LPG HOME DELIVERY CHUNGCHANG

Ni 19.01.2021 (Thawhlehni) zan dar 7:00pm khan Vanapa Hall-ah LPG Home Delivery chungchanga inhmuhkhawmna leh hriattur tulte in hrilh hriatna hun hman a ni. Pu Vanlalruata, President in kaihruaiin, Pu Lalsangzuala Sailo, CEC in hunserh a hmang. Prof. Lalnuntluanga General Secretary hnen atangin hriattur tulte ngaihthlak a ni a, inhmelhriattirna leh in lawmna hun hman a ni.

Tun dinhmunah LPG Home Delivery hi veng pali- College veng, Dawrpui, Falkland leh Zonuam ah te kalpui mek a ni. Sawrkarin ruahmanna a siam angin Feb 2021 thla laihawl atangin Aizawl khawpui chhung veng hrang 28 ah kalpui tan tum a ni bawk.

Dr. Lalhriatzuali, Director, FCS&CA Department hnen atangin Sawrkar ruahmanna leh kalpui mek dante ngaihthlak a ni a. LPG Home Delivery hlawhtlingtaka kalpui anih theih nan YMA te tawiawmna leh thawhhona tha neih a tul thu sawiin, YMA te tawiawmna a ngen nghal bawk.

Pu Fabian Lalfakawma, Treasurer hnen atangin LPG Home Delivery thatna leh mipuite tana awlsamna anih thu sawiin, dan anga kalpui anih theihnana tanlak a tul tak zet thu ngaihthlak a ni bawk.

LPG Home Delivery kalpui mekna veng Branch YMA hruaitute hnen atangin a hlawkna leh tha an tih thu ngaihthlak a ni.

Hemi hnu hian zawhna leh chhanna hun hman ni in, inhrilhfiah ngaite inhrilhfiah zui a ni. Hlawhtlingtaka hun hman a ni.

He hunah hian mi 138 lai kalkhawm ni in. Tuikual S Branch ten Ei leh in buaipui leh lokalte dawn sawn hna an thawk a, a lawmawm hle.

Prof. Lalnuntluanga
General Secretary
Central YMA

Leave a Reply