LEHKHA ZIAL

Lalrinzuala Chawngthu

Khûa a lum tâk deuh avangin t-shirt nghâwng nei kawr leh cotton kekawr tlawn hain crocs a bun a, kea lo kal a nih avangin a chalah thlanfîm a bawl tak tak nghe nghe. Ka kîang mai thutthlêngah a rawn thu hnawk a, a chau deuh a ni mahna. E khai! A chau awkawng lo, a smart phone phawrhin tu te emaw a be zut zut alâwm. A hman deuh hnu chuan ka lo be ve ta a.

“Coronavirus an tih hian kan ram rawn luhchilh ve ta se khatîa i tei kual pup pup ang khân i tei kûal thei dâwn hauh lo a nia aw…” “Mai mai a, hri lo chhuahna China ramah sawrkârin hri lêng a thunun tan tawh a, Europe, America leh Australia khawmualpui an bûai ve leh tan pawh hi nakin lawkah la thunun thuai a ni ang. Hei, Aizâwl hi Mizoramah pawh a chiai ber kan ni mai âwm asin. Mi thiam leh fing, khawvêl ningkhàwng hre bera ngaih awm khàwmna kan chiai chîam mai hi kan media vang nge ka hre lo. He thil hi erawh ka hre chhuak…” a ti a. Kum 1099 July 14 khân Jerusalem khawpui chhûng chu a ngui ngiai a. Mipui an chiai a, an zàm tak zet. An âia sipai leh râlthuam tha zawk French sipai rual, Crusader-te chu ‘thih thlenga lo do tùr nge khawpui tlànchhiatsan tùr’ tih an rêl a, mi tam berin lo hmachhawn an duh si.

Muslim-ho chu Al-Aqsa Mosque-ah an fuan khâwm a; Juda-ho Davida Kulhbîng, Mihrad Dawud-ah sipai awm ang ang an inko khâwm a; Kristianho chu khawpui chhim lam vêng tùra ruat an ni. Kulhbîng sâng atang chûan pâwn lama Jerusalem khawpui luhchilh tuma Crusader sipai rual inbun mup mup chu an thlîr leh vang vang thin. Naktùk khawvàrah chuan chûng sipai rual chuan Pope hming chhâlin khawpui chhûnga mihring awm zawng zawng thisen an chhuah puat puat dâwn tih an hai lo.

Tlai lam a lo ni a, khawpui chhûng hmun pakhat, kum 1000 zet kaltaa Roman Governor Pontia Pilata’n khenbeh tùra mipui kuta Lal Isua a hlanna hmunah chûan mipui, nunâu chiai mangang tam tak an chhuak khâwm ta a. Grik mi pakhat thu leh hla ngaihchàn an tum a ni.

He Grik pa hi pa mak zet mai, ràwlthar a nih lâia tangka zawng tùra Athens khawpui chhuahsan, riltâm dangchâra Jerusalem kulh kawngkâa lùt a, awmzui ta a ni a. Pheikhawk siamin ei a zawng a, sakhaw zawm bîk nei loin a mal tlat ngàwk a, khawpuia thil thleng apîang uluk tak chhinchhiah thlap thlap mi a ni.

Grik pa chu mipui chuan duh duh an zawt a. Thiam takin a chhâng zèl a… “Vawiina Jerusalem mipuite hian thlah lo kal zèl tùr te tân chi nung kan hnutchhiah dâwn nia. He Lei hi khualzinna mai a ni a, hringnun pawh hi khualzinna a ni. Kan hmêlmate hi kan hûaisenna enchhin tùra chhiatna lo thleng tùr ni loin kan chak lohna enchhinna tùra mi dàwihzep an ni zâwk.”

Khûa a thim ta. Grik pa chuan mahni in theuha tin darh tùra hrilhin, “Zânin atang hîan khawvêlin a hmuh theih loh ngûnhnâm, ramhuai dawhthei lo leh hriat thiamna nei lo kan sûal dâwn a, i kein a tlin tâwka hlâ ngûnhnâm chu keng la, i tlin rei loh erawh chûan ngûnhnâm keng tlâk apîang kutah khâng ka thuchah che u kha hlàn chhâwng ang che u. Thlamûang takin kal rawh u le…” tiin a chah ta a.

Leave a Reply