LAWMTHU SAWINA

– Zokunga
Secretary, NYMA

Bialtu MLA zahawm tak, Veng tana mi thahnemngai tak kan neih avang te, VCP tha tak leh a thawhpui mi tha tak tak kan neih avang te, Vengchhung mite kan inlungrualna avang te, YMA Member duhawm tak tak kan neih avang leh vengchhung pawl hrang hrang hruaitu tha tak tak kan neih avang teiin kan vengin hmasawnna kawng kan rap ve dawn tan niin a lang a. A lawmawm hle a ni.

Kan hriat angin kan veng hian mi vengin an neih fer fur tawh, Vengin kan mamawh em em si thil tam tak la neih ve loh kan nei thluah mai. Chung nei thei tura mi veng ten tha an lo thawh hnem tawh dan te, in lungrual taka ke an lo pen thin dan te, an veng chhung mi Sawrkar/Department lam dawr kawng a thil ti thei deuhte’n thahnem an ngaih thin zia te, a tul changa thawhlawm thawh a ngaih pawha tlem lua leh tam lua sawi lova veng mite an in huam dan te kan hriat a pawimawh hle.

Tunlaiah thil ho te alang pawh hi Samdala’n theipui rah tla a nghak ang a nghah ngawt chuan kan nghak chhuak dawn lo tih chu kan hre theuh awm e. Veng hmasawnna atana mite lo inpek nasat thin zia te hre reng chunga tun aia nasa leh zuala inpe chunga hmalak hi veng hmangaihtu rilru put dan tur niin a lang.

Kan hriat angin tunhnaiah Nursery Veng Branch YMA-in Side-drain siam hna kan thawk a, he hna kan hmuh theih nana hma min laksaktu Bialtu MLA leh VCP chungah Branch YMA chuan lawmthu a sawi tak meuh a. Hei mai bakah Bialtu MLA-in MLA LAD Fund atangin lungrem hna min han pe leh a. Heng kan hnathawh ang ang te hi YMA-in sum kan tuakna kawng khat anih mai bakah vengchhung tana thil tangkai ni bawk si a hman a ni leh zel te hi a lawmawm hle a ni.

Heng hna kan thawh chhung hian Branch pum huap hnatlang koh fo a ngai thin a. Member-te hnatlanga hah-thi-kula an thawh laiin hruaituten englai pawhin kokim taka tawiawm kan duhin a tul pawh kan ti hle a. Mahse, mimal emaw chhungkaw thil pawi-mawh dang engemaw avangin englai pawhin kokim takin thahnemngai taka Member hnatlang thin te kan tawiawm vek thei lo erawh hrehawm kan ti hle a ni.

Engpawhnise, tumah in-phut leh in-kar ran awm lova YMA Member mi tlawmngai tak takte’n veng hmangaihna avanga kawng chhuk-chho taka lung rit tak an han pu tawng tawng mai te kha a ropui a. Member-te hah avanga an bianga thlantui luang zawih zawih te hmuh a hrehawm rualin a hmuhnawm lawi bawk si a ni. Mi tlawmngai bianga thlantui luang hi a lo thlawnin a luang dawn lo tih ring ngam ila. Hetianga Member-te kan inpek phawt chuan veng hmasawn tak nia kan ngaih te hi kan um phak loh bikna tur a awm lo tih i ring ngam ang u..

Tunhnaia hna pahnih kan thawh avang hian Branch YMA sum dinhmun a that phah dawrh dawn lo tih leh vengin nasa takin hma kan sawn nghal dawn lo tih chu kan hre theuh awm e. Hei hi ai-te-chhinnaah ngai ila. Beiseina sang tak nei chunga hmalam thlirin, inlungrual tak chungin hma la ho zel ila, Bialtu MLA thut hmun kan nih avang leh VC tha tak kan neih avang te hian a Eng zawngin hmalam i thlir ang u. Hetiang hun tha kan neih hi bawh pelh lo turin YMA Memberte leh vengchhung nu leh pa te a tul anga vengchhung hmasawnna atana ke pen turin i in sangmar mawlh ang u.

Kan sawi tak, YMA hminga hna kan thawh theih nana hma min laksaktu Bialtu MLA leh VC chungah te, thahnemngai taka hnatlanga thawkchhuak thin YMA Member chungah te, a tul ang apiang hmanrua min hmantir bakah thingpui leh a hmeh tuihnai tak min siam sak thin tu, Pu C.Darthankima te chhungkaw chungah te, phal taka lungrem hna kan thawh theih nana an ram min hmantir tu Pu C.Darthankima leh Pu Zorema te chhungkaw chungah te Branch YMA chuan thinlung takin LAWMTHU a sawi mawlh mawlh a. Veng tana in inpekna zawng zawngah rulhletna tur che u in YMA-in engmah tih theih nei lo mah ila, engkimtithei kan Pathian-in in thil tha tih zawng zawng hi a theihnghilh hauh dawn lova, a let tam takin malsawmna a a vur ngei che u Nursery Veng Branch YMA chuan kan beisei tlat a ni.

Leave a Reply