Mari fapa Isua Krista

– Zokunga
(14.11.2011)

Chrismas a lo thlen a piang a lunglen hnem atana hla ngaihthlak hlawh, mahse, lunglen hnem a hneka mittui ti tla fo
thin tu Boney M hla Mary’s Boy Child tih hi Zoram mai pawh nilo, Khawvel pum huap pawh a Chrismas denchhen a hla ngaihthlak hlawh ber pawl a ni hial awm e. He hla thluk mawina te, a music mawina leh a satute zaithiamna chauh ngaihtuah chung hian a phen a chunglam thil tum zawk hmuh hmaih si hian kan ngaihthla liam leh mai ang tih hlauhawm tak a ni.

Ngai r’u, vawiinah Lal a lo piang ta
Hark, now hear the angels sing, a king was born today,
And man will live for evermore, because of Christmas Day.
Mary’s boy child Jesus Christ, was born on Christmas Day.

Khawvel a Lal ropui lo piang te hi an pian hlimah tumahin Lal ropui an la ni dawn tih kan hrelawk ngai reng reng lo. An rawn seilen dan te, zirna kawng an zawh chhoh dan leh chhungkaw in enkawl chhoh dan te avangin Lal ropuiah an lo chhuak thin mai zawk a ni. Kan chunga roreltute rorel dan hi dik famkim loh chang a awm fo thin avangin a kawi a ngil a an thu zawm hi harsa tih chang kan neiin tihluihna a an thu zawm a ngai thin phei hi chuan in nghirnghona a thlen fo thin reng a ni. Chrismas ni a Mari fapa lo piang zet erawh chu “Lal” nisa a rawn piangin mitin tan chhandamna a rawn pian chhuah pui tawp mai a. A lo pian chhuah dan leh a rorel danah kan ruahmanna tel ve reng reng lova thuneitu in tha a tih ang a ruahmanna a siam a nih miau avangin a rorelna a fel famkim vel vek a, i he lova zawm hi kan bat tlat a ni.

Naupiang lawmnan Van-Zaipawl
While shepherds watch their flocks by night,
they see a bright new shining star,
they hear a choir sing a song, the music seemed to come from afar.

Bethlehem a ran in pakhat a ran chaw pekna thleng a piang ve mai bawk si, Berampu ten zan khawvawt a an beramte an ven lai a nidang a an la tawn ngai reng reng loh Arsi eng chung chuang an hmu thut te, naupiang lawmna atana Van-Zaipawl in hla ruah tham loh an sa thup thup thawm an han hre mai te hi thil mak, mihring ngaihtuahna atang chuan pawm harsa leh engtikah mah chhui chhuah zawh rual loh tur a ni.

Mitin tan remna
For a moment the world was aglow, all the bells rang out
there were tears of joy and laughter, people shouted
“let everyone know, there is hope for all to find peace”.

Ram leh ram, hnam leh hnam indo bur burna hmun, in huatna leh in thah buai buai na ten nitina thla an zarna hmun Khawvel famkim lova awm thaw-ipik thlak zia chu kan hre theuh awm e. Chutiang thil rapthlak tak te chu Khawvel a Lal ropui tak tak ten an finna leh theihna hmanga an chin fel theih reng reng loh a ni fo. Kan phu vang emaw kan dil vang emaw ni hauh lova chung harsatna zawng zawng lak a ta min chhanchhuak tura nausen lo piang lawmnana rimawi chitin reng tih rik chuah chuah te, lawm avanga mittui tlak te, nui hluah hluah leh te tengtung thawm nena lo hmuah leh lo lawm pawh a phu reng a ni.

Amaherawhchu, kan tana naupiang in ‘remna’ a rawn pian chhuah pui laia thenawm khawveng chu sawi loh, chhungkuaah pawh inremna kan nei thei tlat si lo hi engvang nge ni ang? Remna hi min petu lam chuan phal takin a fapa mal neih chhun kaltlanga min pek tawh si avangin kei ni hian engemaw tih ve tur kan nei a ni ngei ang. Mahni tana hahthlak thlawn mai mai a midang tai tai lovin, vawiin atang ngei hian midangte nen a inrem thei turin mahni theuh in enfiah ila, kan tana naupiang in a rawn pianpui “remna” changtute zingah kan tel ve thei ngei ang.

Pian-run a vai lua e
Now Joseph and his wife, Mary, came to Bethlehem that night,
they found no place to bear her child, not a single room was in sight.
And then they found a little nook in a stable all forlorn,
and in a manger cold and dark, Mary’s little boy was born.

Kan zingah retheihna avanga tlem a khawsak harsa deuh te chu kan awm ngei ang, mahse, tumah hi pian-run em vai khawp chuan kan rethei tawk lo anih hmel. Thlasik khawvawt vintuk mai hnuaia nau neihna tur hmun zawng a Josepha leh Mari nauvei pumna teuh tawh, khualbuk te tak te pawh an hmuh zawh ngang loh avanga bawng in reh thiap mai a nau nei tura an in zui hnak hnak te, ran chaw pekna thleng vawt thler mai a puan sin lum tur awm bawk si lova nausen piang hlim an han mut bam mai te chuan an rilru a tina ve ngawt ang. Chutiang taka kan tan a lo tuartu tan chuan engemaw han tihsak ve pawh kan in huam ngei ang. Mahse, chu nausen lo piang chuan a ma tan engmah phut nei lovin, “heng mite ber chunga in tih hi ka chung a ti in ni” a lo tih miau avangin kan bulhnai maiah hian tih tur kan lo nei reng maithei a ni. Kumin thlasik khawvawtah hian kan thenawm hnaiah mutbu lum nei lo te an lo awm reng em? Silh leh fen neih loh avanga Biakin a chuangkai ngam lo te an lo awm mial em? Tukthuan/zanriah thlak tur nei lova rum tlawk tlawk te hi kan lo awm reng lo maw?

Phut let nei lo thilpek
Oh my Lord, You sent your son to save us
Oh my Lord, Your very self you gave us
Oh my Lord, that sin may not enslave us
And love may reign once more

Hmuh let beisei nei ru ran chung a milian te hnena thilpek han pek te hi chu ui chu sawi loh, kan pek/senso a tam zawh poh leh a rawn let leh tur a tam ting mai a ni. Hmuh let beisei nei lova mi rethei deuh zawk te hnena thil kan pek lah hian kan neih chuang bang, kan mamawh meuh tawh loh hi kan inpe zawk fo thin. Vawiin a thilpek min petu zet hi chuan beisei let tin ther tiat pawh nei lovin, a thil neih zing a hlu ber leh a neih chhun liau liau, engti kawng zawng mah a a thlakna a neih leh theih tawh reng reng loh tur “Fapa mal” min pe a. Chu thilpek chuan nghet tak mai a min sal bet tlat tu sualna lak ata min chhuah zalenin hmangaihna nun-ah min hruai thleng hi a ropui a, bang lova lawmthu sawi mai tur kan lo ni.

Chibai i buk ve ang u
Oh my Lord, when in the crib they found him
Oh my Lord, a golden halo crowned him
Oh my Lord, they gathered all around him
To see him and adore

Silh leh fen tur mumal nei lovin ranchaw pekna thlengah mai mu mah se, Khawchhak mifing te tan meuh pawh a lu hual vel a ‘Lal lukhum’ eng kalh mai chu hmuh hmaih rual anih loh avangin Pathian chibai buka chibai an buk pawh kha thil tihawm reng a ni. Lal Heroda’n a der mai a chibai buk a duh avanga nausen lo piang zawng chhuak tura a tirh Khawchhak mifing te pawhin Lal thar lo piang chu rinhlelhna nei hauh lova tihtakzet a chibai an buk theih laiin, kei ni hian kan Lal hi kan lo hai palh mai ang tih hlauhawm tak a ni.

Kan tan a takin lo piang ve mawlh rawh se.

Mari Fapa Isua Krista ngei khan he Khawvel a kan zing a kum 30 vel emaw a cham chhungin thil tha tam tak min kawh hmuhin tih tur leh tih loh tur tamtak min kawh hmuh a. Chung zawng zawng chu zawm famkim a harsat bakah hriat vek sen pawh thil harsa a ni. A thu min chah zingah “Remna siamtute chu an eng a thawl e; Pathian faa vuahin an la awm dawn si a” (Mathaia 5:9) tih leh “mahni mihringpui hmangaihtu chuan dan chu a zawh famkim tawh si a” (Rom 13:8 ) tih te mai pawh hi vawiin a piancham kan lawm mekah hian hre thar lehin zawm theuh tum ila, vawiin a nausen lo piang hi kan mimal nun, kan chhungkua, kan kohhran leh kan khawtlangah atakin a lo piang ve tawh ang a. Chu nun neitute chu lusunna avanga an mittui tla te a hul thin a, fate sualna avanga an rilruna tihdam a ni a, retheihna avanga an rilru hah pawh chhawk zangkhai in an awm thin a ni.

Leave a Reply