LEIMIN THLEN LOH NAN INHMAKHUA ANG AW

– Dr. Lalrokima Chenkual
Treasurer, NYMA

Kumtin hian Zoram hmun hrang hrangah Leimin leh in chim avang a in leh lo, bungrua hlu tak tak mai bakah Nunna hial chan an awm thin hi a pawi em em mai a. Chu’ng chu ruahga lei lo min vanga tawhna a ni kan han ti thin tak na a, engvanga khalai hmun kha min mai ta nge ni tih ngaihtuah chianna tak nei lem lovin hnatlangin kan insenghawia, kan inpuibawma, min ve awm rengah kan inngai tehreng a ni ang chu, nunphung pangngaia awmin kan in enliam leh mai thin a. Engvangin nge chulai lei chu a lo min, min lo tur a tihdan a awm em ? Hmundanga lei a min loh nan a inven theih em? Lo min ta pawh nise, a nghawng a tihnep theih angem ? tih lam kan ngaihtuah zui vak lo nite in a lang fo thin.

Tun tumah hi an kan rama lei min lo thlen chhan thenkhatte kan ziak dawn a, a nihna takah chuan kan ram a leiminna chhan tam zawk hi chu a leilung pianto vang (structure & lithology control) lam aimahin a cheng a te hian kan thlen chawp a ni zawk. Heng Leimin leh in chim te thlentute ber kan la sawi zel turte hi, kan fimkhur phawt chuan min miah lo tur te,sum leh pai, tha leh zung seng tam vak lo va kan ven mai theih te an ni.

1. Kawng laih :– Kawng laih avangin kawng ko a min in, a vung paih te pawhin leimin a thlena, a bul hnaia in a chim fo thin, chuvang chuan heng kawng ko hnaih a in leh lo neite chu kan fimkhur a tul hle.

2. In hmun laih :- Ram chhengchhia ah awih pangah in kan sa lo thei si lova, insakna hmun laih zawlah leh ban khur kan laih hian a vung paih leh laih dan uluk a ngai hle. Inhmun/ban khur laih fimkhur loh avangin a laitu ram ngei leh a thenawm te ram leh in a ti min fo mai. Inhmun laih a min hlauh avanga thenawm te insuan chhuak tihte, a min tak tak tak avanga in tlu leh thiah ngai, hnathawktu a chhilh tih te leh thenawm in khing ta uaih uaih pawh kan awm tak hi. Thenawm te tibuai lo tur a ramri si chen a lai lo turte, lai ko sang bur lo tur leh ding lutuk lo deuh alaih te leh furpui lo thlen hma ngei a lai zova, a tul ang a lungrem zo hman ngei tur a tan lak te a tul hle a ni.
Kawng leh Inhmun atan lei hmun emaw lung hmun kan laih hian ding lutuk a laih loh hram nise, lung pher a nih phei chuan fimkhur a ngai hle, lei leh lungphek hnuai lam, a chung lam dotu tur awm hauh lova kan laih chah ngat phei chuan ruah pawh sur maih lo mahse a chunglam rit lutuk, dawmtu mumal nei tawh lo kha a min/tla hma em em tih hriat tur.

3. Tuidawn :- Mizoram hian ruahtui kan dawng tha tawk hle thin a, ruah tam tak a sur e ti lo hian a dawnkhawlna lam kan tih loh avangin tui ah harsatna kan tawk fo thin hi a fel hlel deuh thin. In tha deuh deuhin sa mah ila dithlifarfem a tui haw dawnna tur tuidawn kan ngai pawimawh lo tlang hle. Kawt lam – a chung hniam lai leh in sir lehlam lehlam hi chu tuidawn kan siam fur a, mahse kawmthlang lam, a sang lai leh tui khawhthla natna lampang hi tuidawn kan siam tha duh tlat lo va, dithlifarfem atangin a hau-in lei lawngah a dir ta tluah tluah ta a, chu chu leiah relhin a chiah hnawng thuk tulh tulh a lei a ti min ta thin a ni.

Pawisa tam tak seng a sak RCC in chung zawl leh verandah a tui tling luan chhuahna tur tui pipe tawite lo lawr ngauh atanga kawng leh thenawm te ram a tui lo haw to to leh far tluah tluah mai te hi kawng ei chhe tu leh leimin thlen tu an ni a, kawnga kal te tan a ninawm em em bawk. RCC in meuh sa thei chuan an ngaih pawimawh phawt chuan pipe sei zawk an lei thei ngei ang tih a rinawm si. Lei ti min tu leh mipui pawisak lohna lian tak lantirna a nih avangin khawtlang a thuneitute leh tlawmngai pawl te pawhin ti tawh lo tur a ngen a, a tul anga nawr zui deuh te pawh a ngai hial mai thei.

4. Tuihawkluankawr leh Tui chhe paihna :- Hmanlai kan pi leh pu ten thalo an tih zinga mi chu Luikawr kan a insak leh luikawr bul hnai lutuk a insak te an ni a, kha kha leilung awmdan an lo hriat chian vang a lo nih hmel hle. Tunlai chuan chu chu kan pawisa tawh mang lo; Veng thenkhatah chuan Pa duham deuhin Luikawr awmsa nek deuh ran leh kawr ei deuh hlaihin in an han sa a, kawrtui luang lai la kawi hret a, kawr ral leh lam ei hek then ngei turin ban leh lungrem an han siam te, kawr chung a thlawk phei tur a a kalkhang leh chhuat an han siam mai te hi a pawi hle a. Heng ho hian an harsatna thenkhat tui hawk lak, hrut leh len chhiat an tuar duh deuh a – an cho chhuah ni te pawhin a lang a. Mahse chhiatna an tawhin vantlang kan che chhuak leh lo thei thin si lo. An duham avang a an mahni leh an in luahtu leh thenawm khawveng buaina a thleng thin hi a pawi hle thin a nih hi. Kan him tlan zawk nan kawr kam leh hmun him lo laiah in leh lo din lo tlang ila, a lo din tawh te pawh fimkhur lehzual a tul tak meuh meuh a ni. Tin, khatia dithli-farfem a tui haw tuidawn a kan dawh te kha ei leh in atan kan duh chiah lo anih pawhin pipe tha takin tuihawk luankawrah paih tur a ni; Mahse mi tam zawkin chu chu kan ti si lo. Mahni ei rawngbawlna leh Bualin/insukna tui paih fimkhur lo, kan Inchhung a pelh chuan Pipe sei ngaihtuah lem lova duhtawk mai, Huan/Kawmthlang lama an luanna enzui bawk l o, kawmtui/tuichhe l uanna tur atan tuihawkluankawr thatak siam lo hi kan tam a. Tichuan tui chu an duh duhna hmun rem lai laiah an luang bo ta vel a, rei loteah leimin an thlen ta thin a ni.

5. Leivung/hnawl :- Kan inhmun laihzawlna leh bankhur ilo laihna vung paih fai mumal loh inchhekkhawl a, kan hnawl leh bawlhhlawlh paih khawm te kha an lo tling khawm rit tial tiala, kum a vei hian an nghet ta emaw ti a ngaihthah zui mai kan tam thin; An ni hauh lova, an lo ritin ruahin a lo chiah bawka, an tawlh thla hniam a, leimin a lo ni leh mai a. Chuvang chuan heng kan leivung leh hnawl dah khawm te hi an mahni a an tawlh a, leimin an thlen loh nan fur thawh nat tak tak hma a then fai a tha hle a ni.

6. Vawkin :- In tam takin thenawm te tan a rim chhiat leh chhiat loh ngaihtuah duh lem lo vin vawk kan vulh a. Vawkin thlang lam hi an chaw luangliam leh zun leh ek leh an in silfai na tui ten an ti hnawng reng a, vawkin ah tuidawn siam a tuihawk luankawr a luantir thlap thlap pa kan vang viau bawk a. Heng avang hian vawkin zawn lei hi a tawih hmin nghet lo viau thin a, ruah a lo sur takah phei chuan vawkin zawn hi min fo thin a ni. Chuvang chuan vawk kan vulh lo thei lo anih pawhin thenawm te tan a rimchhiat lohna tur hmunah vulh ila, vawkin thlangah tui hawk luanna tur kawr thatak siam nise a duhawm hle ang.

7. Ramngaw/Thing kih chereu :- Chuktuah huan leh ramah te hian Thing zung ngah, lei man khawm tha kit remin Mau/Raw hung – zung an kaih thuk lo kan zuah fo maia, mahse heng te hi an rit em em tho si, an rih avang leh zung a kaih thuk loh si avang hian Ruah a lo sur hlekin an che/tawlh duh em em a ni. Kawmchhakte rawhung tawlh avanga kawmthlang lama mi nunna hial chan pawh an awm nual tawh a ni. Chuvang chuan mitinin kan huan ram enfiah a, kan thing leh mau bulte enchian a fimkhur tlan a tul hle a ni.

8. Septic Tank :- Mizoram ah Septic Tank siam fuh lo kan tam hle mai a, heng Septic Tank leh Soak Pit leak vel hian an bul vel a leilung an chiah hmin duh em em mai a, ruah lo sur thin nen lei an ti min fo thin. Kan septic tanky leh soak pit te enchiang fo ila, a khah leh khah loh bakah mite tan a rimchhiat leh chhiat lohte, leimin a thlen mai thei em tih te pwh chian theuh thin ila a tha hle mai.

Tin soakpit a tui khat liam, kawngsir kawra rawn luan liam tir ngawt mai te hi a ringtu tih chi lo em em a ni. Hengte hian leimin an thlen thin tih hria ila ni. Kumdanga hmun hrang hrang a Leiminna hmun han enchian hian leimin na bawr vela In leh Vawkin te hian Tuidawn an neih loh fo bakah Tuihawk luankawr a awm mumal lo em em zel tlat a ni. Heng chhan langsar zualte hi mi tam tak hian leimin chhan leh vangah kan pawm duh hauh lova, mahse an ni tlat si. Tin, sum leh pai seng so tam si lo leh harsa lo tak a siamthat theih te an ni a, tih kan tum bawk si lo va. Heng mi fimkhur lo te avangin kan tuarin leimin leh in chim a lo awm a, khawtlang kan che chhuak leh lo thei si lova,inzirtir a tulin kan fimkhur loh leh inthlahdah avang a keimahni leh midang tawrhna thleng a ni tih hi a ruh lang a inhrilh dawt dawt tawh mai tur em ni ang?

A tawp berah chuan Fur a lo thlen hma leh thlen mek lai hian mi zawng zawng hian tawrhna leh chhiatna a lo thlen loh nan kan sawi lan tak leimin thlen tute hrereng a – thil hautak lo thenkhat – Lei laih lam hna zawh thuai thuai a, derthawng leh hlauhawm lai tawrhna thlen mai thei awm deuh lai thawm that vat, tuidawn tha tak mai neih tih te, tui chhe paih fimkhur deuh, tuihawk luankawr mumal tha, Ek In (Septic Tank leh soak pit) siam uluk deuh, leivung leh hnawl chhekkhawl teuh loh tih te hi mi zawng zawngin zawm ila a tha hle mai.

Leave a Reply