LAWMTHU SAWINA LEH KUMTHAR THUCHAH

– C. Darthankima
Chairman, Local Council

Nursery Veng chhungtin te,
In zavaiin Local Council hmingin, kumthar chibai kan buk a che u. He kum thar 2011 hian chhungtinte Pathian malsawmna kawng hrang hrangah in dawn ka duhin, duhsakna ka hlan a che u. Kum 2010 kum kalta ah khan V/C anga kan hmalakna te a beitham hle a, mite thinlung tihnat te pawh kan neiin kan in ring. Nehemia chuan, “Aw ka Pathian, a tha lam zawngin, min hre reng ang che” a tih angin, vengchhung mipui zawng zawng ten, a tha lam zawnga min lo hre reng turin kan in sawm hmasa e.

Krismas leh Kumthar thlahna ah Local Council te, JAC te leh Branch YMA ten, halpuah hal lo tura kan in ngenna tha taka min zawm tute chungah lawmthu kan sawi duh a. Sualna chi hrang hrang laka min vengtu tur leh, mipui ten harsatna kan neih kan thlenna turin, Dt 16.12.2010 – 02.01.2011 thleng JAC duty kan in siamah, duty zawng zawngte chungah lawmthu kan sawi a. Tin, hemi ruala kan sawi hmaih hauh loh tur, kan MHIP ten, duty te dangro dangchar a an awm lohna tura zan tin mai, thingpui tuihnai tak leh a hmeh tuihnai tak min pek thin avangin, kan va han lawm em !! Tin, Sorkar atangin Police leh Excise Department atangin sum kan dawng a. Chubakah, kan branch YMA MH P, Local Council atang te leh mimal tlawmngai hnen atangte in sum kan dawng a. Chungte chuan meihawl te leiin, duty te tan nuam taka an duty na turte kan in siam a. A va han lawmawm em !! Heng ang zawng zawng mawhphurhna min laksak tu kan JAC te chungah mipui aiawh in lawmthu kan sawi nghal e.

Tin, Nursery Aw chungah lawmthu kan sawi leh duh a. VC emaw Local Council angin, mipui hnena thu puanzar tur kan neih te tha tak maia min chhuahsak thin avangin, kan lawm tak meuh meuh a. Kan mawi lohna lai turah te pawh min rawn thuam mawina tam tak avangin lawmthu kan sawi a. Tin, Information atang pawh a kan duh hun hunah thu leh hla min puansak thin avangin kan lawm hle bawk a ni. Vengchhung Street light chungchangah a chhiat a thatah siam tha turin Pu Lalthanzauva (LTA) a in pek reng theih avangin kan lawm hle a. A hming kan tarlang mai a, min lo ngaidam mai teh se. Hetih laia kan zeh tel duh chu, kan street light te lo vawm chhia an awm leh thin hi pawi kan ti a. A venhim kawngah mipui i tang tlang ang u. VC anga hma kan lakna kawng hrangah Branch YMA in min tawiawm tlat thinna avangin lawmthu kan sawi mawlh mawlh bawk e. Tin, kan YMA Section hrang hrang te hmalakna a lawmawm kan ti a. An hmalakna avangin kan lang mawi hle a. A bik takin, ‘M’ Section YMA te phei chuan, vantlang tan Asset pawimawh tak an siam avangin kan lawm hle.

Kan MUP te pawhin, Fai leh thianghlimna kawngah an tha nasa taka an thawh avangin kan lawm hle. Awle, a tawp bera lawmthu kan sawi leh duh chu, kan Kohhran hrang hrang chungah a ni a. Anni hian, he khawtlang thatna turin kawng hrang hrang in hma an la a. Tisa ah leh thlarauah kan that phah nasa a. Tin, VC ang leh Local Council ang pawh in min tawngtaipui thinna ah lawmthu kan sawi mawlh mawlh a ni. Hei le, kum chu a lo thar ta reng mai. Kan In ah te Kum 2011 Calendar tar ta. Hlim tak a hmang turin duhsakna chhungtin kan inhlan nawn leh a. Local Council te hian kan tih theih hi a tlem em mai a. Engpawh nise, kan tih theih ang ang ah, vengchhung tan tha nasa taka thawh kan tum tlat a. Kan MLA leh AMC Chairman te nen, theihtawp chhuahin, he veng siam kawngah hmalak kan tum tlat a ni. te pawhin kum danga an la tih ngailoh, ‘kawngpui sial” kumpuan an nei a. Hetiang kumpuan kumah Local council kan ni hi kei leh ka thawhpui te hian a vanneihthlak kan ti a. Amaherawhchu kan insit hle a, kan tih theihah tlanchhiat kan tum lo tih erawh min lo hriatsak kan duh a ni. Veng nuam siam turin pawimawh atam hle a, kan sawi seng lovang. Kalkawng nuam hian veng a tinuam a, chumi atan chuan kan ram te vantlang tan i pe phal ang u.

In sa thar turin Local council te hriattir hmasak thin nise. Tin, kan in luah tur te pawh i duh tui tlang ang u. Veng tihmingchhetu tur i luahtir lovang u. Kan in leh a vel vawnfai kawngah chhungtin ten hma ila thar zel ang u. Kan tuichhe paih te midang tan a hnawkah i paih lovang u. Kan vawk in leh Ar in te midang tana rimchhiaah i sa
lovang u. Zu leh ruihtheih thil hi kan theihang tawkin i do tlang zel ang u. Veng nuam leh veng changkang siam turin mitinin mawh kan phur theuh tih hria ila, tu tih turah mah i dah bik lovang u. Vengchhung thatna tur chungchangah englaipawhin thurawn pek theih reng kan ni a, sawisel kan kan ngaihna ah pawh inhmaichhan zel hi kei leh ka thawhpuite duhthusam a ni e.

NURSERY VENG VUL ZEL RAWH SE
Ka lawm e.

Leave a Reply