MAY!!

– Lalrinzuala Chawngthu

Mizo kristiante lung tileng ber December thla hi kan Lal Isua Krista pianchampha thlenna thla a nih vang te, kan piputen an kum khat thawhrah par an lawh leh tlan hun, hlawhtlinna tlang an lawn hun a nih vang te tih lohah chuan Latin tawnga ‘sawmna’ (decem) tihna mai, Roman hovin ‘thla sawmna’ an tih, tunhnua keini thla 12-na mai a ni a, danglamna leh bikna dang a neiin a lang lo. Khua a vawt hle a, sap ramah phei chuan vur tlak hunlai leh a vawh vin tuk thin vang te pawh a ni mahna W. Shakespeare-a’n hmeichhe thinchhe tak nen a khaikhin duh lek ni.

Tun thla ‘May’ erawh zir tham a ni a niang e, Greek mi fing leh kohhran hruaitu hmasaho tam takin Bible aia chhah zawk leh lian zawk khat tlatin ‘May’ thla chungchang an thairang del dul e an tih chu! Thlasik khawvawt lutuk bovin malsawmna ni eng mawi tak maia thlai thar leh pangpar mawi tak takte than chhuahtirtu Roman pathiannu (MAIA goddess) hmingchawia sak a ni a. ‘May’ tih hi Latin tawng niin ‘punna emaw thanna (increase or growth)’ tihna a ni. Chhinchhiahna atan pangparah ‘Hawthorn’ leh ‘Lily’ hman niin Savaah ‘Emerald’ hman a ni bawk. Malsawmna lam hawi vek ‘May’ thla hian a ken avangin hmanlai Roman ho chuan an pathiannu ‘Maia’ chawimawi nan 1st May hi an hmang thin a, hei mai duh tawk lovin 15th May-ah an pathiannu hi an chawimawi leh thin. Tunah erawh 1st May chu Labour Day atan khawvel pumah hman a ni ta.

Tunhma Roman calendar-ah chuan May thla hi kum khata thla 3-naah dah a ni a, March hi 1-naah a awm daih thung. Hun alo kal zel a, Roman ho chuan January thla hi 1-naah dahin ‘May; thla chu 5-naah an dah thung a, hetia an tih danglam nachhan pawh hi kum khat chhunga sik leh sa that pangai hun lai, thlai leh pangpar than chhoh hun lai leh kum tin ni 31 awm reng theihna an duh vang nia ngaih a ni.

North Temperate Zone-ah kum khat chhunga thla awm zingah tunhma chuan ‘May’ thla hi sik leh sa nawm hun lai ber leh khawvel hmel mawi hun lai ber a ni thin. Khur zawih zawih khawpa kut tivawttu vur tlang a tuiral a, thlasik khawvawt thip vur mai chuan khawvel a mangtha a, pangpar leh thlai hnah an rawn chawr no tan a, khawlum nunrawng tak ala rawn inherchhuak chiah si lo, tlang tin mual tin an hring nghulh a ni ber mai. Nasa takin lir a nghing lova, thlipui lah tih tham a tleh bawk hek lo, to erawh alo haw thin; mahse, khua a cheng tak tak ngai chuang lo.

‘May’ thlaa piang reng reng chu engtin emaw taka an duhawm nghelh pawh hi a lo awm viau mai. Vawiin a ni 16-na tak phei chu ‘May’ thlaah pawh a lai tak, a nawmna leh duhawmna khaikhawmtu ber niin a lang a, he ni dam taka kan tawng hi kan vannei hle a ni. Kum 3+ kalta vawiin ang, kha mi kuma Thawhtanni tlai dar 6:30 vel khan he thuziaktu hi hringchang turin he khawvelah alo piang a, Roman ho pathiannu zuat em ni tih turin a ngai ngaiin ala awm ‘nalh’ a, he article i chhiar pah hian Birthday chibai tha mi i buk nghal a ni e.

Leave a Reply