirthei dah vek turin ka ngen thar leh che u a, man palh kan lo awm a nih chuan dan ang a na taka an chungah hma lak a ni dawn a ni.

Awle, kum kalta ah NGO hrang hrangte nen lungrual takin khawtlangah hun kan hmang hova, avan lawmawm em!! Hei hi i vawng nung zel ang u. Tunah felbik, fing bik etc. kan awmlo. Thurawn inpe tlang zel ila. Sawiselna aiin fakna hi mimal tin tan ngaihthlak nuam a ni a. Sawiselna aiin fakna hian mite min ti phur fo thin tih hria ila. Hmalam pan a kan ke penna zelah a tha lamin ke pen i tum tlat ang u.

A tawp siam dawn mai teh ang, sawi tur a tam kan la sawi zel turah ngai ila, Lal Isuan, Amah hriak rimtui thih tu chunga a sawi, “A tih theih tawk a ti a ni” a tih ang hian, Nursery veng tan hian kan tih theih tawk he kum thar ah hian titheuh turin i inbuatsaih ang u. He kumthar hian in chhungkuan ah Malsawmna tam tak rawn thlen mawlh rawh se.

Ka lawm e.

Leave a Reply