KUMTHAR THUCHAH

– C. Lalchhanhima
President

Kumthar 2019 chu PATHIAN khawngaihna-in kan chuangkai leh ta reng mai . YMA Member zawng zawngte kumthar chibai ka buk a che u. Kum alo thar angin, mimal leh khawtlang pawh a, hmasawnna thar kan hmuh theih nan a tul ang anga hma la in, rilru leh ngaihtuahna chauh nilovin tha i thawh nasa leh zual ang u.

Hun inher chho hian thil tam tak, a tha lam a chhe lamin a rawn her chhuahpui ve lo thei silo. Kum 2018 pawh ain her zel a, Hun hlimawm ,hun thengthaw nuam kan tih 2018 December thla ni 7 Zirtawp zan chu kan lo thleng ta. He zan ka tana zanmak tak alo ni ta. Mumangah pawh ka la tawn ngailoh leh midang tan a ka lo dah thin, kei a tan chuan khawvel tharah ka chuangkai hi ani ber mai. Nursery Veng lian leh ropui, milar, mitha tam tak chhuahna veng chhunga YMA President a min han thlang ta mai hi chu khawvel thil mak ka nuna ka hriat reng leh pawimawh tak te zing a mi a ni dawn ta.

YMA President meuh a min hlang ta chu , lawmpuina phone call, SMS, te leh hmaichhan a chibai leh lawmpuinate min hlan hlawm a, min lawmpui rual rualin kei a tan chuan chhungril hrehawmna nen ka lawm lo a ni ber mai e. Association leh thildang tam takah ka phu loh mawhphurhna hi ka lo chelh ve bawk nen, min thlan zan a, President thar thusawi tura min sawm pawh khan ka sawi thenkhat chuan in la hria in ka ring a.” Kan Nu in min hau dawn” ka tih nghe nghe kha…mipakhatin nihna tam tak chelh hi, a chelhtu tan pawh hahthlak anih rualin, pawl pawhin a chakloh phah thin a ni. Kan Nu hian “nihna i chelh tam lutuk ‘ min ti thin, chu chu tawngkam thiam lo tan chuan kan lo hnial thla mai thin lo a, mi ngaihah chuan mipangngai deuhin kan lo lang mai mai hi a lo ni a. Kei ngei pawh hian chu chu a takin ka dai ta a ni. Mahse… kawngdangin kan ngaihtuah a, Keimah chauhin ka thawk dawn lo a,thawhpui fing leh fel tak tak te nen kan thawkho dawn a ni tih hriain min thlamuan thin. Mahse, hetianga YMA President a member ten min thlang ta anih si chuan Pathianin rem a ti em ang a Kum 2019 chu hmang turin ka han inbuatsaih ve ta a ni.

Chuan le… kumthar 2019 chu a lo inher chhuak ta chu… tiril mur deuh sung sung chungin, ti hian ka rilruah chuan suangtuahna hlimthla chu ka nei chho ve ta a . Chhungtin leh YMA zawng zawng te kumthar 2019 chibai ka buk nawn leh che u a. FAI hi changkanna , hriselna a nih angin Nursery Veng hi alo thianghlima , alo nawm theih nan mitin a lian leh ate, a tar a zurin tan la leh zual turin kan inchah a. Chumi a tan chuan kan mawhphurhna, kan koah a awm a ni tih ilo hre thar theuh ila. Chhungtin hian kan In leh lo , ram hi a tha emaw a chhia emaw pawh nise faiin thianghlim se, kan ek, Septic tank, tuichhe paihna, ranvulhna etc. te hi mite tan harsatna thlen lo turin vawn thianghlim theuh i tum ang u. Kan fate hian lehkha thiam vek se kan duh theuh a, chutihrual a pawimawh chu an nunah Mizo tlawmngaihna leh Rinawmna vawng nung tura fuih hi kan tihmakmawh ani. Rinawmna hi kan PATHIAN chawtui ber a ni si.

Pathian rawn chunga YMA member zawng zawngte YMA thiltum tihlawhtling turin kan theihna leh thiamna te hmanga thahnemngaia rinawm tak a bei tlat turin Kum 2019 hi kal i tum ang u. YMA vul zel rawh se.

Leave a Reply