MAKPA-TE NIHNA

– R. Zalinga (Y-Section)

Kei lehlul kan chanchinbu ‘Nursery Aw’ Editor ten ‘Makpa tih hi rawn sawifiah teh’ an ti a, insit hle chungin hetiang hian han sawifiah dawn ila.

A hmasa berin Makpa hi chi li (4) in a sawi theih awm e.

1. Makpa : Hei hi sawifiah em em ngai lovin, hmeichhia in pasal a nei a, a pasal kha hmeichhe chhungte tan ‘Makpa’ a ni nghal mai.

2. Makpa Chhungkhung : Hei hi hmeichhiain a pasal kha a nu leh pa inah la lutin, mipa khan a ma in chhuahsan in a nupuite inah awm ta sela, ‘Makpa chhungkhung’ a ni.

3. Makpa Hnam hrual chat : Hei hi hmeichhia kha a pasalin lo thihsan ta se, makpa nihna hmeichhe chhungte tan a lo tawp tak avangin makpa kha a puzawnte laka a mawhphuhna leh a nihna a lo tawp ta a, chu chu ‘Makpa hnam hrual chat’ an ti.

4. Makpa zawnchawp/ siam chawp : Hmeichhia khan khaw hran daihah emaw, vengkar hla takah pasal va neiin, khami veng a mi, a chipui emaw, a duh ang chhungkua tu emaw kha a nu leh pa emaw a chhungte khan ‘Hei hi i chhungte atan’ tiin pawisa Rs 20/40 emaw pein Pa aiawh, eng emaw thulha an chaw thing barna tur an siam thin.

Makpa insiam dan leh a hmingte kan sawi ta a, makpa ten pute laka an mawhphurhna, inkungkaihna leh an nih dan tlangpui hetiang hian han sawifiah dawn ta ila.

Hmeichhe pasal nei tawh phawt chuan Mizo danin man a nei a, chu hmeichhe man atang chuan hmeichhe chhungte khan Mantang an ti a, an chhungkhatte man an eitir thin a. Heng man eitu – sum hmahruai, pusum, Palal kan tihte eitute tan khan an makpa kan ni ta a, nupui neia tan khan khang ho kha a puzawn te an ni ta. Chuvangin khang man eitute khan,chhiatni that niah makpa mawhphurhna an chan tirin, an makpa pawhin khangah khan a mawhphurhna a ni tih a hre tur a ni.

Makpa leh puzawnte inkarah hian ramri fel taka thliar hran har deuh te, mirethei leh hausa te chet dante in ang diak diak theilo mah se, a tlangpui chuan hetiang hi a ni. Hmeichhe pasal kha makpa a ni a, a nupuia nu leh pa / nu leh pa man dawngtu kha puzawn a ni ta a, a puzawn khan chhiatni – thatniah a kutke ber leh a fa hrin ang bawka a hman thin a ni a, ei leh bar chung changah pawh makpa te hi an duat em em thin. Vawkpa sut nghak talh nikhuaah pawh pute duhsak ber chu an makpa kha a ni. Thu chhia a thaah pawh puzawnte tan an fapa ang bawka an biak rawn a ni. Heng kan sawi takah te hian a karah in zep tam tak a awm. Tunlai leh hmanlai kan khawsak dante hi a dang ta em em a, puzawn ten mahni chhungkua a tih mai theihloh, entirnan- nupui pasal neih thuah, pute thu tlukna a taka hlen chhuah theih nana hma latu an ni, kei hian chhan hrang hrang vangin ruaipui theh lo tum ta ila, makpa te tel lovin thu tih tluk mai chu thil tih chi a ni lova, kan rorelna ah an tel ngei tur a ni. Chu mai pawh nilovin puzawn chhungte nupui pasal neih chungchangah palai hna thawktu ber a ni.

Chhiatni, a bik takin thih niah leh a hnu ah mawlh mai hian makpa te tih tur a tam hle. Hmanlai chuan ruang tuam, phum dawna kuanga dahluh leh thlanmual thlenga ruang zawntute chu makpa te an ni a. Thlan chhungah an khunga, chu chu leiin an vur leh a, a tuk lamah emaw thlan kha an hung thin. Hengte a nih vang tak hian kan pipute chuan hetiang nikhuaah hian mualpho an hlau a, makpa bul mai tih sen loh a awm thin avang hian anmahni chi pui, hmeichhe chipuite leh chhungte thleng khan an chet a ngai thin. Mahse tunah chuan heng hna hautak tak takte hi khawtlang leh kohhran, YMA ten thatna avangin an thawk thin a, chuvangin tunah a ngai tawhlo. Heng hi ni mahsela makpa ten kan tihtur tih leh, sulsutu ber nih hi makpa bengvar nihna a ni a, makpa bengvar nih hi kan tihtur a ni.

Hmanlai lo neiha eizawnga khawtlanga hlo thlo mi kan nih laite khan, tute chhungkua emaw chu dam mawh hritlan thuah te mahni thlawhhma lak, mi lo zawh ruala zo ve theilo te inkhaichhuah nikhua te mawlh khan makpa te an hlu thin. Makpate chu a vau sir, hna rum lai a hma tawng tuah an tang thin.

Heng makpa kan han sawifiahna hi khawi danah mah ziah a nih ka hre lova, tunhma leh tunah leh nakin atana Mizo-in ziakloh dan kan neih, kan chhawm nun zel atan leh keima irawma keima hriat dan ka ziak ve mai a ni a, kei aia fiah zawk leh hre zawk ten la belh chhahin la ziak se ka duh hle a, he ziakloh dan te hi kan hmasawn leh changkanna hian chimbo lo se ka duh hle a ni.

Leave a Reply