LEHKHABU NGEI!

– Pu Lalrinzuala Chawngthu
M-Section

Ka ngaih san êm êm Bill Gates-a hian kum tin lehkhabu 50 vel a chhiar thin. Kuminah lehkhabu 50 chhiar ka tum ve a; mahse, ka tlin lo nasa hle.

Bill Gates-a hi chuan sumdawnna lam hawi te, thuril te, khawvel politics te leh thil danga mi rilru sukthlek leh thlir dan te a hre châk a, an lehkhabu atangin a zawng thin.

Mizoten Social Media kan khawih nasa hle a, hripui avanga ina kan tawm nasat avangin kum dang zawng aiin kan khawih nasa lehzual. Social media-ah hian thu lâkna bulbal nei lo, mi thiam leh ril thuchhuak pawh ni lo, zir chianna tak tak awm chuang lo, tlachawp thu tam tak kan hmu a. Hengte atang hian mi tam tak chuan ngaih dan kan siam thin. A belhchiandawl lo tak zet a ni.

Mi tam tak chuan Google behchhanin thu tha leh fing te kan la a, hriatna tihzauh nan chuan a tha nangiang reng a. Mahse, news site-a thu thar tih loh; thu tam tak hi a ziktluak lo hle. Khawi lehkhabu emaw atanga lak dah a ni thin. Innghahna berah a rin tlak lem loh.

Mizo tawnga ziak lehkhabu kum tin tihchhuah a tam hle thin a, chhiar tlak deuh leh chhiar loh pawi lo a tam thin. Mamawh lam hawi lehkhabu chhiar tur thlanah mi fing an fimkhur thin hle a, mi mal hmasawnna tur leh an tana tangkai tur lam hawi lo lehkhabu chhiar tam an duh lo a ni. Mi nawlpui erawh chuan chutiangin kan thliar lem lo a, kan hmuh hmuh kan chhiar mai zel.

Mizo thalai tam tak hi lehkha chhiar thatchhe si, sawi duh ngah si kan tam hle. A chinchhuaka thil chhui peih lo leh chîk peih si loa tlachhawpa kan thu hmuh behchhanin ler deuh atanga thuai a, ngaih dan siam mai kan uar a, hei hian mi Principle nei lo leh pawnlâwiah min chhuak phah teuh a, a pawi hle.

Eng lehkhabu pawh, vantlanga pho chhuah ngam chu chhiar tam hi a tha hrim hrim. Cowboy buah pawh finna te, dikna tan thatna te, mihring cheng ho kârah inphiarrûkna te a awm theihzia hmuh tur a awm zel tho.

Zirlâibu chauh chhiar bel tlur hi exam-naa tih that nan tha mah se tunlai khawvelah erawh zirlâibu piah lam thlenga hriat tam loh chuan thil tak takah hlawhtlin a harsa tawh a, zirlâibu bâk thleng hriat theih theih hriat a tul tawh.

Khawvelah dam khawchhuak tura kan intuaihriam ve zel loh chuan kan bil tawlh tawlh a, hman tlak lohah kan chhuak thin. Intuaihriam turin hriat tam a tul a, hre tam tur chuan chhiar tam a tul.

Social media-ah mi fing leh ril tam tak chuan an ngaih dan chipchiar an sawi zuah zuah ngai mang lo. Chuvangin Social Media hi innghahna atana hman tlak a ni lo fo. Chu ai chuan mi chhiar tura pho chhuah ngam lehkhabu ngei hi eng kawng atan pawh innghahchhan atan hman a him thin.

Mizo IAS pakhat chuan, “A ziaktu pawh an awm chuan mi ziah sa lo hriat te chu a harsa hlei nem…,” a ti mai a! Mi ziah sa lo chhiar a, lo hriat ve hi mi nâwlpui tih theih a ni.

Ramri, Chakma leh Bru, MLA atanga inban chungchang te hi a lera thuai mai loa, a bulthum atanga sawi thei hi an tam kher lo ang. Mi tam tak chuan hre tura kan inchhiar zau peih loh avanga hre lo kan ni.

Pathian thu-ah pawh, hriat ngai loh châng ni loin hriat tawh sa châng hmangin a ni Pathianin kan hnenah thu a sawi fo ni. Pathian pawlna dawng tura Pathian thu kan lo hriat lawk a tul tho a nih chu.

Leave a Reply