Lawmthu Sawina : Y-Section

Nursery Veng Branch YMA, Y-Section committee meeting chuan Futsal Tournament buatsaih chu a rel thlu ta tlat mai sia, a bawhzui tur committee an din nghal a. Khawia sumin nge kan buaipui tak ang? Tih rilru hah taka kan ngaihtuah laiin, Pu V. Liandawla te chhungkua chuan an fapa Pu Daniel Vanchhuanga (L) hriatreng nan he tournament hi buatsaih an duh hlauh mai a, Daniel Vanchhuanga Memorial Futsal Tournament siam tur chuan kan phur tlang khawp mai.

A pawimawh ang angte kan han buaipui chho ta a, tournament tan hma hauh pawhin thiltul dang tihtur alo tam khawp mai a, rin aia tam sum kan seng ta daih mai a. Kan buairukna te min hriatthiam pui takin kan Branch YMA leh Section hruaitu hlui leh mi tangkai tak ni thin, Pu Zokunga (Jk-a) chuan department hrang hrangte phone hmanga min biaksak mai bakah amah ngeiin department lam hotute min hmuhpui zung zung bawka, a chungah hian lawmthu sawi senloh kan ba a ni. An department chan atanga advertisement min hmuh saktu Pu Zirthanmawia Hmar leh Pu Robert Zosangliana te chungah pawh lawmthu kan sawi e. He kan tournament buatsaih hi Mizoram Football Association ten min recognised sak bawk avangin kan phuisui phah hle a, tournament felfai tak kan neih theihna kawngah nasa takin min pui bawk a ni.

Branch YMA hnuaia awm kan nih angin, branch ten he kan section inhlawhna hi neih min phalsak mai bakah kan mamawhna apiangah min pui zel bawk a, Nursery Veng Branch YMA chungah lawmthu kan sawi bawk e. Kan tournament neihna hmuntur ber Basketball Court chu Nursery Veng Sporting Club ten hman min phalsak bawk a, Govt. Middle School Headmaster in an classroom thenkhat leh thutthleng leh dawnkan te hman min phalsak bawk avangin an chungah pawh kan lawm hle a ni. Hmunhma kan indaihloh palh taka hman mai theihturin Local Council lamin Vengthlang Field min phalsak bawk a, amah erawh chu hman kan ngai talo hlauh mai pawh a, Local Council chungah pawh lawmthu kan sawi e. Sporting Club lamin goal ban an neihsa kha alo tet deuh avangin siam len angai a, Pu Malsawmtluanga’n tlawm takin min siamlen sak bawk a vangin kan lawm hle a ni.

Entry Fee pek theihna tur hi Aizawl chhung hmun hrang hrangah siam nise kan ti a, entry pek theihna tura an dawra min buaipui saktu – CT Prints – Bawngkawn, The Y2Goal Agencies – Chanmari, Mama Sports Goods – Bazar Bungkawn leh ZL Store – Nursery Veng te hian thahnemngai taka min lo buaipuisak avangin an chungah lawmthu kan sawi e.

Ni 25.03.2019 zan dar 08:00 PM ah team tel atangin aiawh mi pakhat tal kan kokhawm a, kan sawm angin Branch OB ten min rawn tawiawm bawk a, tluangtakin fixture kan siamfel thei a ni. Tournament ah hian team 118 lai mai an rawn tel thei a, hei hi Futsal Tournament siam tawhah chuan team tel tamna pawl tak niin kan hria a, kan lawm hle a ni. Ni 26.03.2019 zan dar 08:00 PM ah match hmasaber kan khel thei a, Local Council Chairman leh Secretary ten hawnna min hmanpui thei a, an chungah kan lawm hle a ni. Rokhawlhna leh remchanlohna avangin kan fixture siamsa te khawih danglam a angai thin a, team tel ten an hun lo ruahman tawhsa te siamrem lehin min hrethiam thin a, kan lawm hle bawk a ni.

Kan hmunhma neihte a remloh avangin inkhelhna hmun bulhnaiah te chhungkaw tam tak an awm a, thenkhat damlo te an awm bawk a, hmundang kan neih miauloh avangin kan khel mawp mawp lo thei silo. Kan rin aia tam team tel kan awm tak bawk avangin zan hnih khat maia khelh zawh mai theih a ni silo a, kar thum lai mai kan khelh a ngai ta sia. School kawt a nih avangin class neih lai chuan kan chawllo thei bawk silo a, kohhran inkhawm zanah inkhawm chhung chu khelloh nise tiin committee in a lo rel tawh bawk si a. A tantir atanga final match thleng min lo hriatthiam zel avang leh entu mipui ten bawlhhlawh an kalsan te min lo tihfai sak thin avangin a bulvela chhuangkaw chengte zawng zawng chungah lawmthu kan sawi tak meuh meuh a ni. School compound chhunglama inkhelte leh entu mipuite bawlhhlawh kalsan te theih ang ang thenfai ni thin mah se a tam zawk chu thenfailoh a ni thin a, hei hi school enkawltu Pu Ramhmasawna te chhungin min lo tihfaisak thin bawk a, an chhungkaw chungah pawh lawmthu kan sawi e.

Organising Committee te kan han din ve a, he committee a member te hi an hah khawp mai a, a bik takin Tv. Christopher Vanlalhruaia (Hruaitea) an a thil pawimawh dang kalsanin he tournament hlawhtlin theihnan hian a tha leh zung a seng nasa khawp mai a, ani hi awmlo se chuan kan tournament hi a hlawhtlinglo ang tih theih hial a ni, a chungah Section committee chuan lawmthu a sawi tak meuh meuh a ni. Ani bakah hian hun leh tha tam tak sengtu Tv. Famkima te, Tv. Romel-a te, Tv. Junior-a te, Pu Albert-a te, Tv. Thara leh Nl. Amfy te chungah pawh lawmthu kan sawi e.

Section OB lam hi kan hnathawhna ten a zirloh avangin duh angin kan lang tam theilo a, member thahnem ngaite leh tlawmngaite zarah OB awmloh pawh hriatmiahlohvin match hrang hrang anlo buaipui thei a, hei hian OB te pawh min thlamuan hle a ni. Heng kan sawi bakah hian section chhunga YMA member te kan tangrual hle a, a tul angin kan tihtur pawimawh nia kan hriatte kan ti zung zung mai hian he tournament hlawhtlinna kawngah hian kawngro an su nasa hle a ni. Futsal ball hi a man a san deuh avangin ball tam tak lei a harsa a, inkhel han tan tak tak chuan ball pet liam mai a awlsam bawk si. Ball an han pet kang luah luah mai han thlir zui chu organiser lam atang chuan rilru chu a khawih dan a dang khawp mai. Mahse kan ballboy te avangin inkhel khaihlak miahlovin a tawp kan thleng thei a, kan ballboy te an vahan chhuanawm tak em.

Final khelh zan chu ropui deuh taka hman nise tih a nih ang zaithiam te kan han sawm a, kan sawm angin tunlai zaithiam zinga sawm hlawhber te zinga mi Kimkima a rawn zai thei a, hla 3 lai mai min rawn sak sak thei a, a chungah leh kan sawm theih nana min buaipuitu Pi Nene chungah pawh lawmthu kan sawi bawk e. Kan veng mi leh veng dang atangin mipui an rawn kalkhawm teuh mai chu engemaw buaina te chhuak thei reng a ni a, buaina a chhuah palh taka min buaipui inring rengin Nursery Veng JAC te an rawn duty thei bawk a, an chungah kan lawm hle a ni.

A tawp berah chuan Pathian ven leh awmpuina vang liau liau a tournament hlawhtling tak nei thei kan nih hi kan hre reng a. Kan section member mai bakah section dang hruaitute leh member ten min phurpuiin min tawiawm tha a, puih leh fuih kan ngaihna laiah min thlahthlam ngailo a, lawmthu sawisenloh kan ba a ni. Vengchhung mipuite inkhel kan endanah vengdang atanga rawn kalte tan entawn tlak takin kan awm thin a, lawmthu kan sawi tak meuh meuh a ni.

Heng kan lawmthu sawina hrang hrangte hi min pawmsak a, ngaihdam kan ngaihna kawngah min hrethiama min ngaidam turin kan ngen a che u.

Leave a Reply