LEHKHABU CHHIAR I UAR THAR ANG U

– Tv. Ch. Lalfamkima, Secretary, Y-Section

Tunlai khawvel a changkang zel a, thil thar leh chin dan chi hrang hrang a tam ta. Khawvel hmasawnna in a ken tel Technology lama hmasawnna chuan chhungtin-a a lian ber atanga a te ber thlengin min fanchhuak vek a. Lehkhabu bu pakhat pawh la chhiar chhuak lo in Social media facebook, Instagram, Twitter, Whatsapp leh adangte ah kan duh duh kan sawi thei a, kan vei zawng kan au chhuahpui a, sawiseltu leh khaptu awm tawh hek suh, hei hian kan hringnun khawvel nun hman chhoh zelnaah leh kan Society-ah engemaw chen hmasawnna min thlen rual hian hmasawnna tak tak lam aiin hnungtawlhna min thlen mek zel niin a lang a, a pawi hle. Thalaite kan harh thar a tul hle mai.

Kan ram in hma kan sawn viau lai hian, lehkhabu chhiar tam lamah Mizo thalaite hi kan hnufual hle in alang,hei hi a pawi tak zet. Central YMA-in Kumpuan thupui atan ‘Zirna uar‘ a thlang leh ta a, a bik takin keini thalaite hian kan kumpuan thupui hlawhtlinna ngai pawimawhin kan zirna ah te hmasawnna neih tum mai bakah lehkhabu tha chhiar tamna kawngah tan kan lak thar a ngai dawn hlein a lang. Lehkhabu tha chhiar tur neilo tan pawh kan veng ah Library tha tak a awm tawh a ni tih hria in, veng miten hlut thiam a chhawr tangkai theuh tum bawk ila. Hetah hian kan mamawh leh hmasawnna tur lehkhabu te duh ang chuan a kim vek lo pawh a ni thei e. Mahse, kan mamawh zual pui phuhru thei tawk leh hriatna zau zawk min pe thei tu chu a awm ngei ang. Duty fel tak tak te enkawlna hnuaiah thla tin hawn ziah thin a ni bawk.

Khawtlang pa rawn/mi fing leh remhria ni tur hian sum leh pai ngah hi a tehna a ni ber lo tih kan hriatreng fo hi a pawimawh tak zet zet. Mi awm thei chinin lehkha an chhiar a ni ber lo a, mi bengvar leh inzir duh miin lehkha an chhiar a ni zawk. I ban phak chin a awm lehkhabu chu chhiar zel mai rawh. Mi ram leh hnam ten an khawtlang hmasawn nan eng ang takin nge hma an lak a, hna an thawh tih hre turin hmun hrang hrang kan tlawh thei kher lo ang. Amaherawhchu tunlai khawvelah thangtharte kan vannei tawh a, kawng tha leh awlsam te in chhawpchhuahsak kan ni, internet atangte, lehkhabu leh chanchinbu atangte in kan khawvel hmun hrang hrang chanchin kan awm hmun atangin kan hre thei vek tawh a ni. Khawtlang leh pawl hruaitute kawng bo lo tura vengtu leh vawngtu ni turin lehkha chhiar mite an awm a ngai. Chuvangin,lehkha chhiar peih tamna khawtlang chu khawtlang vannei, hmasawn chak leh changkang tak an lo ni reng mai dawn a ni.

Leave a Reply